.png)
កម្ពុជា-ឥណ្ឌា ប្រារព្ធព្រឹត្តិការណ៍យោគៈអន្តរជាតិ ដើម្បីអប់រំផ្លូវចិត្ត
- ថ្ងៃពុធ ទី១៩ ខែមិថុនា ឆ្នាំ២០២៤ ម៉ោង ៨:៥៩ នាទី យប់
រដ្ឋាភិបាលកម្ពុជា និងស្ថានទូតឥណ្ឌា បានប្រារព្ធព្រឹត្តិការណ៍យោគៈអន្តរជាតិ លើកទី១០ ដើម្បីធ្វើលំហាត់រាងកាយ និងអប់រំផ្លូវចិត្ត ។ ព្រឹត្តិការណ៍នេះ រៀបចំឡើងនៅពហុកីឡដ្ឋានជាតិអូឡាំពិក នាព្រឹកថ្ងៃទី១៩ មិថុនា។
រដ្ឋាភិបាលកម្ពុជា និងស្ថានទូតឥណ្ឌា បានប្រារព្ធព្រឹត្តិការណ៍យោគៈអន្តរជាតិ លើកទី១០ នៅពហុកីឡដ្ឋានជាតិអូឡាំពិក នាព្រឹកថ្ងៃទី១៩ មិថុនា។ យោគៈអន្តរជាតិ គឺជាលំហាត់ប្រាណ ផ្នែករាងកាយ និងការអប់រំផ្លូវចិត្ត ដែលត្រូវបានទទួលស្គាល់ជាសកល នៅឆ្នាំ២០១៤។
លោកស្រី Devyani Khobragade ឯកអគ្គរដ្ឋទូតឥណ្ឌាប្រចាំនៅកម្ពុជា បានបញ្ជាក់ថា យោគៈអន្តរជាតិនៅឆ្នាំនេះ ជាសារមួយ ដើម្បីលើកកម្ពស់សន្តិភាពនៅក្នុងសង្គម និងពិភពលោក។ បើតាមលោកស្រី Devyani យោគៈអន្តរជាតិនេះ គឺជាលំហាត់ប្រាណដ៏ល្អ សម្រាប់ផ្នែករាងកាយ និងការអប់រំផ្លូវចិត្ត។
ក្រៅពីអប់រំផ្លូវចិត្តហើយ ព្រឹត្តិការណ៍យោគៈនេះ ក៏ជាផ្នែកមួយ ជួយផ្សព្វផ្សាយសក្ដានុពលទេសចរណ៍កម្ពុជា លើកឆាកអន្តរជាតិ ក៏ដូចជាពង្រឹងកិច្ចសហប្រតិបត្តិការកម្ពុជា-ឥណ្ឌា តាមរយៈការលើកកម្ពស់ទំនាក់ទំនងសង្គម វប្បធម៌ សេដ្ឋកិច្ច និងរវាងប្រជាជននិងប្រជាជន ។ នេះបើតាមលោក ហ៊ុល សីលា អនុរដ្ឋលេខាធិការក្រសួងទេសចរណ៍។
កន្លងមកក្រសួងទេសចរណ៍ បានសហការជាមួយស្ថានទូតឥណ្ឌាប្រចាំកម្ពុជា រៀបចំទិវាយោគៈអន្តរជាតិចំនួន ៩លើកហើយ នៅតាមគោលដៅទេសចរណ៍សំខាន់ៗ ដូចជា រាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកណ្តាល និងខេត្តបាត់ដំបង។ បើតាមលោក សីលា ព្រឹត្តិការណ៍នេះ បានទាក់ទាញសាធារណជន ភ្ញៀវទេចរជាតិ និងអន្តរជាតិជាច្រើន។
គួរបញ្ជាក់ថា រដ្ឋាភិបាលកម្ពុជា និងស្ថានទូតឥណ្ឌា បានប្រារព្ធព្រឹត្តិការណ៍យោគៈអន្តរជាតិនេះ ចាប់តាំងពីឆ្នាំ២០១៥មក។ យោគៈអន្តរជាតិ ត្រូវបានចុះបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ នៅឆ្នាំ២០១៦៕
© រក្សាសិទ្ធិដោយ thmeythmey.com
Tag:
.gif)
