បើគ្មានការប្រែប្រួលទេ សហព័ន្ធកីឡាកាយសម្ព័ន្ធកម្ពុជា នឹងបញ្ជូនកីឡាករ និងគ្រូបង្វឹកមួយចំនួនទៅហ្វឹកហាត់ពង្រឹងសមត្ថភាពរយៈពេលវែងនៅប្រទេសចិន នៅឆ្នាំ២០២១ នេះ ។ បន្ថែមលើនេះ ភាគីចិន សន្យាផ្តល់គ្រូជំនាញកីឡាកាយសម្ព័ន្ធមកបង្វឹកដល់កីឡាករនៅប្រទេសកម្ពុជា។ នៅឆ្នាំនេះដែរ កម្ពុជា ក៏គ្រោងបញ្ជូនកីឡាករកីឡាការិនី និងគ្រូបង្វឹកលើប្រភេទកីឡាផ្សេងៗប្រមាណ១០០នាក់ទៅហ្វឹកហាត់នៅទីនោះផងដែរ។
នាពិធីបិទការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់របស់ខ្លួនប្រចាំឆ្នាំ២០២០ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជា បានវាយតម្លៃខ្ពស់ចំពោះដំណើរការរៀបចំ និងការរីកចម្រើនផ្នែកបច្ចេកទេសរបស់កីឡាករ ទោះកម្ពុជាទទួលរងនូវការរីករាលដាលនៃជំងឺកូវីដ-១៩។ លោក សង្កេតឃើញសមត្ថភាពកីឡាករកីឡាការិនីមានការរីកចម្រើនគួរឲ្យកត់សម្គាល់ បើធៀបទៅនឹងឆ្នាំមុន។
ជាមួយគ្នានេះ ប្រធានគណៈកម្មាធិការជាតិអូឡាំពិកកម្ពុជារូបនេះ បានលើកឡើងពីគម្រោងរបស់សហព័ន្ធក្នុងការអភិវឌ្ឍសមត្ថភាពជំនាញកីឡាកម្រិតខ្ពស់ដល់កីឡាករកីឡាការិនីកាយសម្ព័ន្ធកម្ពុជា។ បើគ្មានអ្វីប្រែប្រួលទេ នៅឆ្នាំ២០២១ នេះ សហព័ន្ធនឹងបញ្ជូនកីឡាករ និងគ្រូបង្វឹកមួយចំនួនទៅហ្វឹកហាត់ពង្រឹងសមត្ថភាពរយៈពេលវែងនៅប្រទេសចិន។
«ដើម្បីអភិវឌ្ឍន៍ជំនាញកីឡាកម្រិតខ្ពស់ គណៈកម្មាធិការជាតិរៀបចំកីឡាស៊ីហ្គេម បានឯកភាពជាមួយក្រុមជំនាញកីឡា និងក្រុមសិក្សាស្រាវជ្រាវមកពីក្រុមហ៊ុនកីឡាអន្តរជាតិ តំណាងឲ្យអាជ្ញាធរកីឡានៃសាធារណរដ្ឋចិន បានផ្តល់ឲ្យកីឡាករកាយសម្ព័ន្ធអាធីស្ទិកចំនួន១០រូប ដើម្បីត្រៀមទៅហ្វឹកហាត់រយៈពេលវែងនៅចិន និងផ្តល់គ្រូជំនាញកម្រិតខ្ពស់ មកបង្វឹកកីឡាករកីឡាការិនីអាអេរ៉ូប៊ិកនៅកម្ពុជា»។ នេះជាការលើកឡើងរបស់លោក ថោង ខុន។
បើតាមអនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC) ក្រៅពីកីឡាកាយសម្ព័ន្ធ កម្ពុជា ក៏គ្រោងបញ្ជូនកីឡាករកីឡាការិនី និងគ្រូបង្វឹកលើប្រភេទកីឡាផ្សេងៗទៅហ្វឹកហាត់នៅទីនោះដែរ។ ប៉ុន្តែគម្រោងនេះអាចដំណើរការទៅបានតាមការគ្រោងទុក លុះត្រាណាការឆ្លងរីករាលដាលនៃជំងឺកូវីដ-១៩ នៅលើពិភពលោក ក៏ដូចជានៅប្រទេសចិន មានស្ថានភាពធូរស្បើយ។
លោកបានបញ្ជាក់បន្ថែមថា៖«ក្នុងនាមជាមិត្តភក្តិដ៏ល្អ គឺភាគីចិនបានត្រៀមទទួលកីឡាករកីឡាការិនី និងគ្រូបង្វឹករបស់យើងចំនួន១០០នាក់ ក្នុងនោះចំពោះកីឡាកាយសម្ព័ន្ធ ក៏បានត្រៀមកីឡាករ និងគ្រូបង្វឹកអាធីស្ទិកចំនួន១០នាក់ដែរ។ នេះជាការត្រៀមហ្វឹកហាត់រយៈពេលយូរ...ទៅនៅចិននេះ ខ្ញុំសូមឲ្យលោកគ្រូអ្នកគ្រូ និងចៅៗទាំងអស់ត្រូវយកចិត្តទុកដាក់ ព្រោះទាំងអាអេរ៉ូប៊ិក និងអាធីស្ទិកនៅចិន គឺគាត់ពូកែ»។
លោក ណយ ផាណា អគ្គលេខាធិការនៃសហព័ន្ធកីឡាកាយសម្ព័ន្ធកម្ពុជា ចាត់ទុកការហ្វឹកហាត់នៅចិនជាឱកាសសម្រាប់កីឡាករកាយសម្ព័ន្ធក្នុងការអភិវឌ្ឍសមត្ថភាពជំនាញ ដ្បិតចិនជាប្រទេសមានសក្តានុពលខ្ពស់លើប្រភេទកីឡានេះ។ វា ក៏ជាជំហានក្នុងដំណើរឆ្ពោះទៅជោគជ័យក្នុងការប្រកួតកីឡាស៊ីហ្គេមឆ្នាំ២០២១ នៅវៀតណាម និងឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។
លោក ណយ ផាណា អគ្គលេខាធិការនៃសហព័ន្ធកីឡាកាយសម្ព័ន្ធកម្ពុជា, រូបពី Cambodia SEA Games 2023
បើតាមអគ្គលេខាធិការរូបនេះ គម្រោងបញ្ជូនកីឡាករ និងគ្រូបង្វឹកទៅហ្វឹកហាត់នៅចិន នឹងប្រព្រឹត្តទៅចុងខែកក្កដា ឬដើមខែសីហា ឆ្នាំ២០២១ ក្នុងករណីមិនមានអ្វីប្រែប្រួល។ លោក បន្ថែមថា សហព័ន្ធក៏មានគម្រោងហៅគ្រូជំនាញមកពីប្រទេសរុស្ស៊ីមកបង្វឹកកីឡាករនៅកម្ពុជាផងដែរ។ ខណៈបច្ចុប្បន្នការស្នើសុំនេះ កំពុងស្ថិតក្នុងដំណើរការ។
លោក ណយ ផាណា បាបង្ហាញការជឿជាក់ថា ក្រុមកីឡាកាយសម្ព័ន្ធនឹងអាចឈានទៅដណ្តើមបានមេដាយក្នុងការប្រកួតកីឡាស៊ីហ្គេមឆ្នាំ២០២៣ បើពួកគេបានចេញទៅហ្វឹកហាត់នៅប្រទេសតាមការគ្រោងទុក និងការចេញទៅចូលការប្រកួតនានា និងបោះជំរំហ្វឹកហាត់រយៈពេលខ្លីនៅក្រៅប្រទេសញឹកញាប់។
ជាមួយគ្នានេះ លោក ថោង ខុន បានចាត់ទុកឆ្នាំ២០២១ ជាឆ្នាំចាប់ផ្តើមស៊ីហ្គេមឆ្នាំ២០២៣ ពោលគឺគ្រប់ភាគីពាក់ព័ន្ធទាំងអស់ទាំងគណៈកម្មការជំនាញទាំង១៤នៃ CAMSOC, NOCC និងសហព័ន្ធកីឡាជាតិ ត្រូវអនុវត្តតាមផែនការក្នុងដំណើរឆ្ពោះទៅស៊ីហ្គេមរបស់ខ្លួន។ លោក សង្កត់ធ្ងន់ថា ឆ្នាំ២០២១ ជាឆ្នាំកំណត់ជោគវាសនារបស់កម្ពុជា ដើម្បីឈានទៅជោគជ័យនៅឆ្នាំ២០២៣។
លោកបានលើកឡើងដូច្នេះថា៖«ឆ្នាំ២០២១ ជាឆ្នាំ ដែលយើងត្រូវខិតខំធ្វើយ៉ាងណាហ្វឹកហាត់ឲ្យបានកាន់តែល្អ ដើម្បីត្រៀមលក្ខណៈឲ្យបានរួចរាល់ឲ្យបាន៧០ទៅ៨០ភាគរយនៃការត្រៀមរបស់យើង គឺទាំងការហ្វឹកហាត់របស់ក្មួយៗកីឡាករកីឡាការិនី ទាំងការបណ្តុះបណ្តាលគ្រូបង្វឹក និងអាជ្ញាកណ្តាលចៅក្រម និងគ្រប់បែបយ៉ាងទាំងអស់។ ព្រោះដល់ឆ្នាំ២០២២ យើងមិនមានពេលនោះទេ»៕