ជាតិ
សង្គមជាតិ
ក្រសួងវប្បធម៌អនុញ្ញាតឲ្យដំណើរការរោងភាពយន្ត រោងសម្តែងសិល្បៈ និងសារមន្ទីរឡើងវិញ
× ក្រសួងវប្បធម៌ និងវិចិត្រសិល្បៈ អនុញ្ញាតឲ្យភ្ញៀវទេសចរជាតិ និងអន្តរជាតិចូលទស្សនាសារមន្ទីរជាតិ និងបើករោងភាពយន្ត និងរោងសម្តែងសិល្បៈគ្រប់ប្រភេទឡើងវិញ។ ប៉ុន្តែក្រសួងតម្រូវឲ្យទីតាំងទាំងនេះ បន្តគោរពគោលការណ៍សុវត្ថិភាពរបស់ក្រសួងសុខាភិបាលឲ្យម៉ឺងម៉ាត់បំផុត។
ពីរថ្ងៃក្រោយសម្តេចនាយករដ្ឋមន្ត្រី ហ៊ុន សែន ប្រកាសបិទបញ្ចប់ព្រឹត្តិការណ៍សហគមន៍ ២៨វិច្ឆិកា ការចូលទស្សនាសារមន្ទីរ ការបើករោងភាពយន្ត និងរោងសម្តែងសិល្បៈគ្រប់ប្រភេទនៅទូទាំងប្រទេស ត្រូវបានក្រសួងវប្បធម៌ និងវិចិត្រសិល្បៈអនុញ្ញាតឲ្យបើកដំណើរការឡើងវិញ ចាប់ពីថ្ងៃទី១ ខែមករា ឆ្នាំ២០២១។
សេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈ ដែលចេញផ្សាយនៅថ្ងៃទី៣១ ខែធ្នូ ឆ្នាំ២០២០ បានបញ្ចាក់យ៉ាងដូច្នេះថា៖«ក្រសួងវប្បធម៌ និងវិចិត្រសិល្បៈអនុញ្ញាតឲ្យបើកដំណើរការឡើងវិញនូវការចូលទស្សនាសារមន្ទីរ រោងភាពយន្ត និងរោងសម្តែងសិល្បៈគ្រប់ប្រភេទទូទាំងប្រទេស ដែលបានចុះអនុសារយោគយល់ជាមួយក្រសួង»។
ជាមួយគ្នានេះ ក្រសួងណែនាំឲ្យម្ចាស់អាជីវកម្មរោងភាពយន្ត រោងសម្តែងសិល្បៈ និងអ្នកគ្រប់គ្រងសារមន្ទីរទាំងអស់ ឲ្យបន្តអនុវត្តវិធានការការពារការឆ្លងរីករាលដាលនៃជំងឺកូវីដ-១៩ របស់ក្រសួងសុខាភិបាលឲ្យខ្ជាប់ខ្ជួន និងម៉ឹងម៉ាត់បំផុត។ វិធានការទាំងនោះរួមមានត្រូវរក្សាគម្លាតយ៉ាង១.៥ម៉ែត្រ ពាក់ម៉ាស លាងដៃជាប្រចាំជាមួយអាល់កុល ឬជែង និងត្រូវវាស់កម្តៅមុនអនុញ្ញាតឲ្យទីតាំងណាមួយ។
គួររំឮកថា ក្រសួងវប្បធម៌ និងវិចិត្រសិល្បៈបានសម្រេចបិទការចូលទស្សនាសារមន្ទីរ រោងភាពយន្ត និងរោងសម្តែងសិល្បៈនានា ក្រោយកម្ពុជាផ្ទុះការឆ្លងរីករាលដាលនៃជំងឺកូវីដ-១៩ក្នុងសហគមន៍ កាលពីថ្ងៃទី២៨ វិច្ឆិកា ឆ្នាំ២០២០។ សម្តេច ហ៊ុន សែន បានដាក់ឈ្មោះការឆ្លងក្នុងសហគមន៍នោះថា ព្រឹត្តិការណ៍សហគមន៍២៨វិច្ឆិកា៕
Tag:
ក្រសួងវប្បធម៌ និងវិចិត្រសិល្បៈ
© រក្សាសិទ្ធិដោយ thmeythmey.com