ជាតិ
សង្គមជាតិ
លោកស្រី មួរ សុខហួរ ស្នើសុំព្រះមហាក្សត្រអន្តរាគមន៍លើរដ្ឋាភិបាល ឱ្យខ្លួនចូលស្រុកវិញ ដើម្បីតតាំងរឿងក្តី
រូបពីហ្វេសប៊ុកលោកស្រី មួរ សុខហួរ មន្ត្រីជាន់ខ្ពស់អតីតគណបក្សសង្គ្រោះជាតិ ដែលកំពុងនិរទេសខ្លួន រស់នៅអាមេរិក ដោយសារមានបញ្ហាក្តីក្តាំជាមួយរដ្ឋាភិបាល
×![]()
ភ្នំពេញ៖ មន្ត្រីជាន់ខ្ពស់អតីតគណបក្សសង្គ្រោះជាតិ បានស្នើសុំព្រះមហាក្សត្រអន្តរាគមន៍លើរដ្ឋាភិបាល ឱ្យផ្ដល់សុពលភាពលិខិតឆ្លងដែនខ្លួន ដើម្បីអាចចូលស្រុកវិញ ។ សម្រាប់អ្នកវិភាគមើលឃើញថា គណបក្សប្រឆាំងកំពុងលេងនយោបាយ «ហ៊ាន ឬមិនហ៊ាន»ជាមួយរដ្ឋាភិបាល ដើម្បីកុំឱ្យសាធារណជនអស់ជំនឿលើខ្លួនប៉ុណ្ណោះ។
លោកស្រី មួរ សុខហួរ ដែលកំពុងរស់នៅអាមេរិក បានបង្ហាញជំហរចង់ចូលប្រទេសកម្ពុជា ដើម្បីតទាល់ក្តីជាមួយតុលាការ ដែលចោទប្រកាន់លើខ្លួនកន្លងមក។ ប៉ុន្តែបំណងរបស់លោកស្រី មួរ សុខហួរ ត្រូវបានខកចិត្ត ដោយសាររដ្ឋាភិបាល បានបិទសុពលភាពលិខិតឆ្លងដែន។ លោកស្រី សុខហួរ ដែលបានប្រកាសចូលស្រុកវិញនៅថ្ងៃទី១៥ មករានោះ បានស្នើព្រះមហាក្សត្រសុំព្រះរាជអន្តរាគមន៍លើរដ្ឋាភិបាល ឱ្យផ្ដល់សុពលភាពលិខិតឆ្លងដែនខ្លួន ដើម្បីអាចចូលស្រុកវិញ។
មន្ត្រីជាន់ខ្ពស់អតីតគណបក្សសង្គ្រោះជាតិរូបនេះ សរសេរលិខិតចុះពីថ្ងៃទី៥ មករា ថ្វាយព្រះមហាក្សត្រសុំអន្តរាគមន៍លើករណីនេះ ដូច្នេះថា៖«ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់ ដែលជានិមិត្តរូបនៃឯកភាពជាតិ ការផ្សះផ្សាជាតិ និងនិរន្តរភាពជាតិ និងជាប្រធានក្រុមប្រឹក្សានៃអង្គចៅក្រម ទ្រង់មានព្រះមេត្តាព្រះរាជតម្រិះ និងព្រះរាជអន្តរាគមន៍ដើម្បីឱ្យខ្ញុំជាម្ចាស់ និងសហការី ដែលកំពុងរស់នៅនិរទេសក្រៅប្រទេសអាចទទួលបានការផ្ដល់សុពលភាពលិខិតឆ្លងដែន និងទិដ្ឋការធ្វើដំណើរពីអាជ្ញាធរកម្ពុជា ដើម្បីវិលត្រឡប់ទៅមាតុភូមិប្រទេសវិញ ដោយព្រះរាជានុគ្រោះ»។
មន្ត្រីអតីតគណបក្សប្រឆាំង១២រូប ត្រូវបានរដ្ឋាភិបាលបញ្ចប់សុពលភាពលិខិតឆ្លងដែន រួមមាន អ្នកស្រី មូរ សុខហួរ លោក អេង ឆៃអ៊ាង លោក ហូរ វ៉ាន់ លោក ឡុង រី លោក សោ ចាន់ដេត លោក គង់ សភា លោក វ៉ាន់ ណារិទ្ធ លោក ដាង ចំរើន លោក ញឹម គិមញុល លោក ហេង ដាណារ៉ូ លោក អ៊ីសា ឧស្មាន និង លោក ម៉ន ផល្លា។
ក្រសួងការបរទេសកម្ពុជា ក៏បានដាក់លិខិតទៅកាន់ស្ថានទូតនានាប្រចាំកម្ពុជា ដើម្បីជូនដំណឹងពីការបញ្ចប់សុពលភាពលិខិតឆ្លងដែនធម្មតា (Ordinary Passport) របស់មន្ត្រីអតីតគណបក្សប្រឆាំងទាំងនេះដែរ។ អ្នកនាំពាក្យក្រសួងការបរទេសលោក កុយ គួង ធ្លាប់បានប្រាប់សារព័ត៌មានថ្មីៗថា មូលហេតុដែលក្រសួងសម្រេចបញ្ចប់សុពលភាពលិខិតឆ្លងដែនអ្នកនយោបាយទាំង១២រូបនេះ ដោយសារពួកគេជាអ្នកទោស ដែលរត់គេចខ្លួន។
ជុំវិញករណីបញ្ចប់ទិដ្ឋការនេះ លោកស្រី មួរ សុខហួរ បានរៀបរាប់ថ្វាយអង្គព្រះមហាក្សត្រថា រដ្ឋាភិបាលបានរារាំងខ្លួន និងសហការីបក្សប្រឆាំង មិនឱ្យចូលកម្ពុជាវិញ ខណៈដែលតុលាការបើកសវនាដោយគ្មានវត្តមានមន្ត្រីបក្សឆាំង ដែលជាជនជាប់ចោទ។ លោកស្រី សុខហួរ ចាត់ទុកសកម្មភាពរដ្ឋាភិបាលទាំងនេះ ជាការរំលោភបំពានធ្ងន់ធ្ងរលើរដ្ឋធម្មនុញ្ញកម្ពុជា ដែលធានាអំពីសិទ្ធិទទួលបានការជំនុំជម្រះក្តីដោយត្រឹមត្រូវ ស្មើភាព និងយុត្តិធម៌។ ជាពិសេសធ្វើឱ្យប៉ះពាល់ដល់ឯករាជ្យនៃអំណាចតុលាការ ព្រមទាំងឯកភាពជាតិ ការផ្សះផ្សាជាតិ និងផលប្រយោជន៍ជាតិ។
«ទាក់ទងនឹងរឿងក្តីទាំងនេះ ខ្ញុំម្ចាស់និងសហការីពិតជាមានបំណង និងកំពុងព្យាយាមរកគ្រប់មធ្យោបាយឱ្យបានថ្វើដំណើរត្រឡប់ទៅប្រទេសកម្ពុជាវិញ ដើម្បីទៅតតាំងក្តីក្នុងសវនាការរបស់សាលដំបូងរាជធានីភ្នំពេញតាមកាលកំណត់ ប៉ុន្តែអាជ្ញាធរកម្ពុជាបែរជារារាំង ដោយមិនព្រមផ្លដ់សុពលភាពលិខិតឆ្លងដែន និងទិដ្ឋការធ្វើដំណើរដល់រូបខ្ញុំម្ចាស់ និងសហការីឡើយ»។ នេះជាការលើកឡើងរបស់លោកស្រី សុខហួរ ដែលកំពុងជាប់ក្តីក្តាំជាច្រើន ថ្លែងនៅក្នុងលិខិតថ្វាយសុំអន្តរាគមន៍ពីព្រះមហាក្សត្រ។
តែយ៉ាងណាអ្នកវិភាគមើលឃើញថា គណបក្សប្រឆាំងគ្រាន់តែលេងនយោបាយ ដើម្បីកុំឱ្យសាធារណជនអស់ជំនឿលើខ្លួនប៉ុណ្ណោះ ខណៈរដ្ឋាភិបាលក៏មិនចង់ប្រើនយោបាយចាប់ខ្លួនអ្នកទាំងនោះដែរ។ សម្រាប់លោក សេង សារី អ្នកនយោបាយកម្ពុជា កំពុងលេងល្បែងនយោបាយ «ហ៊ាន ឬមិនហ៊ាន» ជាមួយគ្នា។
ថ្លែងប្រាប់សារព័ត៌មានថ្មីៗ អ្នកតាមដានស្ថានការណ៍នយោបាយរូបនេះ បាននិយាយដូច្នេះថា៖«សម្រាប់ខ្ញុំស្ថានភាពពេលនេះ (អ្នកនយោបាយ) ចាប់មិនចង់ចាប់ ចូលមិនចង់ចូល បានន័យថា អ្នក(នយោបាយប្រឆាំង) ចង់ចូលស្រុក ដូចជាមិនចង់ចូល ហើយ(ពេលខ្លះ)ដូចចង់ចូលតិច។ឯរដ្ឋាភិបាលចង់ចាប់(អ្នកនយោបាយបក្សប្រឆាំង) ក៏ដូចជាមិនចង់ចាប់ ព្រោះហៅ(ក្រុមបក្សប្រឆាំង) ចូលតុលាការ ប៉ុន្តែមិនបើកផ្លូវឱ្យគេចូលទៅតុលាការ អ៊ីចឹងវាដូចជាចាប់មិនចង់ចាប់ ហើយចូលមិនចង់ចូលហើយ»។
បើតាមលោក សេង សារី លិខិតរបស់លោកស្រី មួរ សុខហួរ ដែលផ្ញើទៅថ្វាយព្រះមហាក្សត្រនោះ គឺគ្រាន់តែការបំពេញនីតិវិធីនៃល្បែងនយោបាយប៉ុណ្ណោះ ដែលវាទំនងជាគ្មានប្រសិទ្ធភាពនោះឡើយ។«ប៉ុន្តែបើមានករណីឱ្យត្រឡប់ចូលមកវិញ ខ្ញុំមើលឃើញថា មិនមានស្ថានភាពនយោបាយអ្វីប្រែប្រួលនោះទេ ព្រោះអ្នកនយោបាយដែលធ្វើឱ្យស្ថានភាពប្រែប្រួលទាល់តែគីឡូ លោក សម រង្ស៊ី ប៉ុន្តែបើត្រឹមអ្នកស្រី មួរ សុខហួរ ចូលមក ក៏គ្មានស្ថានភាពនយោបាយអ្វីប្រែប្រួលនោះដែរ»។ នេះជាការបញ្ជាក់របស់អ្នកវិភាគនយោបាយ។
លោកស្រី មួរសុខហួរ បានប្រកាសចូលប្រទេសកម្ពុជាម្ដងហើយ កាលពីថ្ងៃទី៤ មករា ២០២១នេះ ប៉ុន្តែលោកស្រីខកខានមកវិញ ដោយសារបញ្ហាជើងយន្តហោះ។ ក្រោយខកខាននេះ លោកស្រី សុខហួរ ក៏បានប្រកាសយកថ្ងៃទី១៥ មករា ចូលកម្ពុជាជាថ្មីម្ដងទៀត។
កន្លងមកមេដឹកនាំអតីតគណបក្សសង្គ្រោះជាតិ លោក សម រង្ស៊ី ក៏បានប្រកាសចូលកម្ពុជាវិញជាច្រើនដងដែរ ប៉ុន្តែមិនអាចចូលបានឡើយ ដោយសារតែរដ្ឋាភិបាលហាមក្រុមហ៊ុនអាកាសចរណ៍ទាំងអស់ ដឹកលោក សម រង្ស៊ី និងក្រុមបក្សប្រឆាំងនៅក្រៅប្រទេស ចូលស្រុកវិញ។ លោក សម រង្ស៊ី បានត្រឹមមកកាន់ទឹកដីម៉ាឡេស៊ី កាលពីឆ្នាំ២០១៩ ខណៈជើងយន្តហោះមិនបន្តដឹកលោក មកកម្ពុជាឡើយ ៕
Tag:
មួរ សុខហួរ
លិខិតឆ្លងដែន
នយោបាយ
© រក្សាសិទ្ធិដោយ thmeythmey.com
