លោក ស្រី បាន ស្រីមុំ ត្រូវបានព្រះមហាក្សត្រតែងតាំងឱ្យចូលកាន់តំណែង ជាអភិបាលខេត្តប៉ៃលិន នៅថ្ងៃទី១៨ធ្នូ ឆ្នាំ២០២០។ ការមកកាន់តួនាទីថ្មីជាអភិបាលខេត្តរបស់លោកស្រី បាន ស្រីមុំ អស់រយៈពេលជិត១ខែមកនេះ គឺស្ថិតនៅក្នុងស្ថានភាពដែលកម្ពុជាកំពុងជួបវិបត្តិកូវីដ-១៩ ពិសេសនៅក្នុងខេត្តប៉ៃលិនផ្ទាល់ បានរកឃើញវិជ្ជមាននៃជំងឺនេះ ជាបន្តបន្ទាប់នៅលើពលករខ្មែរ ដែលធ្វើដំណើរមកពីប្រទេសថៃ។ ប៉ុន្តែ បញ្ហាកូវីដ-១៩នេះ មិនមែនជាវិញ្ញាសាថ្មីសម្រាប់លោកស្រីបាន ស្រីមុំ ដែលទើបមកកាន់តំណែងជាអភិបាលខេត្តប៉ៃលិន ឡើយ។
លោកស្រី បាន ស្រីមុំ គឺជាស្ត្រីទី២ ដែលបានក្លាយជាអភិបាលខេត្តក្នុងពេលបច្ចុប្បន្ន ខណៈស្ត្រីទី១ គឺជាលោកស្រី មិថុនា ភូថង អភិបាលខេត្តកោះកុង។ ថ្វីដ្បិតទទួលបានតួនាទីថ្មីជាអភិបាលខេត្តប៉ៃលិនក៏ពិតមែន ប៉ុន្តែកិច្ចការងារគ្រប់គ្រងរដ្ឋបាលខេត្តទាំងមូល ដែលគ្របដណ្តប់លើផ្ទៃដីជាង៨០០គីឡូម៉ែត្រការ៉េនេះ មិនមែនជារឿងថ្មី សម្រាប់លោកស្រីបាន ស្រីមុំ ទេ ជាពិសេស គឺកិច្ចការងារទប់ស្កាត់នូវការឆ្លងរាលដាលនៃជំងឺកូវីដ-១៩ តែម្តង។
មុននឹងក្លាយជាអភិខេត្តប៉ៃលិន លោកស្រី បាន ស្រីមុំ គឺជាអតីតតំណាងរាស្ត្រនៅមណ្ឌលប៉ៃលិនមកពីគណបក្សប្រជាជនកម្ពុជា និងជាប្រធានសាខាកាកបាទក្រហមកម្ពុជាខេត្តប៉ៃលិន មកដល់បច្ចុប្បន្ន ក្នុងការដឹកនាំធ្វើកិច្ចការងារផ្សេងៗ ក៏ដូចនឹងកិច្ចការងារឆ្លើយតបឬទប់ស្កាត់នូវការឆ្លងរាលដាលនៃជំងឺកូវីដ-១៩ តាំងពីដើមឆ្នាំ២០២០មកម្ល៉េះ។
កន្លងមកក្នុងនាមជាលោកតំណាងរាស្ត្រក្តី ជាប្រធានសាខាកាកបាទក្រហមកម្ពុជាខេត្តប៉ៃលិនក្តី និងក្រុមយុវជនក្តី លោកស្រីបាន ស្រីមុំ តែងតែចុះណែនាំជាប្រចាំដល់ប្រជាពលរដ្ឋពាក់ព័ន្ធនឹងវិធានបង្ការនៃជំងឺកូវីដ-១៩ រហូតដល់ពលរដ្ឋនៅខេត្តប៉ៃលិនបានយល់ដឹងច្រើន និងមានវិធានការការពារខ្ពស់ពីជំងឺនេះ។
Ralate
«ឥឡូវ បងប្អូនប្រជាពលរដ្ឋខេត្តប៉ៃលិនយើងខ្ញុំ យល់ដឹងច្រើនមែនទែននូវវិធានការសុវត្ថិភាព ពីជំងឺកូវីដ-១៩»។ នេះជាការលើកឡើងរបស់អតីតលោកតំណាងរាស្ត្រនៅមណ្ឌលប៉ៃលិនមកពីគណបក្សប្រជាជនកម្ពុជារូបនេះ ដោយបន្តរៀបរាប់ប្រាប់សារព័ត៌មានថ្មីៗ(ThmeyThmey)ថា ៖«មានបងប្អូនប្រជាពលរដ្ឋយើងចំនួនដែលទៅចំណាកស្រុកធ្វើការនៅប្រទេសថៃ ហើយត្រឡប់មកស្រុកកំណើតវិញ ត្រូវបានឪពុកម្តាយរបស់ពួកគាត់មិនឱ្យចូលផ្ទះទេ ដោយ ឪពុកម្តាយរបស់កូនទាំងនោះ បានទាក់ទងទៅក្រុមគ្រូពេទ្យជំនាញយើងឱ្យយកកូនរបស់ពួកគាត់ធ្វើតេស្តរកកូវីដ-១៩ និងធ្វើចត្តាឡីស័ក»។
លើសពីនេះទៅទៀត លោកស្រីបាន ស្រីមុំ អះអាងថា ពលរដ្ឋខេត្តប៉ៃលិន បានអនុវត្តវិធានការទប់ស្កាត់នឹងជំងឺកូវីដ-១៩ បានយ៉ាងខ្ជាប់ខ្ជួន ដោយពាក់ម៉ាស់ត្រឹមត្រូវជាប្រចាំ លាងដៃ និងរក្សាគម្លាតសុវត្ថិភាព។ «លទ្ធផលទាំងនេះ គឺខ្ញុំសប្បាយចិត្តណាស់ដែលបានឃើញការបញ្ជ្រាបចូលនៃការយល់ដឹងរបស់បងប្អូនប្រជាពលរដ្ឋ ក្នុងការទប់ស្កាត់ការឆ្លងរាលដាលនៃជំងឺកូវីដ-១៩នេះ»។ លោកស្រីបាន ស្រីមុំ ដែលទើបដឹកនាំ ខេត្តប៉ៃលិន បានរយៈពេលជិត១ខែមកនេះ លើកឡើងដូច្នេះ។
ជាមួយគ្នានេះ លោកស្រីបាន ស្រីមុំ នៅបន្តចុះសកម្មភាពពង្រឹងកិច្ចការងារប្រយុទ្ធប្រឆាំងនឹងជំងឺកូវីដ-១៩បន្ថែមទៀត ដើម្បីធានាដល់សុខុមាលភាពពលរដ្ឋរស់នៅខេត្តប៉ៃលិន និងគ្មានការចម្លងមេរោគណាមួយនៅក្នុងសហគមន៍ឡើយ។
គិតត្រឹមថ្ងៃទី១២មករា ក្នុងចំណោមពលករមកពីថៃចំនួន២៧នាក់ ដែលបានឆ្លងជំងឺកូវីដ-១៩ មាន១៣នាក់ នៅរកឃើញនៅខេត្តប៉ៃលិន, ៦នាក់ រកឃើញនៅខេត្តបាត់ដំបង និង៧នាក់ទៀត រកឃើញនៅខេត្តបន្ទាយមានជ័យ។ សម្រាប់ខេត្តប៉ៃលិនផ្ទាល់ ពលករមកពីថៃ ចំនួន១៣នាក់ បានឆ្លងជំងឺកូវីដ-១៩ មាន៦នាក់បាន ជាសះស្បើយពីជំងឺនេះហើយ។ គិតជាសរុប កម្ពុជា មានឆ្លងកូវីដ-១៩ ចំនួន៣៩២នាក់។ ក្នុងនោះ មាន៣៧៦ បានជាសះស្បើយ និង១៨នាក់ទៀតកំពុងព្យាបាលនៅតាមមន្ទីរនានា៕