.png)
ការរាតត្បាតរបស់សត្វល្អិតចង្រៃលើដំណាំស្រូវ មិនទាន់ធ្ងន់ធ្ងរឡើយ ក្រោយមន្ត្រីជំនាញចុះទប់ស្កាត់
- ថ្ងៃចន្ទ ទី១៥ ខែកក្កដា ឆ្នាំ២០២៤ ម៉ោង ៣:៤៩ នាទី រសៀល
លោក ងិន ឆាយ អគ្គនាយក នៃអគ្គនាយកដ្ឋានកសិកម្ម។
ភ្នំពេញ៖ ការរាតត្បាតរបស់ពពួកសត្វល្អិត មានដូចជា ដង្កូវហ្វូង រុយស និងដង្កូវមូរស្លឹក បានប៉ះពាល់លើដំណាំស្រូវជាង ៥ម៉ឺនហិកតា ។ នេះបើតាមលោក ងិន ឆាយ អគ្គនាយក នៃអគ្គនាយកដ្ឋានកសិកម្ម ដោយបន្តអះអាងថា ស្ថានភាពពេលនេះ អាចគ្រប់គ្រងបាន និងមិនទាន់ធ្លាក់ក្នុងសភាពធ្ងន់ធ្ងរគួរឱ្យព្រួយបារម្ភទេ។
១ខែចុងក្រោយនេះ ពពួកសត្វល្អិតចង្រៃ បានបំផ្លាញដំណាំស្រូវរបស់ប្រជាកសិករ នៅខេត្តមួយចំនួន ក្នុងប្រទេសកម្ពុជា។ បន្ទាប់ពីបង្ក្រាបករណីដង្កូវហ្វូងបំផ្លាញដំណាំស្រូវ មន្រ្តីក្រសួងកសិកម្ម រុក្ខាប្រមាញ់ និងនេសាទ កំពុងមមាញឹកទប់ស្កាត់ការយាយីរបស់សត្វរុយសវិញម្ដង។
នាដំណើរចុះពិនិត្យស្ថានភាពការបំផ្លាញដំណាំស្រូវរបស់សត្វល្អិតដូចជា ដង្កូវហ្វូង រុយស និងដង្កូវមូរស្លឹក នៅខេត្តព្រៃវែង លោក ងិន ឆាយ អគ្គនាយកនៃអគ្គនាយកដ្ឋានកសិកម្ម បានវាយតម្លៃថា សភាពការណ៍មានភាពធូរស្រាល និងអាចគ្រប់គ្រងបាន។ បើតាមលោក ងិន ឆាយ ការបំផ្លាញដំណាំស្រូវរបស់សត្វល្អិតចង្រៃទាំងនេះ បានប៉ះពាល់លើដំណាំស្រូវជាង៥ម៉ឺនហិកតា ប៉ុន្តែការខូចខាតមានទំហំតូចនៅឡើយ។
មន្រ្តីកសិកម្មចុះពិនិត្យដំណាំស្រូវដែលរងការបំផ្លាញពីសត្វរុយសនៅខេត្តព្រៃវែង។ រូបភាពពីក្រសួងកសិកម្ម រុក្ខាប្រមាញ់ និងនេសាទ។
ក្នុងវីដេអូផ្សាយលើគណនីហ្វេសប៊ុកក្រសួងកសិកម្ម លោក ងិន ឆាយ លើកឡើងដូច្នេះ៖«ស្រែដែលខូចខាតធ្ងន់ធ្ងរ ដោយសារតែការបំផ្លាញចម្រុះពីសត្វរុយស និងដង្កូវមូរស្លឹក មកបន្ថែមទៀត។ ដូច្នេះស្រែដែលមានបំផ្លាញពីរុយសផង និងដង្កូវមូរផង ធ្វើឱ្យស្រូវនោះមានសភាពធ្ងន់ធ្ងរ រហូតដល់ខូចខាតទាំងស្រុង»។
អគ្គនាយកកសិកម្មរូបនេះ បន្ថែមថា តាមរយៈកិច្ចអន្តរាគមន៍របស់ក្រសួងកសិកម្ម និងក្រសួងសេដ្ឋកិច្ច រួមទាំងអាជ្ញាធរពាក់ព័ន្ធ ក្នុងការកម្ចាត់ពពួកសត្វល្អិតចង្រៃបំផ្លាញដំណាំស្រូវរបស់ប្រជាកសិករ កន្លងមកនេះ គឺសម្រេចបានជោគជ័យ។ ជុំវិញបញ្ហាសត្វល្អិតបំផ្លាញដំណាំស្រូវរបស់កសិករ លោក ងិន ឆាយ សង្កេតឃើញថា ស្រូវដែលរងការបំផ្លាញពីសត្វរុយសភាគច្រើន ជាប្រភេទស្រូវស្រាលមិនប្រកាន់រដូវ ជាពិសេសកើតមានលើស្រែដែលប្រើជាតិអាសូត និងព្រោះគ្រាប់ពូជច្រើនពេក។
អត្ថបទទាក់ទង
លោក ងិន ឆាយ អំពាវនាវដល់កសិករកាត់បន្ថយបរិមាណគ្រាប់ពូជ និងប្រើប្រាស់ជីឱ្យបានត្រឹមត្រូវ។ ជាមួយគ្នានេះ ត្រូវផ្ដល់ព័ត៌មានឱ្យបានឆាប់រហ័សទៅកាន់មន្រ្តីកសិកម្ម ដើម្បីដោះស្រាយ និងទប់ស្កាត់ទាន់ពេលវេលា៕
មន្រ្តីកសិកម្មចុះពិនិត្យដំណាំស្រូវដែលរងការបំផ្លាញពីសត្វរុយសនៅខេត្តព្រៃវែង។ រូបភាពពីក្រសួងកសិកម្ម រុក្ខាប្រមាញ់ និងនេសាទ។
© រក្សាសិទ្ធិដោយ thmeythmey.com
Tag:
.gif)
