ម្ចាស់ការពារជើងឯក Liverpool ភ្លាត់ស្នៀតចាញ់ Southampton ១-០ ក្នុងការប្រកួត Premier League ។ ក្រោយកញ្ចែបញ្ចប់ការប្រកួត លោក Ralph Hasenhuettl បានអង្គុយលុតជង្គង់លើស្មៅ រលេងរលោងទឹកភ្នែក ជាមួយនឹងជ័យជម្នះក្រុមកំពូលតារាង។
ក្នុងការប្រកួតសប្តាហ៍ទី១៧ នៅរាត្រីថ្ងៃទី៤ ខែមករា ឆ្នាំ២០២១ ខ្សែប្រយុទ្ធ Danny Ings ដែលជាអតីតកីឡាកររបស់ហង្សក្រហមជានាក់សម្រេចទីគ្រាប់បាល់ជ័យជម្នះនេះឲ្យក្រុមម្ចាស់ផ្ទះ Southampton នៅនាទីទី២ តាមរយៈការបញ្ជូនរបស់ James Ward-Prowse។
នេះជាការបង្កើតប្រវត្តិសាស្ត្រថ្មីរបស់ក្រុមលោក Ralph Hasenhuettl ក្នុងក្របខណ្ឌលីគកំពូលអង់គ្លេស ដ្បិត Southampton បានក្លាយជាក្រុមដំបូងគេដែលអាយកឈ្នះម្ចាស់ការពារជើងឯកទាំង៧ក្រុម។
ក្រុមម្ចាស់ជើងឯក Premier League ទាំង៧ដែល Southampton បានផ្តួលរួមមាន Liverpool, Manchester United, Manchester City, Blackburn Rovers, Leicester City, Chelsea និង Arsenal បន្ទាប់ពីពួកគេបានឈ្នះពានរួច។ ជ័យជម្នះនេះ បានជួយ Southampton ឡើងទៅចំណាត់ថ្នាក់ទី៦ ដោយរកបាន២៩ពីន្ទុ ពីការប្រកួត១៧លើក។
បរាជ័យនេះ ត្រូវមើលឃើញថា ជាការបើកផ្លូវឲ្យ Manchester United មានឱកាសឡើងទៅកាន់កំពូលតារាង ដោយសារមាន១ប្រកួតក្នុងដៃ ខណៈ Manchester City ក៏មានពិន្ទុយ៉ាងប្រកៀកជាមួយនឹង២ប្រកួតក្នុងដៃផងដែរ។
សម្រាប់ក្រុមរបស់លោក Jurgen Klopp វិញ នេះជាបរាជ័យលើកទី២នៅរដូវកាលនេះ។ ឆ្លងការការប្រកួត១៧លើក Liverpool ឈរកំពូលតារាងលីគកំពូលអង់គ្លេស រកបាន៣៣ពិន្ទុ ស្មើគ្នាជាមួយក្រុមលោក Ole Gunnar Solskjaer ដែលទើបប្រកួតបាន១៦លើកប៉ុណ្ណោះ។ ប្រសិនបើបិសាចក្រហមអាចឈ្នះ ឬស្មើនៅជំនួបទី១៧ នោះពួកគេនឹងឡើងទៅឈរកំពូលតារាងវិញ។
Man Utd បានខកខានលើកពាន Premier League ៧រដូវកាលមកហើយ ពោលគឺចាប់តាំងពីលោក Sir Alex Ferguson បញ្ចប់តំណែងលោកជាអ្នកចាត់ការទូទៅនៅរដូវកាល ២០១២-១៣ ម្លេះ។ ប្រសិនបើលោក Solskjaer អាចជួយម្ចាស់ជើងឯក២០សម័យលើកពានរដូវកាលនេះមែន នោះតំណែងអ្នកចាត់ការទូទៅរបស់លោកនឹងមិនត្រូវបានផ្លាស់ប្តូរឡើយ។
ជ័យជម្នះដំបូងក្នុងការប្រកួត៥លើកនៅ Premier League នាំឲ្យ Southampton ឡើងឈរលេខ៦ ហើយលោក Ralph Hasenhuttl បានលុតជង្គង់អបអរជ័យជម្នះលើក្រុមលោក Klopp ជាលើកដំបូង។
គ្រូបង្វឹក Southampton រូបនេះ បានបញ្ជាក់ប្រាប់ BBC Sport ថា៖ «មានទឹកភ្នែកនៅក្នុងភ្នែករបស់ខ្ញុំ ដោយសារខ្យល់! ពិតណាស់នៅពេលអ្នកឃើញ កីឡាករប្រឹងប្រែងគ្រប់បែបយ៉ាង វាពិតជាធ្វើឲ្យខ្ញុំមានមោទកភាពខ្លាំងណាស់»។
លោកបានបន្ថែមថា វាជាការប្រកួតដ៏តឹងតែងមួយ ដោយសំឡេងរបស់លោកស្ទើរតែភ្លាត់ម្តងៗ ខណៈកីឡាករមានការនឿយហត់យ៉ាងខ្លាំង។ «យើងបានឈ្នះក្រុមដ៏ខ្លាំងបែបនេះ កីឡាករមានជំនឿលើអ្វីដែលខ្លួនបានធ្វើ។ វាជារាត្រីដ៏ល្អឥតខ្ចោះ»៕