.png)
ឯកអគ្គរាជទូតអង់គ្លេស ដើរកម្សាន្តលើកំពែងក្រុងអង្គរធំ១២គីឡូម៉ែត្រ និងជិះកង់បីទៅប្រាសាទនានា
- ថ្ងៃអាទិត្យ ទី១៤ ខែកក្កដា ឆ្នាំ២០២៤ ម៉ោង ៣:២០ នាទី រសៀល
សៀមរាប៖ លោក ដូមីនិក វីល្លៀម ឯកអគ្គរាជទូតអង់គ្លេសប្រចាំកម្ពុជា បានជ្រើសយករមណីយដ្ឋានអង្គរ ជាគោលដៅដំណើរកម្សាន្តដ៏ល្អ។ លោក ដូមីនិក វីល្លៀម បានដើរកម្សាន្តលើកំពែងក្រុងអង្គរធំប្រវែង១២គីឡូម៉ែត្រ។ អ្នកការទូតរូបនេះ ដើរកម្សាន្តយ៉ាងសាមញ្ញតាមកង់បីខ្មែរ ទៅតាមតំបន់ទេសចរណ៍នានាក្នុងរមណីយដ្ឋានអង្គរ និងខេត្តសៀមរាប។
«ចុងសប្តាហ៍ល្អនៅសៀមរាប! ប្រាសាទបុរាណតែងតែអស្ចារ្យ! យើងក៏បានហាត់ប្រាណនៅអង្គរធំ - យឺតបន្តិច ប៉ុន្តែទេសភាពអស្ចារ្យ។» លោក ដូមីនិក វីល្លៀម បានបង្ហោះសារលើបណ្ដាញសង្គមហ្វេសប៊ុកដូច្នេះ។
ឯកអគ្គរាជទូតអង់គ្លេសនិយាយខ្មែររូបនេះ ធ្វើដំណើរកម្សាន្តលើទឹកដីបេតិកភណ្ឌវប្បធម៌ដ៏ពិសិដ្ឋរបស់កម្ពុជា ជាមួយមិត្តរួមថ្នាក់នៅសាកលវិទ្យាល័យ។ លោក វីល្លៀម ជិះឡានក្រុង និងកង់បីខ្មែរ និងពិសារម្ហូបខ្មែរនៅតាមភោជនីយដ្ឋាន។
«យើងបានញ៉ាំម្ហូបខ្មែរដ៏ឆ្ងាញ់មួយចំនួនរួមទាំងទឹកគ្រឹងផងដែរ»។ លោក វីល្លៀម ថ្លែងដូច្នេះ។ នេះមិនមែនជាលើកទីមួយនោះទេ សម្រាប់អ្នកការទូតអង់គ្លេសរូបនេះ។ ជារឿងៗលោកតែងតែផ្សព្វផ្សាយសកម្មភាពដើរកម្សាន្តនៅឧទ្យានអង្គរ និងតំបន់ទេសចរណ៍នានា លើបណ្ដាញសង្គមរបស់លោក។
លោក ដូមីនិក វីល្លៀម បានដើរកម្សាន្តលើកំពែងក្រុងអង្គរធំ និងទៅកម្សាន្តប្រាសាទតាព្រហ្ម ប្រាសាទអង្គរវត្ត និងកន្លែងផ្សេងៗជាច្រើន។ ស្លៀកពាក់សមញ្ញ លោក ដូមីនិក វីល្លៀម ជិះកង់បីខ្មែរ ហើយសរសើរ និងអរគុណអ្នកដឹកកង់បីថែមទៀតផង។
ការផ្សព្វផ្សាយសកម្មភាពដើរកម្សាន្តរបស់បុគ្គលល្បី២ ពិតជាបានចូលរួមទាក់ទាញទេសចរអន្តរជាតិ និងជួយផ្សព្វផ្សាយពីតំបន់ទេសចរណ៍ដ៏អស្ចារ្យក្នុងប្រទេសកម្ពុជា។ សកម្មភាពទាំងនេះ ក៏បង្ហាញពីសុវត្ថិភាពក្នុងការដើរលេងកម្សាន្តនៅក្នុងប្រទេសកម្ពុជាផងដែរ៕
© រក្សាសិទ្ធិដោយ thmeythmey.com
Tag:
.gif)
