COVID-19
កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ជប៉ុនសម្រេចផ្អាកបណ្តោះអាសន្នលើការអនុញ្ញាតឲ្យអត្តពលិកបរទេសចូលហ្វឹកហាត់ក្នុងប្រទេសនៅមុនពេលព្រឹត្តិការណ៍អូឡាំពិកក្រុងតូក្យូចូលមកដល់។ នេះបើតាមការផ្សាយរបស់កាសែត Kyodo ស្របពេលជប៉ុនបិទព្រំដែនរបស់ខ្លួនដើម្បីទប់ស្កាត់ការកើនឡើងជាថ្មីនៃជំងឺ COVID-19។
ការពន្យារពេលនេះនឹងមានរយៈពេលរហូតដល់ថ្ងៃទី៧ ខែកុម្ភៈ ពោលគឺនៅពេលការបិទព្រំដែនក្នុងក្រុងតូក្យូ និងក្រុងធំៗផ្សេងទៀតត្រូវបញ្ចប់។ ការបិទព្រំដែននេះ កើតឡើងបន្ទាប់ពីជប៉ុនកើនឡើងចំនួនអ្នកឆ្លងជំងឺរាតត្បាតសកលក្នុងចំនួនច្រើនសារជាថ្មី រហូតបង្ខំរដ្ឋាភិបាលរឹតបន្តឹងបែបនេះ។
អំឡុងពេលបិទព្រំដែននេះដែរ ក៏ធ្វើឲ្យប៉ះពាល់ដល់អត្តពលិកពីក្រៅប្រទេសដែលចង់ទៅជប៉ុនដើម្បីហ្វឹកហាត់ត្រៀមអូឡាំពិកឆ្នាំ២០២១ ផងដែរ។ ជប៉ុនបានសម្រេចផ្អាកការអនុញ្ជាតឲ្យអត្តពលិកចូលទៅហ្វឹកហាត់នៅទឹកដីខ្លួនដើម្បីបង្ការជំងឺ COVID-19 ខណៈព្រឹត្តិការណ៍កីឡាលំដាប់ពិភលោករដូវកាលក្តៅដែលត្រូវពន្យារពេល១ឆ្នាំនេះ នឹងចូលមកដល់នៅរយៈពេល៦ខែទៀត។
គិតត្រឹមថ្ងៃទី១៥ ខែមករានេះ ជប៉ុនចំនួនករណីឆ្លង COVID-19 ជាង៣សែនករណី ក្នុងនោះស្លាប់ជាង៤២០០នាក់ និងសះស្បើយជាង២សែន៣ម៉ឺនករណី៕
Tag:
COVID-19
Olympic
© រក្សាសិទ្ធិដោយ thmeythmey.com
