កីឡាជាតិ
ជាតិ
សន្និបាតការងាររបស់ CAMSOC នឹងក្លាយជាវេទិកាដោះស្រាយបញ្ហាប្រឈម លោក វ៉ាត់ ចំរើន ផ្តល់បទសម្ភាសដល់អ្នកសារព័ត៌មានក្រោយកិច្ចប្រជុំប្រចាំសប្តាហ៍របស់ CAMSOC
× គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣(CAMSOC)នឹងរៀបចំសន្និបាត និងសិក្ខាសាលាថ្នាក់ជាតិ ដើម្បីបូកសរុបការងារប្រចាំឆ្នាំ២០២០ និងដាក់ផែនការអនុវត្តសម្រាប់ឆ្នាំ២០២១។ សន្និតបាតនេះ ក៏ជាឱកាសដើម្បី លើកឡើងពីបញ្ហាប្រឈម និងស្វែងរកដំណោះស្រាយ សម្រាប់គណៈកម្មជំនាញទាំង១៤ នៃ CAMSOC ផងដែរ។
CAMSOC នៅព្រឹកថ្ងៃទី១២ ខែមករា ឆ្នាំ២០២១ បានបន្តរៀបចំកិច្ចប្រជុំគណៈអចិន្ត្រៃយ៍ប្រចាំសប្តាហ៍របស់ខ្លួន ដើម្បីត្រួតពិនិត្យឯកសារផ្សេងៗពាក់ព័ន្ធសមិទ្ធផល និងផែនការយុទ្ធសាស្ត្រ។ ការត្រួតពិនិត្យនេះ គឺធ្វើឡើងក្នុងគោលបំណង ដើម្បីត្រៀមលក្ខណៈឲ្យបានរួចរាល់មុនរៀបចំសន្និបាតប្រចាំឆ្នាំរបស់ខ្លួន។
លោក វ៉ាត់ ចំរើន អគ្គលេខាធិការនៃ CAMSOC បានបញ្ជាក់ថា CAMSOC នឹងរៀបចំសន្និបាតបូកសរុបការងារឆ្នាំ២០២០ និងដាក់ផែនការអនុវត្តសម្រាប់ឆ្នាំ២០២១ នៅថ្ងៃទី១៨ ខែមករា ឆ្នាំ២០២១ ខាងមុខនេះ។ សន្និបាតនេះ នឹងក្លាយជាវេទិកាសម្រាប់គណៈកម្មការជំនាញទាំង១៤នៃ CAMSOC ដើម្បីលើកឡើងពីបញ្ហាប្រឈម និងផែនការយុទ្ធសាស្ត្ររបស់ខ្លួន។ វាក៏ជាឱកាស ដើម្បីស្វែងរកយុទ្ធសាស្ត្រក្នុងការដោះស្រាយបញ្ហាផ្សេងៗផងដែរ។
បើតាមលោក វ៉ាត់ ចំរើន បន្ថែមលើការរៀបចំសន្និបាត CAMSOC នឹងរៀបចំសិក្ខាសាលាថ្នាក់ជាតិមួយបន្ថែមទៀតក្នុងថ្ងៃនោះ ដើម្បីត្រៀមធ្វើយុទ្ធនាការផ្សព្វផ្សាយ និងបញ្ជ្រាបការយល់ដឹងពីព្រឹត្តិការណ៍កីឡាស៊ីហ្គេមដល់ប្រជាពលរដ្ឋនៅតាមរាជធានីខេត្តទាំង២៥។ លោក បានចាត់ទុកសិក្ខាសាលានេះថា ជាយន្តការមួយដ៏សំខាន់ក្នុងដំណើរត្រៀមឆ្ពោះទៅធ្វើជាម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។
សិក្ខាសាលានេះ នឹងមានការធ្វើបទបង្ហាញពីអ្នកជំនាញផ្សេងៗ ពាក់ព័ន្ធបញ្ហាបរិស្ថាន សន្តិសុខ ចរាចរណ៍ គ្រឿងញៀន សណ្តាប់ធ្នាប់សាធារណៈ និងបដិសណ្ឋារកិច្ចជាដើម។ គុណវិបត្តិ និងគុណសម្បត្តិ នៃការធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមក៏នឹងត្រូវបានធ្វើបទបង្ហាញក្នុងសិក្ខាសាលានេះផងដែរ។
លោក វ៉ាត់ ចំរើន រដ្ឋលេខាធិការក្រសួងទេសចរណ៍បានបន្ថែមថា កម្មវិធីសន្និបាតប្រចាំឆ្នាំ និងសិក្ខាសាលាថ្នាក់ជាតិ នឹងកំណត់ចំនួនមនុស្សចូលរួម ពោលគឺមិនឲ្យលើសពី២០០នាក់នោះទេ។ ការកំណត់បែបនេះ គឺដើម្បីរួមចំណែកទប់ស្កាត់ និងបង្ការការឆ្លងរីករាលដាលនៃជំងឺកូវីដ-១៩ ទោះបីបច្ចុប្បន្នស្ថានភាពឆ្លងជំងឺនេះនៅកម្ពុជាមានភាពធូរស្បើយបន្តិចក៏ដោយ។
CAMSOC នឹងធ្វើរបាយការណ៍ផ្សេងៗពាក់ព័ន្ធសកម្មភាពរបស់ខ្លួន ដាក់ជូនក្រុមប្រឹក្សាកីឡាអាស៊ីអាគ្នេយ៍ កីឡាអាស៊ី និងអូឡាំពិកក្រោយចប់សន្និបាតនិងសិក្ខាសាលាថ្នាក់ជាតិ។ ការធ្វើបែបនេះ ក្នុងគោលបំណងដើម្បីស្វែងរកជំនួយគាំទ្រពីស្ថាប័នទាំងនោះ ដើម្បីឈានទៅជោគជ័យពេលកម្ពុជាធ្វើជាម្ចាស់ផ្ទះកីឡាស៊ីហ្គេមជាលើកដំបូងក្នុងប្រវត្តិសាស្ត្រ៕
Tag:
វ៉ាត់ ចំរើន
CAMSOC
© រក្សាសិទ្ធិដោយ thmeythmey.com