ពីនេះ ពីនោះ
សុខភាព
ជួយចែករំលែក! ចង់ទប់ស្កាត់ “ជំងឺរលាកសន្លាក់ហ្គោដ” គួរចៀសវាងទទួលទានអ្វីខ្លះ?
×![]()
ដោយ: សារព័ត៌មានថ្មីៗ
រលាកសន្លាក់ហ្គោដ (Gout) គឺជាបញ្ហានៃស្ថានភាពសុខភាពមួយដែលបណ្ដាលមកពីការកើនឡើងនូវជាតិអាស៊ីតអ៊ុយរិកច្រើនលើសក្នុងឈាមហើយមានទំនាក់ទំនងទៅនឹងការរលាកសន្លាក់ឆ្អឹងខ្ចី។ ជាតិអាស៊ីតអ៊ុយរិកច្រើនហួសអាចបង្កើតគ្រីស្តាល់ដូចម្ជុលនៅក្នុងសន្លាក់ដែលបង្កឱ្យមានការហើម ឡើងក្រហម និងឈឺចាប់ក្នុងសន្លាក់។ របបអាហារដើរតួនាទីយ៉ាងសំខាន់ក្នុងការព្យាលនិងទប់ស្កាត់បញ្ហានៃជំងឺរលាកសន្លាក់ហ្គោដ (gout) ដែលជាទម្រង់មួយនៃជំងឺរលាកសន្លាក់ឆ្អឹង។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារ ព្រមទាំងភេសជ្ជៈដែលគួរចៀសវាងប្រសិនបើចង់ទប់ស្កាត់ជំងឺជំងឺសន្លាក់ហោ្គដ ឬបញ្ហាអាស៊ីតអ៊ុយរិកឡើងខ្ពស់ ៖
១. គ្រឿងស្រវឹង
មួយក្នុងចំណោមអាហារនិងភេសជ្ជៈផ្សេងៗដែលអ្នកគួរកម្រិត ឬបញ្ឈប់ការទទួលទានតែម្ដងដើម្បីទប់ស្កាត់ជំងឺរលាកសន្លាក់ហ្គោដនោះ គឺគ្រឿងស្រវឹង។ ការទទួលទានគ្រឿងស្រវឹងញឹកញាប់លើសកម្រិតអាចបង្កើនហានិភ័យនៃបញ្ហារលាកសន្លាក់ហ្គោដគួរឱ្យបារម្ភ។ នេះក៏ព្រោះតែជាតិអាល់កុលអាចបង្កើនកម្រិតនៃអាស៊ីតអ៊ុយរិក។
២. អាហារមានផ្ទុកសារធាតុ purines
ការទទួលទានអាហារសម្បូរទៅដោយសារធាតុ purines ដូចជាសាច់ក្រហម និងគ្រឿងសមុទ្រលើសកម្រិតក៏អាចបង្ករោគសញ្ញានៃជំងឺរលាកសន្លាក់ហ្គោដផងដែរ។ នេះក៏ព្រោះតែបំរែបំរួលសារធាតុ purines ទៅជាអាស៊ីតអ៊ុយរិក។ ដូច្នេះដើម្បីជាការប្រសើរ ចូរកម្រិតការទទួលទានសាច់និងប្រភេទនៃអាហារសមុទ្រមួយចំនួនដែលមានផ្ទុកសារធាតុ purines។ គួរបញ្ជាក់ផងដែរថា អាហារសមុទ្រខ្លះមានផ្ទុកជាតិ purine ខ្ពស់ជាងផ្សេងទៀត។ ប្រភេទនៃអាហារសមុទ្រដែលអ្នកជំងឺរលាកសន្លាក់ហ្គោដគួរជៀសឲ្យផុតនោះមានដូចជា ត្រី codfish ត្រី anchovies ត្រី herring ត្រីសាឌីន ពងត្រី និងត្រី trout។ អ្នកជំងឺរលាកសន្លាក់ហ្គោដអាចទទួលទានអាហារសមុទ្រដូចជាក្ដាម អយស្ទ័រ បង្កង បង្គាបានប៉ុន្តែមានកម្រិតមិនគួរទទួលទានច្រើនពេកទេ ក៏ព្រោះអាហារទាំងនេះក៏មានផ្ទុកជាតិ purine ដែរគ្រាន់តែតិច។
៣. សាច់គ្រឿងក្នុង
សាច់គ្រឿងក្នុងក៏មានផ្ទុកបរិមាណនៃសារធាតុ purines ខ្ពស់ផងដែរ។ ប្រសិនបើអ្នកកំពុងជួបប្រទះបញ្ហានៃជំងឺរលាកសន្លាក់ហ្គោដនោះ ចូរចៀសវាងទទួលទានថ្លើម បេះដូង ខួរ ក្រលៀន និងពោះវៀន។
៤. ភេសជ្ជៈនិងអាហារមានផ្ទុកជាតិស្ករខ្ពស់
របបអាហារដែលមានផ្ទុកជាតិស្ករខ្ពស់អាចជះផលប៉ះពាល់ដល់ជំងឺរលាកសន្លាក់ហ្គោដគួរឱ្យកត់សម្គាល់។ ជាតិស្ករ fructose និងគ្លុយកូសខ្ពស់អាចជះឥទ្ធិពលដល់ថ្លើម ហើយការទទួលទានអាហារ ឬភេសជ្ជៈមានផ្ទុកជាតិស្ករ Fructose ខ្ពស់ផ្សារភ្ជាប់នឹងបញ្ហានៃជំងឺរលាកសន្លាក់ហ្គោដ។
សម្គាល់! មូលហេតុដែលបង្កជំងឺរលាកសន្លាក់ហ្គោដ គឺមិនមែនគ្រាន់តែការទទួលទានខុស ឬរបបអាហារប៉ុណ្ណោះទេ។ ខណៈដែលវាពិតជាសំខាន់ក្នុងការរក្សាបាននូវរបបអាហារត្រឹមត្រូវមួយដើម្បីកាត់បន្ថយហានិភ័យនៃជំងឺរលាកសន្លាក់ហ្គោដមិនឱ្យកើតមានឡើង ឬធ្វើទុក្ខ ប៉ុន្តែកត្តាផ្សេងទៀតដូចជាកង្វះសកម្មភាពរាងកាយដោយមិនធ្វើលំហាត់ប្រាណ ការគេងមិនដកដង្ហើម (sleep apnea) និងប្រវត្តិគ្រួសារ ឬតំណរពូជក៏អាចបង្កបញ្ហានេះផងដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
