ព្រឹត្តិការណ៍ថ្មើរជើងប្រវត្តិសាស្ត្រ ទៅឧត្តរមានជ័យ ជាប់ព្រំដែនថៃ ត្រូវបានផ្អាក ព្រោះកូវីដ-១៩

កីឡាជាតិ

ជាតិ

ព្រឹត្តិការណ៍ថ្មើរជើងប្រវត្តិសាស្ត្រ ទៅឧត្តរមានជ័យ ជាប់ព្រំដែនថៃ ត្រូវបានផ្អាក ព្រោះកូវីដ-១៩

06, Jan 2021 , 9:45 am

រូបភាព

ដោយ:

ព្រឹត្តិការណ៍ថ្មើរជើងប្រវត្តិសាស្ត្រនៅស្រុកអន្លង់វែង ខេត្តឧត្តរមានជ័យ ដែលជាទីតាំងចុងក្រោយ នៃការបញ្ចប់សង្គ្រាមស៊ីវិលក្នុងរបបខ្មែរក្រហម ត្រូវបានផ្អាកការរៀបចំ ដោយសារស្ថានភាពជំងឹកូវីដ-១៩ តាមបណ្តោយព្រំដែនកម្ពុជា-ថៃ នៅបន្តគំរាមកំហែង។ ការត្រៀមខ្លួនមិនទាន់ ក៏ជាហេតុផលមួយដែរ។នេះបើតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។

ការកើនឡើងនៃចំនួនអ្នកឆ្លងជំងឺកូវីដ-១៩ នៅប្រទេសថៃ បានធ្វើឲ្យកម្ពុជា សម្រេចផ្អាកការរៀបចំព្រឹត្តិការណ៍ថ្មើរជើងប្រវត្តិសាស្ត្រនៅស្រុកអន្លង់វែង ខេត្តឧត្តរមានជ័យនៅឆ្នាំនេះ។ អន្លង់វែងជាស្រុកមួយមានទីតាំងនៅជាប់ប្រទេសថៃ ដែលមានច្រកអន្តរជាតិជាំជាទីប្រសព្វ និងជាកន្លែងចេញចូលរវាងប្រជាជនកម្ពុជា និងថៃ។

អត្ថបទទាក់ទង

ព្រឹត្តិការណ៍ថ្មើរជើងប្រវត្តិសាស្ត្រ រួមចំណែកព្យាបាលរបួសផ្លូវចិត្តពលរដ្ឋ នៅស្រុកអន្លង់វែង

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជានៅថ្ងៃទី៥ មករា ឆ្នាំ២០២០ បាននិយាយដូច្នេះថា៖«ឆ្នាំនេះយើងមិនអាចធ្វើបានទេ ដោយសារសភាពការតាមព្រំដែនមិនសូវល្អ ពាក់ព័ន្ធការឆ្លងរីករាលនៃជំងឺកូវីដ-១៩ ដូច្នេះយើងត្រូវលើកពេលទៅរៀបចំនៅឆ្នាំក្រោយ ដោយសារយើងមិនអាចត្រៀមខ្លួនកើត និងសភាពការមិនអំណោយផល»។

ព្រឹត្តិការណ៍ថ្មើរជើងប្រវត្តិសាស្ត្រ ត្រូវបានបង្កើតឡើងក្រោមកិច្ចសហការរវាងក្រសួងទេសចរណ៍ គណៈកម្មាធិការជាតិអឡាំពិកកម្ពុជា(NOCC) ជាមួយរដ្ឋបាលខេត្តឧត្តរមានជ័យ និងភាគីថៃ។ កម្មវិធីមួយចំនួនក្នុងព្រឹត្តិការណ៍នេះ ទាមទារឲ្យមានការចូលរួមពីប្រជាជនថៃរស់ក្នុងស្រុកជាប់ស្រុកអន្លង់វែង។ កត្តានេះហើយ ទើបធ្វើឲ្យព្រឹត្តិការណ៍ទេសចរណ៍មួយនេះ មិនអាចដំណើរការបាន។

គិតត្រឹមថ្ងៃទី៥ ខែមករា ឆ្នាំ២០២១ ថៃមានអ្នកឆ្លងជំងឺកូវីដ-១៩ ជិត៩ពាន់នាក់ ក្នុងនោះស្លាប់ចំនួន៦៥នាក់។ ដោយឡែកនៅថ្ងៃនេះ ប្រទេសជិតខាងកម្ពុជាមួយនេះ មានអ្នកឆ្លងជំងឺកូវីដ-១៩ ថ្មីជាង៥រយនាក់។

ការឆ្លងរីករាលនៃជំងឺកូវីដ-១៩ ក្នុងសហគមន៍នៅកម្ពុជា ដែលសម្តេច ហ៊ុន សែន បានប្រកាសបិទបញ្ចប់កាលពីថ្ងៃទី២៩ ខែធ្នូ ឆ្នាំ២០២០ ក៏ជាកត្តារួមចំណែកក្នុងការផ្អាកនេះដែរ ដ្បិតវាបានធ្វើឲ្យគណៈកម្មការរៀបចំព្រឹត្តិការណ៍ខាងលើ ពុំមានពេលវេលាគ្រប់គ្រាន់ក្នុងការរៀបចំ។ បើតាមលោក វ៉ាត់ ចំរើន គណៈកម្មការរៀបចំត្រូវការពេលវេលាយ៉ាងតិចពីរទៅបីខែ ក្នុងការត្រៀមលក្ខណៈរៀបចំឲ្យបានគ្រប់ជ្រុងជ្រោយ និងប្រកបដោយសុវត្ថិភាព។

ព្រឹត្តិការណ៍ថ្មើរជើងប្រវត្តិសាស្ត្ររៀបចំឡើងក្នុងគោលបំណងផ្សព្វផ្សាយ និងទាក់ទាញភ្ញៀវទេសចរណ៍ជាតិនិងអន្តរជាតិឲ្យមកទស្សនាតំបន់ទេសចរណ៍ប្រវត្តិសាស្ត្រនៅក្នុងស្រុកអន្លង់វែង ដែលជាទីតាំងចុងក្រោយ នៃការបញ្ចប់សង្គ្រាមស៊ីវិលក្នុងរបបខ្មែរក្រហម។ ព្រឹត្តិការណ៍នេះ ក៏ធ្វើឡើងដើម្បីអបអរខួបនៃការទទួលបានសន្តិភាពពេញលេញក្នុងឆ្នាំ១៩៩៨ ផងដែរ។

ការរឹតចំណងសាមគ្គីភាពរវាងប្រជាជនកម្ពុជា-ថៃ និងបង្កើតឲ្យភាពអ៊ូអរក្នុងតំបន់រ៉ាំរ៉ៃដោយសង្គ្រាមស៊ីវិលមួយនេះ ក៏ស្ថិតក្នុងគោលបំណងនៃការរៀបចំព្រឹត្តិការណ៍នេះដែរ។ លើសពីនេះ គឺដើម្បីផ្តល់ទំនុកចិត្តផ្នែកសន្តិភាព និងបន្សាបភាពភ័យខ្លាចរបស់ ប្រជាពលរដ្ឋ ដែលដិបដាមជាមួយរបបខ្មែរក្រហម។ ប្រជាពលរដ្ឋប្រមាណ៧០ទៅ៨០ភាគរយក្នុងស្រុកអន្លង់វែង ជាអតីតកម្មាភិបាលក្នុងរបបកម្ពុជាប្រជាធិបតេយ្យ៕