.png)
.png)
.jpg)
.jpg)
ដងស្ទឹងសៀមរាប និងតំបន់វត្តរាជបូណ៌ នឹងក្លាយជាគោលដៅទេសចរណ៍ដែលគ្មានសំឡេងរំខាន
- ថ្ងៃចន្ទ ទី១៥ ខែកក្កដា ឆ្នាំ២០២៤ ម៉ោង ១២:០៩ នាទី រសៀល
វត្តរាជបូណ៌ ក្រុងសៀមរាប។ រូបថត៖ អុីសា រ៉ហានី
សៀមរាប៖ បន្ទាប់ពីរមណីយដ្ឋានអង្គរ និងតំបន់ផាប់ស្ទ្រីត រដ្ឋបាលខេត្តសៀមរាប នឹងអភិវឌ្ឍ និងរៀបចំតំបន់មាត់ស្ទឹងសៀមរាប និងតំបន់ជុំវិញវត្តរាជបូណ៌ ឱ្យក្លាយជាគោលដៅទេសចរណ៍ទី៣ នាពេលអនាគត។ នេះជាការលើកឡើងរបស់ លោក យុន លីនណេ អភិបាលរងខេត្តសៀមរាប។
ដោយបានគាំទ្រពីរាជរដ្ឋាភិបាល, រដ្ឋបាលខេត្តសៀមរាប នឹងអភិវឌ្ឍន៍ដងស្ទឹងសៀមរាប និងតំបន់ជុំវិញវត្តរាជបូណ៌ ឱ្យក្លាយជាគោលដៅទេសចរណ៍ថ្មីនៅក្នុងក្រុង ដើម្បីជួយទាក់ទាញភ្ញៀវទេសចរបន្ថែមមកកម្សាន្តក្នុងក្រុងទេសចរណ៍មួយនេះ។ ក្នុងកម្មវិធី «ទស្សនៈមួយ សៀមរាបមួយ» ដែលរៀបចំនៅ Rose Apple Square នាថ្ងៃទី១២ កក្កដា លោក យុន លីនណេ បានបញ្ជាក់ថា ដងស្ទឹងសៀមរាប និងតំបន់ជុំវិញវត្តរាជបូណ៌ នឹងត្រូវរៀបចំឱ្យក្លាយជាតំបន់ដែលរស់នៅប្រកបដោយសុខដុម និងមិនមានសំឡេងរំខាន។
បច្ចុប្បន្ន រដ្ឋបាលខេត្តកំពុងរៀបចំកិច្ចសហការជាមួយដៃគូអភិវឌ្ឍន៍ និងអង្គការដៃគូ ហើយកំពុងរៀបចំអនុវត្តន៍សាកល្បងនៅលើខ្សែមួយ ភ្ជាប់ពីផ្លូវជាតិលេខ៦ ដល់វត្តរាជបូណ៌។
លោក យុន លីនណេ ថ្លែងក្នុងកម្មវិធី ទស្សនៈមួយ សៀមរាបមួយ។ លុយ សិរីរក្សា
កន្លងមក លោក យុន លីនណេ បានបង្ហាញពីគម្រោងអភិវឌ្ឍន៍ និងរៀបចំនៅភូមិរាជបូណ៌ ដែលមានឈ្មោះល្បីល្បាញ និងជាប់ជាទីតាំងសែនមនោរម្យបំផុតទាំង៥១ លើពិភពលោក ដែលផ្តល់ដោយ គេហទំព័រទេចរណ៍ Time Out។ បើតាមអភិបាលរងរូបនេះ រដ្ឋបាលខេត្តសៀមរាប នឹងរៀបចំដាំដើមឈើលម្អបន្ថែមតាមខ្សែផ្លូវក្នុងភូមិនេះ ពិសេសនៅតាមមាត់ស្ទឹង ក្នុងន័យបង្កើនភាពទាក់ទាញតំបន់នេះឱ្យកាន់តែល្អប្រសើរ។
សម្រាប់កម្មវិធី ទស្សនៈមួយ សៀមរាបមួយ ដែលរៀបចំឡើងដោយវិស័យឯកជនក្នុងក្រុង ឯណោះវិញ លោក យុន លីនណេ បានចាត់ទុកថាជាព្រឹត្តិការណ៍សំខាន់ ក្នុងការជំរុញសក្កានុពលខេត្តសៀមរាប ដែលវិស័យអចលទ្រព្យដើរតួសំខាន់ដើម្បីបង្កើតបរិយាកាសល្អដល់ភ្ញៀវទេសចរមកកាន់ខេត្តសៀមរាប តាមរយៈការបង្កើតជាផ្ទះស្នាក់ ខុនដូ និងការជួលអចលនទ្រព្យផ្សេងៗ ទាំងការរស់នៅ និងប្រកបអាជីវកម្ម។ សម្រាប់ លោក យុន លីនណេ ខេត្តសៀមរាបនៅតែជាប៉ូលទេសចរណ៍មួយដ៏សំខាន់របស់កម្ពុជា ហើយមិនយូរនោះទេ ស្ថានភាពសេដ្ឋកិច្ចក្នុងតំបន់នេះនឹងល្អប្រសើរជាបន្តបន្ទាប់៕
កម្មវិធី ទស្សនៈមួយ សៀមរាបមួយ នៅ Rose Apple Square។ លុយ សិរីរក្សា
© រក្សាសិទ្ធិដោយ thmeythmey.com
Tag:
