កីឡាអន្តរជាតិ
អន្តរជាតិ
Man Utd បញ្ចប់ការទិញ Diallo ពី Atalanta តម្លៃ៥០លានដុល្លារ និងជាកីឡាករដំបូងក្រោយ Brexit
× Manchester United បញ្ចប់កិច្ចព្រមព្រៀងទិញយកខ្សែបម្រើស្លាប Amad Diallo ពីក្លិបអ៊ីតាលី Atalanta ដោយជោគជ័យហើយក្នុងតម្លៃបូកបន្ថែមលក្ខខណ្ឌផ្សេងៗកើនដល់ ៣៧លានផោន (៥០លានដុល្លារអាមេរិក)។ Diallo ក្លាយជាកីឡាករដំបូងបំផុតដែលផ្លាស់ទៅអង់គ្លេស ក្រោយអង់គ្លេសចាកចេញពីអឺរ៉ុប (Brexit)។
បើតាមការផ្សាយរបស់វេបសាយផ្លូវការរបស់ Man Utd កីឡាករសញ្ជាតិកូដឌីវ័រ វ័យ ១៨ ឆ្នាំរូបនេះ យល់ព្រមចុះកិច្ចសន្យាឲ្យក្រុមបិសាចក្រហមរហូតដល់ខែមិថុនា ឆ្នាំ២០២៥ ជាមួយនឹងជម្រើសពន្យារកិច្ចសន្យាបន្ថែមទៀត។ Man Utd បានព្រមព្រៀងគ្នាជាមួយ Atalanta ក្នុងការទិញយក Diallo តាំងពីខែតុលាម្លេះ។
ក្រោយការផ្ទេរជោគជ័យ Diallo នឹងធ្វើដំណើរទៅកាន់ទឹកដី Old Trafford ដើម្បីចូលរួមជួយក្រុមលោក Ole Gunnar Solskjaer ក្នុងអំឡុងខែមករានេះតែម្តង។
Solskjaer អ្នកចាត់ការទូទៅបិសាចក្រហមបានបង្ហាញការរីករាយក្នុងមកដល់របស់ខ្សែបម្រើស្លាបដ៏មានទេពកោសល្យរូបនេះ។ អ្នកចាត់ការសញ្ជាតិន័រវែសអះអាងថា៖« តាមការសង្កេតមើលដោយភ្នែកខ្ញុំផ្ទាល់ ខ្ញុំជឿជាក់ថា Diallo ជាយុវជនវ័យក្មេងម្នាក់ពូកែ និងគួរឲ្យចាប់អារម្មណ៍បំផុតនៅក្នុងការប្រកួតកន្លងមក។ គាត់ជាកីឡាករម្នាក់ដែលមានគុណសម្បត្ដិ និងជាកីឡាករសំខាន់សម្រាប់ក្រុមបិសាចក្រហម Manchester United នៅឆ្នាំថ្មីនេះ»។
Man Utd ត្រូវការ Diallo មកពង្រឹងនៅតំបន់ស្លាបបន្ថែម ដ្បិតត្រូវមានភារកិច្ចសំខាន់ក្នុងការប្រជែងពានលីគកំពូលអង់គ្លេសរដូវកាលនេះ ខណៈពួកគេកំពុងនាំមុខក្នុងតារាងពិន្ទុ ព្រមទាំងដណ្តើមពានក្របខណ្ឌទីពីរអឺរ៉ុប UEFA Europa League ផង។
Diallo ជាកីឡាករដំបូងគេដែល Man Utd ទទួលបាននៅដើមឆ្នាំថ្មី អំឡុងទីផ្សារដោះដូរខែមករានេះ និងជាកីឡាករដំបូងបំផុតដែលចូលទៅកាន់ទឹកដីអង់គ្លេសក្រោយការចាកចេញពីអឺរ៉ុប (Brexit)។ ក្រោយ Brexit ក្លិបនៅ Premier League ទាំងអស់នឹងមិនអនុញ្ញាតឲ្យទិញកីឡាករពីបណ្តាប្រទេសសហភាពអឺរ៉ុប (EU) ដោយគ្មានលិខិតអនុញ្ញាតការងារ (GBE) ដូចមុនទៀតឡើយ។ កីឡាករបរទេសក្រោមអាយុ១៨ឆ្នាំក៏មិនអាចទិញចូលដែរ ក្រោមបទប្បញ្ញត្តិ ក្រោយអង់គ្លេសចាកចេញពីអឺរ៉ុប៕
Tag:
Amad Diallo
Manchester United
Brexit
© រក្សាសិទ្ធិដោយ thmeythmey.com