មនុស្សយ៉ាងហោចណាស់២២នាក់ បានស្លាប់ និងជាង៥០នាក់ទៀត រងរបួសក្នុងហេតុការណ៍វាយប្រហារនៅព្រលានយន្តហោះក្នុងទីក្រុង Aden ភាគខាងត្បូងនៃប្រទេស យេម៉ែន ។ ហេតុការណ៍នៃការផ្ទុះនេះ បានកើតឡើងភ្លាមៗក្រោយយន្តហោះដឹកនាំគណៈរដ្ឋមន្ត្រីថ្មី ដែលគាំទ្រដោយអារ៉ាប៊ីសាអូឌីត បានចុះចតនៅទីនោះ។
មិនបានប៉ុន្មានាទីក្រោយយន្តហោះដឹកនាំគណៈរដ្ឋមន្ត្រីថ្មីរបស់រដ្ឋាភិបាលយេម៉ែនចុះចតនៅព្រលានយន្តហោះ Aden ការផ្ទុះដ៏កក្រើកមួយកើតឡើង។ ប្រភពនៃការផ្ទុះនេះ ពុំត្រូវបញ្ជាក់ឲ្យច្បាស់លាស់ឡើយ ហើយក៏គ្មានក្រុមណាចេញមុខទទួលខុសត្រូវចំពោះការវាយប្រហារព្រលានយន្តហោះនេះផងដែរ។ តាមការចុះផ្សាយរបស់ទូរទស្សន៍កាតា Aljazeera មន្ត្រីរដ្ឋាភិបាល និងបុគ្គលិកអង្គការមនុស្សធម៌ ស្ថិតក្នុងចំណោមអ្នករងគ្រោះ។
នាយករដ្ឋមន្ត្រីយេម៉ែន លោក Maeen Abdulmalik បញ្ជាក់ថា គ្មានសមាជិករដ្ឋាភិបាលយេម៉ែនណាម្នាក់ដែលនៅលើយន្តហោះនេះ រងរបួស ឬស្លាប់ឡើយ។
ប៉ុន្មានម៉ោង ក្រោយការវាយប្រហារនេះ ការផ្ទុះលើកទី២ បានកើតឡើងនៅក្បែរទីតាំងសុវត្ថិភាពមួយក្នុងទីក្រុង Aden ទីដែលសមាជិកគណៈរដ្ឋមន្ត្រី រួមមាន នាយករដ្ឋមន្ត្រី Maeen Abdulmalik ក៏ដូចជាអគ្គរាជទូតអារ៉ាប៊ីសាអូឌីតប្រចាំយេម៉ែន ត្រូវបានជម្លៀសទៅកាន់ទីនោះ។ លោក Abdulmalik បានថ្កោលទោសការវាយប្រហារនេះថា ជាអំពើក្បត់ និងកំសាក ហើយប្តេជ្ញាបញ្ចប់ការធ្វើរដ្ឋប្រហារ ស្រោចស្រង់រដ្ឋ និងរក្សាស្ថិរភាពប្រទេស។
ទោះមិនដឹងច្បាស់ពីប្រភពនៃការផ្ទុះ ទូរទស្សន៍អារ៉ាប៊ីសាអូឌីត Al-Hadath បានបង្ហាញវីដេអូ ដែលបង្ហាញ មីស៊ីលហោះទៅបុកផ្លូវយន្តហោះ ហើយផ្ទុះ។ រដ្ឋមន្ត្រីព័ត៌មានយេម៉ែន លោក Moammar Al-Eryani បានទម្លាក់កំហុសការប្រហារនេះលើក្រុមឧទ្ទាម Houthi ដែលគាំទ្រដោយអ៊ីរ៉ង់ ។ យ៉ាងណាមិញ ពួកក្រុមឧទ្ទាម Houthi បានទាត់ចោលការទទួលខុសត្រូវចំពោះការវាយប្រហារ។
គួររំឮកផងដែរថា ក្នុងខែសីហា ឆ្នាំ២០១៩ មនុស្ស ៣៦នាក់ ត្រូវបានសម្លាប់ក្នុងហេតុការណ៍វាយប្រហារដោយបាញ់មីស៊ីលលើក្បួនយោធាមួយក្នុងទីក្រុង Aden នេះដែរ។
ប្រេសិតពិសេសរបស់អង្គការសហប្រជាជាតិប្រចាំយេម៉ែន Martin Griffiths បានថ្កោលទោសចំពោះការវាយប្រហារនេះថា ការសកម្មភាពហិង្សាដែលពុំអាចទទួលបានឡើយ។ លោកនិយាយក្នុងបណ្ដាញសង្គម Twitter ថា ការវាយប្រហារនេះ ជាការក្រើនរំឭកដ៏ខ្លោចផ្សាមួយអំពីសារសំខាននៃការនាំយកយេម៉ែនជាបន្ទាន់ត្រលប់ឆ្ពោះទៅរកមាគ៌ាសុខសន្តិភាពវិញ។
រដ្ឋាភិបាលថ្មីយេម៉ែន បានស្បថចូលកាន់តំណែងកាលពីថ្ងៃទី ១៨ ខែធ្នូ ដោយប្រធានាធិបតី Abd Rabbu Mansour Hadi ដែលស្ថិតជាផ្នែកមួយនៃកិច្ចព្រមព្រៀងចែកអំណាចគ្នាមួយ ដែលជ្រោមជ្រែងដោយអារ៉ាប៊ីសាអូឌីត ក្នុងឆ្នាំ២០១៩។ ដឹកនាំនាយករដ្ឋមន្ត្រី Abdulmalik រដ្ឋាភិបាលថ្មី តំណាងឲ្យភាគខាងជើងនៃប្រទេសយេម៉ែន និងតំបន់ផ្នែកខាងត្បូង ដោយមានចំណែកស្មើរគ្នាៗទៅតាមតំបន់រៀងៗខ្លួន។
រដ្ឋាភិបាលថ្មី ជាលទ្ធផលនៃការស្រុះស្រួលគ្នារវាងក្រុមផ្ដាច់ខ្លួនគាំទ្រដោយអេមីរ៉ាតអារ៉ាប់រួមក្នុងក្រុមប្រឹក្សាអន្តរកាលភាគខាងត្បូង និងក្រុមស្មោះស្ម័គ្ររបស់ប្រធានាធិបតី Hadi ដែលគាំទ្រដោយរដ្ឋាភិបាលអារ៉ាប៊ីសាអូឌីត។ លោកប្រធានាធិបតី Hadi រស់នៅក្នុងរដ្ឋធានី រីយ៉ាដ របស់អារ៉ាប៊ីសាអូឌីត ចាប់តាំងពីទីក្រុង សាណា បានធ្លាក់ចូលក្នុងដៃរបស់ក្រុមឧទ្ទាម Houthis ។
យេម៉ែន ដែលជាប្រទេសក្រីបំផុតក្នុងពិភពអារ៉ាប់ បានផុងខ្លួនក្នុងសង្គ្រាមស៊ីវិល ចាប់តាំងពីឆ្នាំ២០១៤មក នៅពេលក្រុមឧទ្ទាម Houthis បានដណ្ដើមយកបានតំបន់ភាគខាងជើងនៃប្រទេស និងរដ្ឋធានីសាណា។ ច្រើនឆ្នាំក្រោយមក កងយោធាចម្រុះ ដឹកនាំដោយអារ៉ាប៊ីសាអូឌីត បានចូលធ្វើអន្តរាគមន៍វាយបំបែកក្រុមឧទ្ទាម Houthis និងស្ដារអំណាចរដ្ឋាភិបាលលោកប្រធានាធិបតី Hadi មកវិញ ។ សង្គ្រាមនេះ បានសម្លាប់មនុស្សជាង១១២ ០០០នាក់ រួមទាំងជនស៊ីវិលរាប់ពាន់នាកផងដែរ ហើយជម្លោះនេះក៏បង្កឲ្យកើតមានវិបត្តិមនុស្សធម៌អាក្រក់បំផុតលើពិភពលោកផងដែរ៕