ជាតិ
ក្រោយចប់យុទ្ធនាការរត់៩៧ថ្ងៃ សាយ ចង់ក្លាយជាអ្នកប្រឹក្សាយោបល់ដល់យុវជនដែលចង់ធ្វើការងារសង្គម
×![]()
សៀមរាប៖ លោក អ៊ួន បឋម ហៅសាយ បានបង្ហាញអារម្មណ៍រំភើបជាពន់ពេក ក្រោយបានបញ្ចប់នូវព្រឹត្តិការណ៍រត់ដើម្បីរៃអង្គាសថវិកា ក្នុងបុព្វហេតុជួយទ្រទ្រង់ការព្យាបាលដល់មន្ទីរពេទ្យកុមារអង្គរ នាខេត្តសៀមរាប។ ការរត់ជាង៣ខែ លើចម្ងាយផ្លូវជាង ២,៤០០គីឡូម៉ែត្រ ដោយឆ្លងកាត់រាជធានី-ខេត្តចំនួន២១ សាយ បានរៃអង្គាសថវិកាជួយមន្ទីរពេទ្យកុមារអង្គរ បានជាង៥០ម៉ឺនដុល្លារ គឺស្មើនឹងជាង ២ពាន់លានរៀល។
សាយ ដែលជាតារាចម្រៀង Original song បានធ្វើឱ្យមហាជនស្គាល់ខ្លួនកាន់តែច្បាស់ បន្ទាប់ពីយុវជនរូបនេះ បានបង្កើតព្រឹត្តិការណ៍ «រត់ដើម្បីសប្បុរសធម៌ជាមួយសាយ» ដើម្បីរៃអង្គាសថវិកាជួយមន្ទីពេទ្យកុមារអង្គរ ដែលកំពុងជួយព្យាបាលកុមារក្រីក្រកម្ពុជាដោយឥតគិតថ្លៃ តាំងពីឆ្នាំ១៩៩៩មក។ ក្នុងពិធីបិទបញ្ចប់ការរត់ និងការប្រគល់និងទទួលថវិកា នៅមន្ទីរពេទ្យកុមារអង្គរ នាព្រឹកថ្ងៃទី២៥ ខែមករា សាយ ប្រាប់ថា ខ្លួនគេពិតជាសប្បាយចិត្តណាស់ ដែលបានបំពេញក្ដីស្រមៃក្នុងឆាកជីវិត ហើយគេនឹងចងចាំព្រឹត្តិការណ៍នេះអស់មួយជីវិត។
ក្រោយជោគជ័យក្នុងព្រឹត្តិការណ៍មនុស្សធម៌ដ៏ធំនេះរួចមក សាយ បានបង្ហើបពីគោលបំណងបន្ទាប់នាពេលខាងមុខ គឺគម្រោងមួយដែលគេហៅថា នឹងជំរុញលើកទឹកចិត្តឱ្យយុវជន ចូលរួមការងារសង្គម។ ក្នុងនោះ សាយក៏ត្រៀមចែករំលែកនូវបទពិសោធន៍នានាដែលគេជួបប្រទះក្នុងការរៀបចំព្រឹត្តិការណ៍មនុស្សធម៌នេះ ធ្វើយ៉ាងណាឱ្យយុវជនជំនាន់ក្រោយ រៀននិងត្រៀមខ្លួន មុននឹងចង់រៀបចំកម្មវិធីសង្គមផ្សេងៗ។
លោកវេជ្ជបណ្ឌិត ងួន ចាន់ភក្ដ្រា នាយកមន្ទីរពេទ្យកុមារអង្គរ បានកោតសរសើរចំពោះសកម្មភាពរបស់សាយ ហើយថវិកាដែលទទួលបានពីព្រឹត្តិការណ៍ខាងលើនេះ ពិតជាចំណែកដ៏ធំសម្រាប់ការទ្រទ្រង់ការព្យាបាលក្នុងមន្ទីរពេទ្យទាំងមូល។ លោកវេជ្ជបណ្ឌិតបន្ថែមថា ជារៀងរាល់ថ្ងៃមានកុមារចន្លោះពី៥០០ទៅ៦០០នាក់ ដែលមកទទួលសេវាព្យាបាលក្នុងមន្ទីរពេទ្យ ហើយអំឡុងពេលជំងឺកូវីដ១៩នេះ ធ្វើឱ្យការរៃអង្គាសថវិកាពីបរទេស មានការធ្លាក់ចុះជាខ្លាំង។ លោក ងួន ចាន់ភក្ដ្រា ក៏បានអរគុណដល់ប្រជាពលរដ្ឋកម្ពុជាទាំងអស់ ដែលមានចំណែកចូលរួមថវិកាជួយដល់មន្ទីរពេទ្យក្នុងព្រឹត្តិការណ៍សប្បុរសធម៌ជាមួយសាយ នៅពេលនេះ។
គួរបញ្ជាក់ថា សាយ បានចាប់ផ្តើមរត់ពីរាជធានីភ្នំពេញនៅថ្ងៃទី៦ ខែតុលា ឆ្នាំ២០២០ ឆ្លងកាត់រាជធានី-ខេត្ត ចំនួន២១ និងបានមកដល់គោលដៅវិញ នៅថ្ងៃទី១០ ខែមករា ឆ្នាំ២០២១ ដោយចំណាយពេល៩៧ថ្ងៃ៕
Tag:
រត់ជាមួយសាយ
មន្ទីរពេទ្យកុមារអង្គរ
© រក្សាសិទ្ធិដោយ thmeythmey.com
