អន្តរជាតិ
អាមេរិក ប្រហារជីវិតអ្នកទោសជាស្ត្រីជាលើកដំបូងក្នុងពេលជិត៧០ឆ្នាំ អ្នកទោស Lisa Montgomery ត្រូវប្រហារជីវិតនៅថ្ងៃទី១៣ ខែមករា។ រូបភាព Reuters
×
ដោយ ៖ឈួន ឈីវអ៊ីង
អ្នកទោសជាស្ត្រីម្នាក់ឈ្មោះ Lisa Montgomery ត្រូវបានកាត់ទោសប្រហារជីវិតនៅព្រឹកថ្ងៃទី១៣ ខែមករា។ នាងជាប់ពាក់ព័ន្ធក្នុងរឿងក្តីឃាតកម្ម និងចាប់ជំរិតតាំងពីឆ្នាំ២០០៤ ហើយត្រូវកាត់ទោសប្រហារជីវិត។ ការតវ៉ាជាច្រើនលើក បានបរាជ័យខណៈមេធាវីរបស់ស្ត្រីរូបនេះបានលើកឡើងថា នាងមានបញ្ហាសតិអារម្មណ៍ដែលគួរតែលើកលែងពីការកាត់ទោសប្រហារជីវិត។
Lisa Montgomery អ្នកទោសស្ត្រីដំបូងដែលត្រូវប្រហារជីវិតនៅអាមេរិកគិតតាំងពីឆ្នាំ១៩៥៣។ នាងត្រូវប្រហារជីវិតក្នុងគុកនៅរដ្ឋ Indiana ក្រោយការតវ៉ាមិនបានសម្រេចជាច្រើនលើក។។ បើតាមប្រព័ន្ធផ្សព្វផ្សាយអាមេរិក NBC លោក Kelley Henry មេធាវីរបស់ Montgomery និយាយថា នាងមានបញ្ហាផ្លូវចិត្តធ្ងន់ធ្ងរដោយសាររងទារុណកម្មផ្លូវភេទពីសំណាក់ឪពុកចុង និងមនុស្សដទៃទៀតបន្ទាប់ពីម្តាយនាងយកទៅលក់។
លើសពីនេះ ស្ត្រីរូបនេះក៏ជំងឺខូចខួរក្បាលតាំងពីកំណើតដោយសារម្តាយរបស់នាងផឹកស្រាពេលពរពោះនាងផងដែរ។ អ្នកជំនាញផ្នែកចិត្តសាស្ត្រក៏បានបញ្ជូនលិខិតបញ្ជាក់ពីសុខភាពផ្លូវចិត្តរបស់នាង ជាផ្នែកមួយនៃបណ្តឹងឧទ្ធរណ៍ផងដែរ ជាមួយការអះអាងថា នាងមិនអាចសូម្បីយល់ពីការកាត់ទោសប្រហារជីវិតរបស់នាងផង។
រឿងរ៉ាវដែលនាំឲ្យមានទោសទណ្ឌនេះកើតនៅឆ្នាំ២០០៤ នៅពេល Montgomery មានអាយុ៣៦ឆ្នាំ។ ជាអ្នករស់នៅរដ្ឋ Kansas នាងទៅបានទៅលេងរដ្ឋ Missouri ដែលជាកន្លែងរស់នៅរបស់ស្ត្រី Bobbie Jo Stinnett ដែលជាជនរងគ្រោះ។ ពួកគេបានជួបគ្នានៅក្នុងការតាំងពិព័រណ៍សត្វឆ្កែ ខណៈ Stinnett កំពុងពរពោះកូនស្រីបាន៨ខែ។ Montgomery ក៏បានចងព្យួរក Stinnett ជាមួយនឹងខ្សែពួរ ហើយបានយកកាំបិតដែលនាងយកមកពីផ្ទះនឹងវះយកទារកចេញ។ ប៉ុន្តែភ្លាមៗនោះនាងក៏បានចាប់ខ្លួន ដូច្នេះកូនស្រីនោះក៏មិនមានគ្រោះថ្នាក់ដល់ជីវិតដែរ។
Montgomery ត្រូវកាត់ទោសប្រហារជីវិតក្នុងឆ្នាំ២០០៧ ។ កាលពីខែតុលា ឆ្នាំទៅ ក្រសួងយុត្តិធម៌អាមេរិកបានពណ៌នាពីករណីនេះថាជាអំពើឃាតកម្មក៏សាហាវ។ នៅ Missouri មនុស្សម្នានាំគ្នាជួបជុំកាលពីខែធ្នូដើម្បីរំឭកដល់ Stinnett ហើយមានអ្នកខ្លះក៏គាំទ្រឲ្យមានការប្រហារជីវិត Montgomery ដែរ។
គួររំឭកថា រដ្ឋាភិបាលអាមេរិកបានប្រហារជីវិតអ្នកទោសស្រីចុងក្រោយគេនៅឆ្នាំ១៩៥៣ គឺ Bonnie Brown Heady ក្នុងសំណុំរឿងចាប់ជំរិត និងធ្វើឃាតក្មេងប្រុសម្នាក់៕
© រក្សាសិទ្ធិដោយ thmeythmey.com