ជាតិ
កម្ពុជានាំចេញផលិតផលជលផល ជាង៣៥០០តោនកាលពីឆ្នាំ២០២០ រូបភាពពីហ្វេសប៊ុកលោក វេង សាខុន
× ភ្នំពេញ៖ ក្នុងរយៈពេលពេញមួយឆ្នាំ២០២០ កម្ពុជាបាននាំចេញផលិតផលជលផល ចំនួន ៣, ៥៩០តោន គិតជាទឹកប្រាក់មានចំនួន ៨,៣៣៤,០០០ ដុល្លារអាមេរិក។ នេះបើតាមរបាយការណ៍ការនាំចេញផលិតកម្មកសិកម្ម ក្នុងឆ្នាំ២០២០ ដែលផ្សព្វផ្សាយដោយ លោក វេង សាខុន រដ្ឋមន្ត្រីក្រសួងកសិកម្ម។
តាមរបាយការណ៍ដដែល នៅក្នុងឆ្នាំ២០២០កន្លងទៅនេះ កម្ពុជាផលិតបានផលិតផលជលផលចំនួន ៩៣៦,៣០០ តោនក្នុងនោះមានផលិតផលទឹកសាប ជាង៤១ម៉ឺនផលិតផលសមុទ្រ ជាង១២ម៉ឺនតោន និងផលវារីវប្បកម្មជាង ៤០ម៉ឺនតោន។
តម្លៃសរុបនៃផលិតផលនេសាទ មានចំនួន១,៨៧២.៦លានដុល្លារ ក្នុងនោះ តម្លៃនៃផលិតផលទឹកសាប និងសមុទ្រ មានចំនួន ១,០៧១. ៨លាន ដុល្លារ និងតម្លៃសរុបនៃផលិតផលវារីវប្បកម្ម ចំនួន ៨០០.៨លានដុល្លារ។ នេះបើតាមរបាយការណ៍ដដែល។
ក្រៅពីផលិតផលជលផល ក្នុងវិបត្តិកូវីដ-១៩ កម្ពុជាក៏បាននាំចេញ ផលិតកម្មសត្វ រួមមានគោក្របី ជ្រូក បក្សី និងស៊ុតមាន់ទា មានតម្លៃសរុប ជាង ១,៨ពាន់លានដុល្លារ ខណៈនាំចេញក្នុងផ្នែកនេះ មានទឹកប្រាក់ជាង ៦១,៣លានដុល្លារផងដែរ៕
© រក្សាសិទ្ធិដោយ thmeythmey.com