COVID-19
ជាតិ
កម្ពុជា-ឥណ្ឌា ឯកភាពគ្នា តភ្ជាប់ជើងហោះហើរត្រង់ ក្រោយវិបត្តិកូវីដ-១៩ ផុតរលត់ លោក ថោង ខុន រដ្ឋមន្ត្រីក្រសួងទេសចរណ៍ បានពិភាក្សាពីជើងហោះហើរត្រង់នេះ ជាមួយលោកស្រី ទេវ្យានី ឧត្តម ខូប្រាហ្កាដេ (Devyani Uttam Khobragade) ឯកអគ្គរដ្ឋទូតឥណ្ឌាប្រចាំកម្ពុជា កាលថ្ងៃទី២០ ខែមករា ឆ្នាំ២០២១
× ភ្នំពេញ៖ កម្ពុជា និងឥណ្ឌា បានឯកភាពគ្នា តភ្ជាប់ជើងហោះហើរត្រង់ ក្រោយពេលវិបត្តិជំងឺកូវីដ-១៩ ត្រូវបានបញ្ចប់ ដើម្បីជំរុញសកម្មភាពទេសចរណ៍ឡើងវិញ។ លោក ថោង ខុន រដ្ឋមន្ត្រីក្រសួងទេសចរណ៍ បានពិភាក្សាពីជើងហោះហើរត្រង់នេះ ជាមួយលោកស្រី ទេវ្យានី ឧត្តម ខូប្រាហ្កាដេ (Devyani Uttam Khobragade) ឯកអគ្គរដ្ឋទូតឥណ្ឌាប្រចាំកម្ពុជា កាលថ្ងៃទី២០ ខែមករា ឆ្នាំ២០២១។
បើតាមលោក ថោង ខុន ការរៀបចំជើងហោះហើរត្រង់រវាងកម្ពុជា-ឥណ្ឌា នឹងជួយពង្រឹងកិច្ចសហប្រតិបត្តិការទ្វេភាគីឱ្យកាន់តែស្និទថែមទៀត។ ដោយសារមើលឃើញពីចំណុចវិជ្ជមាននេះ ទើបលោក ថោង ខុន ស្នើឱ្យមានការតភ្ជាប់ជើងហោះហើរត្រង់រវាងកម្ពុជា-ឥណ្ឌា ក្រោយត្រូវបានពន្យារពេលអស់ច្រើនឆ្នាំ ដោយសារការរំខាននៃជំងឺកូវីដ-១៩។
លោកស្រី ទេវ្យានី ទទួលយកសំណើររបស់លោក ថោង ខុន ។ លោកស្រី ចាត់ទុកការងារនេះ ជាការងារអាទិភាពក្នុងបេសកកម្មជាឯកអគ្គរដ្ឋទូតរបស់លោកស្រី ។ ក្រសួងទេសចរណ៍ បានស្រង់សម្តីលោកស្រី ទេវ្យានី ដូច្នេះថា៖«ស្ថានទូតឥណ្ឌាប្រចាំកម្ពុជា នឹងរួមសហការជាមួយក្រសួងទេសចរណ៍ និងភាគីពាក់ព័ន្ធដទៃទៀតក្នុងការបន្តរៀបចំទិវាយោគៈអន្តរជាតិ (International Yuga Day) នៅរាជធានីភ្នំពេញ ខេត្តសៀមរាប ខេត្តព្រះសីហនុ និងខេត្តបាត់ដំបងជាដើម»។
មិនតែប៉ុណ្ណោះស្ថានទូតឥណ្ឌា ក៏បានគាំទ្រគម្រោងអភិវឌ្ឍន៍តំបន់ឆ្នេរសមុទ្រកម្ពុជាបន្តទៀត ព្រមទាំងអភិវឌ្ឍន៍ទេសចរណ៍ឌីជីថលទៀតផង។ បន្ថែមពីនេះលោកស្រីឯកអគ្គរដ្ឋទូតឥណ្ឌា សន្យាជួយសម្របសម្រួលដល់ការបណ្ដុះបណ្ដាលអ្នកជំនាញទេសចរណ៍តាមរយៈប្រព័ន្ធវីដេអូអនឡាញផងដែរ។
ក្រៅពីនេះ ស្ថានទូតឥណ្ឌាប្រចាំកម្ពុជាក៏នឹងជួយកែលម្អប្រព័ន្ធហេដ្ឋារចនាសម្ព័ន្ធតាមតំបន់អេកូទេសចរណ៍ ទេសចរណ៍វប្បធម៌ ដូចជាការកែលម្អផ្លូវចូល ផ្លាកសញ្ញា ការបណ្ដុះបណ្ដាលប្រជាពលរដ្ឋនៅតាមមូលដ្ឋាន ឱ្យទទួលជំនាញក្នុងការស្វាគមន៍ភ្ញៀវទេសចរកាន់តែល្អប្រសើរ។
ភាគីទាំងពីរនឹងបង្កើតក្រុមការងារ ដែលមានសមាសភាពពីក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងក្រសួង ស្ថាប័នពាក់ព័ន្ធមួយចំនួនទៀត ក៏ដូចជាក្រុមការងារនៅស្ថានទូតឥណ្ឌាប្រចាំកម្ពុជា និងក្រុមការងារឥណ្ឌានៅរដ្ឋធានីញូវដេលីផងដែរ៕
© រក្សាសិទ្ធិដោយ thmeythmey.com