.png)
.jpg)
.jpg)
ព្រឹទ្ធសភាថៃ បានអនុម័តសេចក្តីព្រាងច្បាប់គាំទ្រអាពាហ៍ពិពាហ៍ភេទដូចគ្នា
- ថ្ងៃអង្គារ ទី១៨ ខែមិថុនា ឆ្នាំ២០២៤ ម៉ោង ៨:៥៩ នាទី យប់
សហគមន៍អ្នកស្រលាញ់ភេទដូចគ្នានៅថៃ ។ រូបភាព ៖ AFP
ព្រឹទ្ធសភាថៃនៅថ្ងៃទី១៨ ខែមិថុនា បានអនុម័តជាផ្លូវការនៃសេចក្តីព្រាងច្បាប់សមភាពអាពាហ៍ពិពាហ៍ ដែលស្គាល់ជាទូទៅជាច្បាប់គាំទ្រអាពាហ៍ពិពាហ៍ភេទដូចគ្នា។ ថៃនឹងក្លាយជាទឹកដីទីបីនៅអាស៊ី ដែលទទួលស្គាល់គូស្នេហ៍ស្រលាញ់ភេទដូចគ្នា បន្ទាប់ពីនេប៉ាល់ និងដែនកោះតៃវ៉ាន់។
ក្រោយពីតាក់តែងអស់មួយទសវត្សន៍ សេចក្តីព្រាងច្បាប់ទទួលស្គាល់អាពាហ៍ពិពាហ៍សម្រាប់អ្នកស្រលាញ់ភេទដូចគ្នា ត្រូវបានគាំទ្រដោយសមាជិកសភាថៃស្ទើរតែទាំងអស់ ហើយនឹងត្រូវបញ្ជូនទៅព្រះបរមរាជវាំង ដើម្បីសុំការយល់ព្រមពីព្រះមហាក្សត្រ។ ច្បាប់នេះ នឹងចូលជាធរមានរយៈពេល ១២០ថ្ងៃ បន្ទាប់ពីព្រះមហាក្សត្រថៃឡាយព្រះហត្ថលេខា។
ក្រោយច្បាប់នេះចូលជាធរមាន បុគ្គលដែលស្រលាញ់ភេទដូចគ្នា នឹងមានចំណងផ្លូវច្បាប់ពេញលេញ ដូចបុរស និងស្រ្តីដែរ ពោលគឺអាចចុះសំបុត្រអាពាហ៍ពិពាហ៍បាន (អេតាស៊ីវិល)។
ថៃ ជាកន្លែងទាក់ទាញអ្នកស្រឡាញ់ភេទដូចគ្នាជាយូរមកហើយ ជាមួយនឹងការបង្ហាញពីសង្គមអ្នកស្រឡាញ់ភេទដូចគ្នាយ៉ាងរស់រវើក សម្រាប់អ្នកក្នុងស្រុក និងជាគោលដៅទាក់ទាញជនបរទេស ដ៏មានប្រជាប្រិយភាព។
គណៈកម្មការសង្គមស៊ីវិលនៃសមភាពអាពាហ៍ពិពាហ៍ សកម្មជន និងគូស្វាមីភរិយាក្រុមអ្នកស្រលាញ់ភេទដូចគ្នា បាននិយាយថា ការអនុម័តច្បាប់នេះ នឹងបញ្ជាក់ពីភាពជាអ្នកដឹកនាំរបស់ថៃនៅក្នុងតំបន់ សម្រាប់ការលើកកម្ពស់សិទ្ធិមនុស្ស និងសមភាពយេនឌ័រ។ នេះបើតាមសារព័ត៌មាន Reuters។
នៅដើមខែមិថុនា អ្នកស្រលាញ់ភេទដូចគ្នា និងសកម្មជនរាប់ពាន់នាក់ បានប្រារព្ធពិធីដង្ហែក្បួនតាមដងផ្លូវ ក្នុងទីក្រុងបាងកក ហើយត្រូវបានចូលរួមដោយនាយករដ្ឋមន្រ្តីថៃ លោក សេដ្ឋា ថាវីស៊ីន ដោយបានពាក់អាវឥន្ទធនូ ដើម្បីអបអរខែមោទកភាព ចំពោះក្រុមអ្នកស្រលាញ់ភេទដូចគ្នា៕
© រក្សាសិទ្ធិដោយ thmeythmey.com
Tag:
