កីឡាអន្តរជាតិ
អន្តរជាតិ
Klopp ប្រកាសទទួលខុសត្រូវពេញទី ក្រោយ Liverpool ចាញ់ក្នុងដីដំបូងតាំងពីឆ្នាំ២០១៧
× លោក Jurgen Klopp ទទួលខុសត្រូវទាំងស្រុងបន្ទាប់ពី Liverpool មិនអាចរក្សាកំណត់ត្រាមិនចាញ់ក្នុងដីលើកទី៦៨ប្រកួតនៅ Premier League បាន។ ហង្សក្រហមបរាជ័យគួរឱ្យភ្ញាក់ផ្អើលក្រោមថ្វីជើង Burnley ១-០ នៅ Anfield នៅថ្ងៃទី២១ ខែមករា។
នេះជាបរាជ័យនៅលើទឹកដីខ្លួនក្នុងការប្រកួតលីគលើកដំបូងរបស់ Livepool ក្រោមការដឹកនាំរបស់ Klopp ចាប់តាំងពីខែមេសា ឆ្នាំ២០១៧។ ខ្សែប្រយុទ្ធ Ashley Barnes ដែលសម្រេចទីចុងម៉ោងឲ្យ Burnley ទទួលបាន៣ពិន្ទុ ជាអ្នកបញ្ចប់ភាពមិនចាញ់របស់ម្ចាស់ជើងឯកត្រឹមប្រកួតលើកទី៦៨។
មិនត្រឹមតែប៉ុណ្ណោះ បរាជ័យនៅ Anfield នេះបានធ្វើឲ្យ Liverpool មានគម្លាតពិន្ទុឆ្ងាយពីក្រុមកំពូលតារាង Manchester United ចំនួន៦ពិន្ទុ ក្រោយឆ្លងកាត់ការប្រកួត១៩លើកដូចគ្នា។ ក្រុមលោក Klopp រកបាន៣៤ពិន្ទុ ឈរនៅចំណាត់ថ្នាក់ទី៤ និងតាមពីក្រោយក្រុមលេខ២ និង៣ Manchester City និង Leicester City ចំនួន ៤ពិន្ទុផងដែរ។
ក្រោយចាញ់ Burnley ដែលជាក្រុមខ្សោយរដូវកាលនេះ អ្នកចាត់ការទូទៅសញ្ជាតិអាល្លឺម៉ង់ សុខចិត្តទទួលកំហុសនេះទាំងស្រុងតែម្តង ខណៈក្រុមមិនអាចទទួលអ្វីដែលចង់បាន។
លោក Klopp បានប្រាប់ទូរទស្សន៍ Sky Sports ថា៖ «យើងបានចាញ់ការប្រកួតដែលខ្ញុំគិតថាមិនអាចចាញ់ទាល់តែសោះ។ នោះជាកំហុសរបស់ខ្ញុំព្រោះការងាររបស់ខ្ញុំគឺធ្វើយ៉ាងឱ្យក្រុមទទួលបានជ័យជម្នះ។ ជាក់ស្តែងបើទោះយើងគ្រប់គ្រងបាល់ និងមានឱកាសច្រើន តែយើងនៅតែទទួលបានលទ្ធផលខកចិត្ត ព្រោះនេះជាបាល់ទាត់»។
Livepool នឹងត្រូវបន្តទៅជួយក្រុមខ្លាំង Tottenham Hotspur នៅជំនួបក្រោយនេះទៀត ហើយប្រសិនពួកគេមិនអាចរកបាន៣ពិន្ទុទេនោះ នឹងពិបាកសម្រាប់ការការពារតំណែងជើងឯករដូវកាលនេះមិនខាន៕
Tag:
Jurgen Klopp
Liverpool
© រក្សាសិទ្ធិដោយ thmeythmey.com