ការប្រកួតកីឡាទោចក្រយានជ្រើសរើសជើងឯកថ្នាក់ជាតិប្រចាំឆ្នាំ២០២០ នឹងធ្វើឡើងនៅទឹកដីអង្គរ នៃខេត្តសៀមរាប នាថ្ងៃទី២៣ មករា ឆ្នាំ២០២៣ ខាងមុខនេះ។ ថ្នាក់ដឹកនាំសហព័ន្ធខ្មែរកីឡាទោចក្រយានអះអាងថា កីឡាករទទួលបានជ័យភាគីឆ្នាំនេះ នឹងមានឱកាសខ្ពស់ទៅចូលរួមការប្រកួតកីឡាស៊ីហ្គេមឆ្នាំ២០២១ នៅវៀតណាម និងទទួលបានឱកាសទៅហ្វឹកហាត់នៅក្រៅពប្រទេសជាដើម។
វាជាការប្រកួតប្រចាំឆ្នាំក៏ពិតមែន ប៉ុន្តែការប្រកួតកីឡាទោចក្រយាន ជ្រើសរើសជើងឯកថ្នាក់ជាតិឆ្នាំ២០២០ ជាឱកាសសម្រាប់កីឡាករ ដើម្បីទទួលបានកៅអីទៅចូលរួមការប្រកួតកីឡាស៊ីហ្គេមលើកទី៣១នៅប្រទេសវៀតណាមឆ្នាំនេះ។ ក្នុងន័យនេះ កីឡាករដែលទទួលបានជ័យលាភីនៅឆ្នាំនេះនឹងមានឱកាសខ្ពស់តំណាងឲ្យកម្ពុជាក្នុងព្រឹត្តិការណ៍កីឡាស៊ីហ្គេមនៅវៀតណាម។ នេះបើតាមការលើកឡើងរបស់លោក នូ ចំរើន អគ្គលេខាធិការនៃសហព័ន្ធខ្មែរកីឡាទោចក្រយាន។
លោក បានបញ្ចាក់ថា៖«សម្រាប់សហព័ន្ធ គឺយើងធ្វើការប្រកួតប្រចាំឆ្នាំជាព្រឹត្តិការណ៍ធំ ដោយកីឡាករកីឡាការិនីនឹងមានការប្រកួតប្រជែងគ្នាខ្លាំង មិនមែនជាការជិះលេងកម្សាន្តនោះទេ វាការប្រកួតថ្នាក់ជាតិ ដែលមកពីគ្រប់រាជធានី-ខេត្ត។ ដូច្នេះការប្រកួតនេះជាការផ្សព្វផ្សាយមួយដ៏សំខាន់សម្រាប់មហាជន ហើយអ្វីដែលយើងរំពឹងបាន គឺការអភិវឌ្ឍសមត្ថភាពគណៈកម្មការបច្ចេកទេស ក៏ដូចជាចម្រាញ់បានកីឡាករកីឡាការិនីល្អៗ សម្រាប់បញ្ជូនទៅចូលរួមប្រកួតកីឡាស៊ីហ្គេមនៅវៀតណាម»។
បើតាមអគ្គលេខាធិការរូបនេះការប្រកួតជើងឯកថ្នាក់ជាតិឆ្នាំនេះ នឹងមានលក្ខណៈខុសប្លែកពីឆ្នាំមុន ពោលគឺសហព័ន្ធនឹងរៀបចំឲ្យស្របតាមស្តង់ដាអន្តរជាតិដែលគេតែងតែប្រើក្នុងការប្រកួតអន្តរជាតផ្សេងៗ និងការប្រកួតកីឡាស៊ីហ្គេមជាដើម។ ការធ្វើបែបនេះ ក្នុងគោលបំណង ដើម្បីអភិវឌ្ឍន៍សមត្ថភាពមន្ត្រីគណៈកម្មការបច្ចេកទេស ក៏ដូចជាបង្កើនការប្រកួតឲ្យកាន់តែទាក់ទាញ។
«យើងនឹងរៀបចំព្រឹត្តិការណ៍ប្រកួតឲ្យស្រមតាមស្តង់ដារនិយាមរបស់អន្តរជាតិ ដែលយើងគ្រោងរៀបចំនេះ គឺយើងធ្វើទៅតាមបទដ្ឋានបច្ចេកទេសរបស់សហព័ន្ធកីឡាប្រណាំងកង់អន្តរជាតិ ហើយក៏ដូចជាការត្រៀមលក្ខណៈរបស់គណៈកម្មការរៀបចំ និងកីឡាករកីឡាការិនីឲ្យវិវត្តខ្លួនស្រមទៅតាមអ្វី ដែលយើងត្រូវធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣»។ នេះជាការលើកឡើងរបស់លោក នូ ចំរើន។
ជាមួយគ្នានេះ លោកក៏បានបង្ហាញពីផែនការមួយចំនួនក្នុងការអភិវឌ្ឍសមត្ថភាពកីឡាករកីឡាការិនីឲ្យកាន់តែរីកចម្រើនផងដែរ ក្នុងនោះសហព័ន្ធនឹងកីឡាករកីឡាការិនីឆ្នើមៗមួយចំនួន ដែលចម្រាញ់ចេញពីការប្រកួតជើងឯកថ្នាក់ជាតិឆ្នាំនេះ ទៅហ្វឹកហាត់នៅប្រទេសបារាំងរយៈពេលវែង។ សម្រាប់ការហ្វឹកហាត់នៅបារាំងនេះដែរ ដោយទទួលបានការឧបត្ថម្ភពីសមាគមប្រណាំងកង់របស់បារាំង។ គម្រោងនេះ អាចនឹងចាប់ផ្តើមពីឆ្នាំ២០២១ រហូតដល់ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ដើម្បីរួមចំណែកអភិវឌ្ឍន៍កីឡាទោចក្រយាននៅកម្ពុជាឲ្យកាន់តែរីកចម្រើន សហព័ន្ធ នឹងរៀបចំការប្រកួតជើងឯកតាមភូមិភាគ ដែលមានការបែងជា៥ភូមិភាគ។ នេះបើតាមការលើកឡើងរបស់លោក នូ ចំរើន តែលោកមិនបានបញ្ជាក់ពីពេលវេលា ដែលត្រូវចាប់ផ្តើមអនុវត្តគម្រោងនេះឡើយ។
ការប្រកួតកីឡាទោចក្រយានជ្រើសរើសជើងឯកថ្នាក់ជាតិប្រចាំឆ្នាំ២០២០ ដែលគ្រោងធ្វើឡើងចន្លោះពីថ្ងៃទី២២-២៣ ខែមករា ឆ្នាំ២០២១ មានកីឡាករកីឡាការិនីចំនួន៣១៩នាក់មកពី២៤ក្លិបសមាគមចូលរួម។ ចំនួននេះ កើនឡើងជាង១០០ភាគរយបើធៀបនឹងឆ្នាំមុខដែលមានត្រឹមតែ១៥០នាក់៕