អ្នកអង្គម្ចាស់ នរោត្តម ជេនណា ត្រូវបានតែងតាំងឲ្យធ្វើជាទូតសុច្ឆន្ទៈរបស់សហព័ន្ធកីឡារាំកម្ពុជា។ ព្រះនាង សម្តែងព្រះរាជហឬទ័យសប្បាយរីករាយយ៉ាងខ្លាំង ដែលបានក្លាយជាផ្នែកមួយរបស់សហព័ន្ធ ហើយប្តេជ្ញាថា ព្រះនាង នឹងចូលរួមជាមួយសកម្មភាពផ្សព្វផ្សាយទាំងឡាយរបស់សហព័ន្ធតាមលទ្ធភាព ដែលអាចធ្វើបាន។
ដោយសព្វព្រះរាជហឬទ័យជាមួយវិស័យកីឡារាំ អ្នកអង្គម្ចាស់តូច នរោត្តម ជេនណា បុត្រីរបស់អ្នកអង្គម្ចាស់ នរោត្តម បុប្ផារី និងជាព្រះរាជនត្តារបស់សម្តេចព្រះមហិស្សរា នរោត្តម ចក្រពង្ស បានឯកភាពតាមសំណើររបស់សហព័ន្ធកីឡារាំកម្ពុជា ដែលស្នើសុំឲ្យព្រះនាងធ្វើជាទូតសុច្ឆន្ទៈ ដើម្បីជួយផ្សព្វផ្សាយនិងអភិវឌ្ឍន៍កីឡារាំកម្ពុជា។
នាពិធីបិទការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ២០២០ កាលពីថ្ងៃទី១០ ខែមករា ឆ្នាំ២០២១ អ្នកអង្គម្ចាស់ នរោត្តម ជេនណា មានព្រះរាជបន្ទូលយ៉ាងដូច្នេះថា៖«ពីពេលនេះតទៅខ្ញុំ(ព្រះនាងតូច នរោត្តម ជេនណា) នឹងក្លាយជាទូតសុច្ឆន្ទៈរបស់សហព័ន្ធកីឡារាំកម្ពុជា។ ខ្ញុំនឹងជួយរាល់សកម្មភាពទាំងឡាយ ដែលខ្ញុំអាចធ្វើបាន ដើម្បីឲ្យសហព័ន្ធមួយនេះមានភាពល្បីល្បាញបន្ថែមទៀត»។
ការសម្រេចព្រះរាជហឬទ័យបែបនេះរបស់អ្នកអង្គម្ចាស់ នរោត្តម ជេនណា ធ្វើឡើងក្រោយសហព័ន្ធកីឡារាំកម្ពុជាបានដាក់សំណើរថ្វាយសម្តេចព្រះមហិស្សរា នរោត្តម ចក្រពង្ស ដើម្បីសុំអ្នកអង្គម្ចាស់តូច ឲ្យធ្វើជាទូតសុច្ឆន្ទៈរបស់សហព័ន្ធ។ ជាឆ្លើយតាមសម្តេច នរោត្តម ចក្រពង្ស បានឡាយព្រះហស្តលេខាឯកភាពតាមសំណើររបស់សហព័ន្ធ។
អ្នកអង្គម្ចាស់ នរោត្តម ជេនណា ថតរូបជុំគ្នាជាមួយថ្នាក់ដឹកនាំ និងកីឡាករកីឡាការិនីរាំ ក្រោយចប់ការប្រកួត
អ្នកអង្គម្ចាស់ ជេនណា មានព្រះរាជបន្ទូលថា ព្រះនាងមានរាជហឬទ័យសប្បាយរីករាយយ៉ាងខ្លាំង ដែលបានក្លាយជាចំណែកមួយក្នុងការជួយផ្សព្វផ្សាយ ដើម្បីអភិវឌ្ឍន៍វិស័យកីឡារាំកម្ពុជា ឲ្យកាន់តែមានភាពរីកចម្រើន។ អ្នកអង្គម្ចាស់មានបន្ទូលបន្ថែមថា៖«ក្នុងនាមខ្ញុំផ្ទាល់សូមចូលរួមគាំទ្ររាល់សកម្មភាពកីឡា ដើម្បីមោទកភាពជាតិ។ ជាពិសេសកីឡារាំ ដើម្បីជាការលើកកម្ពស់កីឡានេះឲ្យមានការរីកចម្រើនលូតលាស់ ដូចបណ្តាប្រទេសជឿនលឿនលើសកលលោក»។
បន្ថែមលើការចូលរួមធ្វើជាអធិបតីក្នុងពិធីបិទការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ២០២០ តំណាងសម្តេចព្រះមនិស្សរា នរោត្តម ចក្រពង្ស អ្នកអង្គម្ចាស់ នរោត្តម ជេនណា បានសព្វព្រះហឬទ័យផ្តល់ព្រះរាជកិត្តិយសបំពាក់មេដាយ និងផ្តល់ប្រាក់រង្វាន់លើកទឹកចិត្តដល់ម្ចាស់ជ័យលាភីទៀតផង។
ជាមួយគ្នានេះ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានសព្វព្រះរាជហឫទ័យប្រោសព្រះរាជទានថវិកាចំនួន២ពាន់ដុល្លារ ដើម្បីឧបត្ថម្ភដល់ដំណើរការរៀបចំការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ២០២០ ផងដែរ៕