ឥណ្ឌូណេស៊ី ទទួលបានវ៉ាក់សាំងប្រឆាំងកូវីដ-១៩ ជើងទី២ពីក្រុមហ៊ុនចិន Sinovac នៅថ្ងៃទី៣១ ខែធ្នូ ។ រដ្ឋាភិបាលសុខាភិបាលឥណ្ឌូណេស៊ី បានបញ្ជាក់បែបនេះ ខណៈប្រទេសដែលមានប្រជាជនច្រើនលំដាប់លេខ៤លើពិភពលោកមួយនេះ ត្រៀមចាប់ផ្ដើមកម្មវិធីចាក់វ៉ាក់សាំងប្រឆាំងកូវីដ-១៩ ទ្រង់ទ្រាយធំ។
រដ្ឋាភិបាលឥណ្ឌូណេស៊ី បានទទួលការដឹកជញ្ជូនវ៉ាក់សាំងរបស់ក្រុមហ៊ុនចិន Sinovac ចំនួន ១,៨លានដូស ដោយបន្ថែមពីលើវ៉ាក់សាំងចំនួន ១,២លានដូសដែលខ្លួនទទួលបានពីចិនដូចគ្នា កាលពីថ្ងៃទី៦ ខែធ្នូ។ គោលដៅរបស់រដ្ឋាភិបាលក្រុងហ្សាការតា គឺចាក់វ៉ាក់សាំងប្រឆាំងកូវីដ-១៩ដល់ពលរដ្ឋទាំង២៦៧លាននាក់របស់ខ្លួនដោយឥតគិតថ្លៃ ដោយចាប់ផ្ដើមជាមួយបុគ្គលិកសុខាភិបាលជួរមុខ។
«មុនពេលប្រជាជនត្រលប់ចូលធ្វើការវិញ ក្នុងខែមករា វ៉ាក់សាំង អាចត្រូវចែកចាយទៅកាន់ខេត្តទាំង៣៤របស់ឥណ្ឌូណេស៊ី ដូច្នេះយើងអាចចាប់ផ្ដើមកម្មវិធីចាក់វ៉ាក់សាំងសម្រាប់បុគ្គលិកសុខាភិបាលបាន»។ រដ្ឋមន្ត្រីសុខាភិបាលឥណ្ឌូណេស៊ី លោក Budi Gunadi Sadikin បញ្ជាក់បែបនេះក្នុងទូរទស្សន៍ផ្សាយផ្ទាល់មួយ មុននឹងបន្ថែមថា កម្មវិធីចាក់វ៉ាក់សាំងនេះ នឹងចាយពេលជាង១២ខែ។
ប្រទេសក្នុងតំបន់អាស៊ីអាគ្នេយ៍មួយនេះ រំពឹងទទួលបានវ៉ាក់សាំងប្រឆាំងជំងឺកូវីដ-១៩ ថែមទៀតពីក្រុមហ៊ុនអង់គ្លេស AstraZeneca និងក្រុមហ៊ុនអាមេរិក Pfizer អំឡុងសប្ដាហ៍ដំបូងនៃខែមករា ឆ្នាំ២០២១ ក្រោយបានយល់ព្រមទិញវ៉ាក់សាំង១០០លានដូសពីក្រុមហ៊ុនទាំងពីរនេះ។
មកទល់ពេលនេះ ឥណ្ឌូណេស៊ី នៅរង់ចាំទទួលការអនុញ្ញាតឲ្យចាប់ផ្ដើមប្រើប្រាស់វ៉ាក់សាំងរបស់ក្រុមហ៊ុន Sinovac។ ក្រុមអ្នកស្រាវជ្រាវតួកគី កាលពីសប្ដាហ៍មុន បញ្ជាក់ថា វ៉ាក់សាំងរបស់ក្រុមហ៊ុន Sinovac មានប្រសិទ្ធភាពរហូតដល់ ៩១,២៥ភាគយ ប្រឆាំងកូវីដ-១៩ ដោយផ្អែកលើការវិភាគបឋមមួយ ខណៈអ្នកស្រាវស្រាវប្រេស៊ីល អះអាងថា ប្រសិទ្ធភាពនៃវ៉ាក់សាំងគឺចន្លោះពី ៥០ និង ៩០ភាគរយ។
បច្ចុប្បន្ន ឥណ្ឌូណេស៊ី បានសម្រេចកិច្ចព្រមព្រៀងទិញវ៉ាក់សាំងកូវីដ-១៩សរុប ៣២៩លានដូសហើយ ក្នុងនោះ ១២៥លានដូសពីក្រុមហ៊ុន Sinovac ៥០លានដូសពីក្រុមហ៊ុនអាមេរិក Novavax និង៥៤លានដូសពីកម្មវិធីវ៉ាក់សាំងសកលរបស់អង្គការសុខភាពពិភពលោក ហៅថា COVAX។
គិតត្រឹមថ្ងៃទី ៣១ ខែធ្នូ ប្រទេសឥណ្ឌូណេស៊ី រកឃើញករណីឆ្លងកូវីដ-១៩សរុប ៧២៧ ០០០ករណី និងស្លាប់ ២១ ៧០០នាក់ ដែលជាតួលេខខ្ពស់បំផុតមួយក្នុងចំណោមប្រទេសអាស៊ីផ្សេងទៀត។ កាលពីដើមសប្ដាហ៍នេះ រដ្ឋាភិបាលឥណ្ឌូណេស៊ី ក៏ប្រកាសបិទព្រំដែនខ្លួនសម្រាប់អ្នកធ្វើដំណើរបរទេសពីជុំវិញពិភពលោក សម្រាប់២សប្ដាហ៍ដំបូងនៃឆ្នាំ២០២១ផងដែរ។
ចំណាត់ការនេះ ធ្វើឡើងក្រោយមានកង្វល់ពាក់ព័ន្ធនឹងការរកឃើញកូវីដ-១៩ ទម្រង់ថ្មី ដែលរីករាលដាលក្នុងចក្រភពអង់គ្លេសកាលពីពេលថ្មីៗនេះ។ ក្រៅពីអង់គ្លេស កូវីដ-១៩ ទម្រង់ថ្មីនេះ ក៏បានរកឃើញក្នុងប្រទេសអឺរ៉ុបមួយចំនួន និងនៅកាណាដា ជប៉ុន អូស្ត្រាលី និងសិង្ហបុរីដែរ៕