COVID-19
អន្តរជាតិ
សមាជិកសភាជាប់ឆ្នោតម្នាក់នៅអាមេរិក ស្លាប់ដោយសារកូវីដ-១៩ តំណាងរាស្រ្តជាប់ឆ្នោតម្នាក់មកពីរដ្ឋ Louisiana លោក Luke Letlow ។ រូបពីទូរទស្សន៍អាមេរិក USA Today
× តំណាងរាស្ត្រជាប់ឆ្នោតម្នាក់នៃសភាតំណាងរបស់រដ្ឋ Louisiana របស់អាមេរិក លោក Luke Letlow បានទទួលមរណភាពដោយសារជំងឺកូវីដ-១៩ នៅថ្ងៃទី ២៩ ខែធ្នូ។ លោកជាសមាជិកសភាដំបូងដែលត្រូវបានជំងឺកាចសាហាវមួយនេះឆក់យកជីវិត។
សមាជិកបក្សសាធារណរដ្ឋ លោក Luke Letlow អាយុ ៤១ឆ្នាំ ត្រូវបានជាប់ឆ្នោតតំណាងឲ្យស្រុកទី៥ ប្រចាំសភាតំណាងក្នុងរដ្ឋ Louisiana ហើយគ្រោងស្បថចូលកាន់តំណែងនាថ្ងៃទី៣ ខែមករា ឆ្នាំ២០២១។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
តាមរយៈបណ្ដាញសង្គម Twitter អភិបាលរដ្ឋ Louisiana លោក John Bel Edwards បានផ្ញើសាររំលែកទុក្ខចំពោះភរិយាលោក Letlow និងក្រុមគ្រួសារលោក។ លោកសរសេរដូច្នេះថា៖«ខ្ញុំគ្រាំគ្រាក្នុងចិត្តដែលលោក [Letlow] នឹងមិនអាចបម្រើពលរដ្ឋយើងក្នុងនាមជាតំណាងរាស្ត្រអាមេរិកម្នាក់ តែខ្ញុំកាន់តែសោកស្ដាយថែមទៀតសម្រាប់ក្រុមគ្រួសារលោក»។ លោកអភិបាល Edwards បន្តថា លោកបានបញ្ជាឲ្យបង្ហូតទង់ជាតិត្រឹមពាក់កណ្ដាលដងដើម្បីកាន់ទុក្ខលោក Letlow ។
មរណភាពរបស់លោក Letlow បន្សល់ទុកនូវភរិយាលោក អ្នកស្រី Julia Barnhill Letlow និងកូនតូចៗ២នាក់។ ប្រាប់ប្រព័ន្ធផ្សព្វផ្សាយអាមេរិក ក្រុមគ្រួសារលោក Letlow បញ្ជាក់ថា ការរៀបចំបុណ្យសពលោក Letlow នឹងត្រូវប្រកាសនាពេលក្រោយ ហើយពួកគេអរគុណចំពោះការចូលរួមរំលែកទុក្ខ។
លោក Letlow បានប្រកាសកាលពីថ្ងៃទី ១៨ ខែធ្នូថា លោកមានលទ្ធផលតេស្តវិជ្ជមានកូវីដ-១៩ ហើយបានធ្វើចត្តាឡីស័កនៅផ្ទះ។ ៣ថ្ងៃក្រោយ លោកបានទៅសម្រាកព្យាបាលនៅមន្ទីរពេទ្យ។ យ៉ាងណាមិញ គ្មានព័ត៌មានលម្អិតថាលោកមានជំងឺប្រចាំកាយស្រាប់ ឬយ៉ាងណាទើបធ្វើឲ្យលោកបាត់បង់ជីវិតបែបនេះ ខណៈលោកមិនស្ថិតក្នុងក្រុមមនុស្សមានហានិភ័យខ្ពស់ផងនោះ។
សូមបញ្ជាក់ដែរថា សហរដ្ឋអាមេរិក កំពុងប្រឈមនឹងការកើនឡើងខ្ពស់នៃករណីឆ្លងកូវីដ-១៩ ក្នុងប៉ុន្មានខែចុងក្រោយ។ គិតត្រឹមថ្ងៃទី៣០ ខែធ្នូ សហរដ្ឋអាមេរិក មានករណីឆ្លងសរុប១៩,៤លានករណី ខណៈអ្នកស្លាប់ឡើងដល់៣៣៦ ០០០នាក់៕
Tag:
សហរដ្ឋអាមេរិក
កូវីដ-១៩
© រក្សាសិទ្ធិដោយ thmeythmey.com