.png)
សុវត្ថិភាព ចំណាយទាប! ពលរដ្ឋងាកពីការប្រើមធ្យោបាយធ្វើដំណើរផ្ទាល់ខ្លួនមករកសេវាឡានសាធារណៈវិញ
- ថ្ងៃអង្គារ ទី១៦ ខែកក្កដា ឆ្នាំ២០២៤ ម៉ោង ៩:៥៩ នាទី ព្រឹក
ភ្នំពេញ៖ មិនត្រឹមតែមានសុវត្ថិភាពហើយចំណាយថវិកាទាបនោះទេ! ការប្រើប្រាស់សេវារថយន្តក្រុងសាធារណៈបានជួយកាត់បន្ថយការកកស្ទះនិងគ្រោះថ្នាក់ចរាចរណ៍ រួមទាំងផលប៉ះពាល់បរិស្ថានបានថែមទៀត។ ការណ៍នេះហើយទើបធ្វើឱ្យមានសាធារណជនកាន់តែច្រើន មិនថាជាសិស្ស-និស្សិត ព្រះសង្ឃ អ្នកធ្វើការងារនានា បានងាកពីការប្រើប្រាស់មធ្យាបាយធ្វើដំណើរផ្ទាល់ខ្លួន មកប្រើប្រាស់សេវាឡានក្រុងសាធារណៈវិញដែលមានតម្លៃត្រឹម១៥០០រៀលប៉ុណ្ណោះ ពីគោលដៅទៅគោលដៅមួយទៀត។
សូមអញ្ជើញលោកអ្នកនាងទស្សនាវីដេអូដូចតទៅ៖
ជួយសម្រួលបន្ទុកអាណាព្យាបាលក្នុងការជូនទៅរៀន
ជាង២ឆ្នាំហើយ ដែលកុមារី រុន ស៊ីណារតន៍ បានប្រើប្រាស់រថយន្តសាធារណៈជាមធ្យោបាយធ្វើដំណើរចេញពីសាលារៀនរបស់ខ្លួនត្រលប់មកផ្ទះវិញ។ ក្នុងនាមសិស្ស ស៊ីណារតន៍ មិនចំណាយលើថ្លៃធ្វើដំណើរនេះ សូម្បីតែ១០០រៀលឡើយ។ សិស្សថ្នាក់ទី៧នៅវិទ្យាល័យជាស៊ីមជ្រោយចង្វាររូបនេះបានបញ្ជាក់ថា៖ «ការជ្រើសរើសជិះឡានក្រុង គឺចំណេញថវិកា និងមិនចាំបាច់ឱ្យអ្នកផ្ទះមកយក ពេលចេញពីរៀននោះទេ។ ការជិះឡានក្រុងសាធារណៈ មានសុវត្ថិភាពជាជាងបើកបរដោយខ្លួនឯងក្រោមអាយុ១៨ឆ្នាំទៅទៀត»។
រាល់ការធ្វើដំណើរ កុមារីវ័យ១៣ឆ្នាំរូបនេះ តែងបង្ហាញនូវក្តីគោរព និងសុជីវធម៌ដល់អ្នកបើកបរឡាងក្រុង ដោយនាងលើកដៃសំពះមុនឡើងឡាន ហើយជម្រាបលាគាត់ពេលចុះវិញ។ ក្នុងឯកសណ្ឋានជាសិស្ស ស៊ីណារតន៍ បានអរគុណដល់អ្នកបើកឡានក្រុងសាធារណៈដែលបានផ្តល់នូវសុវត្ថិភាពហើយសេវាកម្មល្អដល់នាង។ ជាពិសេសនោះ ការប្រើប្រាស់មធ្យោបាយធ្វើដំណើរនេះ បានធ្វើឱ្យអាណាព្យាបាលរបស់ស៊ីណារតន៍ មិនចំណាយពេលវេលា ចំណាយថ្លៃសាំង និងប្រឈមនូវហានិភ័យនានា ក្នុងការទទួលនាងចេញពីសាលារៀនតែម្តង។
កុមារី រុន ស៊ីណារតន៍
លើសពីនេះ នាងបានរៀបរាប់យ៉ាងដូច្នេះ៖ «ជិះឡានក្រុងនារដូវវស្សា ធ្វើឱ្យយើងមិនត្រូវទឹកភ្លៀង។ រីឯរដូវក្ដៅវិញជួយឱ្យយើងត្រជាក់ផងដែរ»។ កុមារី រុន ស៊ីណារតន៍ ចង់ឃើញប្រជាពលរដ្ឋ ចូលរួមប្រើប្រាស់សេវាឡានក្រុងសាធារណៈឱ្យច្រើន ដើម្បីកាត់បន្ថយស្ទះចរាចរណ៍ និងលើកកម្ពស់ជីវភាពរស់នៅប្រចាំថ្ងៃ តាមរយៈកាត់បន្ថយការចំណាយលើមធ្យោបាយធ្វើដំណើរផ្ទាល់ខ្លួន។
ចំណាយតិច តែមានសុវត្ថិភាព!
អស់ត្រឹម១៥០០រៀលប៉ុណ្ណោះ ក្នុងការជិះឡានក្រុងសាធារណៈ ពីគោលដៅមួយទៅគោលដៅមួយទៀត។ អ្នកស្រី យឹម សុភក្រ្ក័ ដែលជាអាជីវករលក់ដូរមួយកន្លែងនៅរាជធានីភ្នំពេញបានប្រើប្រាស់មធ្យោបាយធ្វើដំណើរនេះ ពីចំណុចគីឡូលេខ៦ ក្នុងខណ្ឌឫស្សីកែវ ឆ្ពោះទៅគោលដៅនៅម្តុំស្ដុបបូកគោ ដែលស្ថិតនៅក្នុងខណ្ឌបឹងកេងកង ជារៀងរាល់ថ្ងៃ។ អាជីករវ័យ៥៤រូបនេះ បានបញ្ជាក់ថា ធ្វើដំណើរតាមឡានក្រុងនេះ ចំណាយអស់តិច ហើយមានសុវត្ថិភាពទៀត។ លើសពីនេះ ឡានសាធារណៈ មានម៉ាស៊ីនត្រជាក់ល្អថែមទៀត។
លោកស្រី យឹម សុភក្រ្ក័ បានប្រើប្រាស់មធ្យោបាយសាធារណៈនេះ តាំងពីឆ្នាំ២០១៨មកម្ល៉េះ។ ក្រៅពីសេវាកម្មល្អ និងមានសុវត្ថិភាពហើយ អ្នកស្រីក៏មើលឃើញពីសកម្មភាពអ្នកបើកបរឡានក្រុងសាធារណៈ បានគោរពច្បាប់ចរាចរណ៍ល្អត្រឹមត្រូវ ជាពិសេសគឺឱ្យធ្វើដំណើរចុះផ្ដេសផ្ដាស់ឡើយ ដើម្បីធានាសុវត្ថិភាព។
អ្នកស្រី យឹម សុភក្រ្ក័
អ្នកប្រើប្រាស់សេវាសាធារណៈឡានក្រុង អស់រយៈពេល៦ឆ្នាំរូបនេះ បានសង្កេតឃើញថា កន្លងមកមិនសូវជាមានពលរដ្ឋជិះច្រើនប៉ុន្មាននោះទេ ប៉ុន្តែបច្ចុប្បន្នមានប្រជាពលរដ្ឋ និងសិស្សានុសិស្សច្រើនជាងមុន បានងាកមកប្រើសេវារថយន្ដសាធារណៈនេះ។ អ្នកមើលឃើញថា អ្នកប្រើប្រាស់សេវាសាធារណៈនេះ ភាគច្រើន គឺជាសិស្ស កម្មករ កម្មការិនី និងមនុស្សចាស់ជាដើម។ «ខ្ញុំសប្បាយចិត្តដែលរដ្ឋមានសេវាកម្មឡានក្រុង ដើម្បីសម្រួលដល់ការធ្វើដំណើរប្រចាំថ្ងៃរបស់ពលរដ្ឋ។ ខ្ញុំចង់ឱ្យមានសេវាឡានក្រុងសាធារណៈតាមផ្លូវផ្សេងៗទៀត អាចបង្កើតឱ្យបានច្រើនខ្សែជាងមុន ដើម្បីងាយស្រួលឆ្លងកាត់ ពីផ្លូវមួយទៅផ្លូវមួយទៀត»។ នេះជាការលើកឡើងរបស់លោកស្រី សុភក្រ្ក័។
សម្រាប់អ្នកប្រើប្រាស់មធ្យោបាយធ្វើដំណើរសាធារណៈម្នាក់ទៀត ក៏រៀបរាប់មិនខុសពីអ្នកខាងលើប៉ុន្មានដែរ។ រាល់ថ្ងៃលោកស្រី ស៊ូ ម៉ារីណា។ អ្នកស្រី ម៉ារីណា បានធ្វើដំណើរទៅមក ពីចំណុចស្ពានជ្រោយចង្វារ ឆ្ពោះទៅកាន់រកាកោង និងពីរកាកោងទៅជ្រោយចង្វារ។
ការប្រើប្រាស់សេវាកម្មឡានក្រុងសាធារណៈនេះ បានជួយកាត់បន្ថយថ្លៃចំណាយរបស់លោកស្រីយ៉ាងច្រើនពីប្រមាណ ២០ ០០០រៀល មកនៅត្រឹម៣ ០០០រៀលប៉ុណ្ណោះ ក្នុងមួយថ្ងៃ។ ចំពោះអ្នកស្រី ម៉ារីណា មធ្យោបាយធ្វើដំណើរតាមឡានក្រុងសាធារណៈនេះ គឺជាមធ្យោបាយដ៏ល្អបំផុត ដែលចំណាយអស់ទាបហើយមានសុវត្ថិភាពទៀត។
អ្នកស្រី ស៊ូ ម៉ារីណា
«ដោយសារ ខ្ញុំមានជីវភាពមិនសូវធូរធារ នៅពេលមានឡានក្រុងសាធារណៈជិះបែបនេះ ខ្ញុំសប្បាយចិត្តត្រេកអរដែលមានសេវាកម្មជិះរថយន្ត ព្រោះបានកាត់បន្ថយការចំណាយលើការធ្វើដំណើរប្រចាំថ្ងៃមួយកម្រិត។ រីឯអ្នកបើកបររថយន្តក្រុង មានក្រមសីលធម៌ល្អ និងមានការយកចិត្តទុកដាក់ខ្ពស់ ចំពោះប្រជាពលរដ្ឋ និងសិស្សានុសិស្ស ដែលបានធ្វើដំណើរលើរថយន្តថែមទៀតផង»។ នេះជាការបន្ថែមរបស់អ្នកស្រី ស៊ូ ម៉ារីណា មើលឃើញថា សេវារថយន្តក្រុងសាធារណៈនៅរាជធានីភ្នំពេញ មានភាពល្អប្រសើរទាំងការបើកបរ និងសុវត្ថិភាព នឹងចូលរួមចំណែកពន្លឿន ការធ្វើដំណើររបស់ប្រជាពលរដ្ឋ ជាពិសេសកាត់បន្ថយការចំណាយ ទៅលើសេវាដឹកជញ្ជូនឯកជនមានតម្លៃខ្ពស់។
លោក ជួប ចាន់ថុល បម្រើការជាអ្នកបើកបរឡានក្រុងសាធារណៈ អស់រយៈពេលជាង៦ឆ្នាំមកហើយ។ លោក បើកឡានក្រុងខ្សែ១A ចេញដំណើរពីចំណតវិមានឈ្នះ-ឈ្នះ ឆ្ពោះទៅចំណតវាលស្បូវ ចាប់ពីម៉ោង១២ថ្ងៃត្រង់ ដល់៨កន្លះយប់។
កំណើនអ្នកងាកមកជិះឡានក្រុងសាធារណៈ ភាគច្រើន គឺជាសិស្សានុសិស្ស និងមនុស្សចាស់។ លោក ចាន់ថុល សង្កេតឃើញបែបនេះដែលសប្បាយចិត្តពេលឃើញអ្នកប្រើប្រាស់សេវាសាធារណៈនេះ តែងតែតម្លៃលើរូបខ្លួន តាមរយៈវិកាយវិការគោរព និងលើកដៃសំពះជាដើម។ «ខ្ញុំសប្បាយចិត្តដែលបានបម្រើការងារជាអ្នកបើកបរឡានក្រុងសាធារណៈ ព្រោះអាចជួយសម្រួលការធ្វើដំណើររបស់សិស្ស និងប្រជាពលរដ្ឋនៅរាជធានីភ្នំពេញ»។ លោក ជួប ចាន់ថុល បាននិយាយបែបនេះ មកកាន់សារព័ត៌មានឌីជីថលថ្មីៗ (ThmeyThmey)។
តាមរយៈការងារនេះ ក៏បានសម្រួលបន្ទុកគ្រួសារលោក ចាន់ថុល បានមួយកម្រិត ហើយមានពេលវេលាច្រើន ជួបជុំគ្រួសារទៀត។ បុរសមានវ័យ៤៩ឆ្នាំរូបនេះ មានពេលឈប់សម្រាក៤ថ្ងៃក្នុងមួយខែ។
លោក ជួប ចាន់ថុល អ្នកបើកឡានក្រុងសាធារណៈ
បទពិសោធន៍ជាង៦ឆ្នាំ ជាអ្នកបើកឡានក្រុងសាធារណៈ លោក ជួប ចាន់ថុល បន្តថា៖«ក្នុងនាមខ្ញុំជាអ្នកបើកឡាន មុនបើកឡានខ្ញុំត្រូវមានស្មារតីគ្រប់គ្រាន់ និងប្រុងប្រយ័ត្នខ្ពស់ ដើម្បីធានាសុវត្ថិភាព ជួនប្រជាពលរដ្ឋដែលជិះឡានក្រុងជាមួយខ្ញុំ»។ លោក ចាន់ថុល បាននិយាយបែបនេះ ដែលចង់ឃើញប្រជាពលរដ្ឋកាន់តែច្រើន ងាកមកប្រើប្រាស់សេវាឡានក្រុងសាធារណៈ ដើម្បីកាត់បន្ថយស្ទះចរាចរណ៍។ ជាមួយគ្នានេះ លោកក៏ចង់ឃើញអ្នកប្រើប្រាស់សេវាសាធារណៈគ្រប់រូប ចូលរួមរក្សាអនាម័យ និងមិនបង្កភាពឡូឡា ឬសកម្មភាពមិនគប្បីណាមួយដល់អ្នកជិះដទៃ ដើម្បីភាពថ្លៃថ្នូរសង្គម។
រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ សម្រេចដាក់ឱ្យប្រតិបត្តិការ នូវសេវាដឹកជញ្ចូនសាធារណៈរថយន្តក្រុងនេះ ក្នុងគោលដៅចូលរួមកាត់បន្ថយការកកស្ទះ និងគ្រោះថ្នាក់ចរាចរណ៍ កាត់បន្ថយចំណាយរបស់ពលរដ្ឋ និងកាត់បន្ថយផលប៉ះពាល់បរិស្ថាន។ សេវាសាធារណៈរថយន្តក្រុង ចាប់ផ្ដើមដំណើរការពីម៉ោង៥កន្លះព្រឹក ដល់ម៉ោង៨កន្លះយប់ ដោយតម្លៃសំបុត្រ១ ៥០០ រៀលក្នុងម្នាក់ ឬ១លើក។ ចំពោះព្រះសង្ឃ ជនចាស់ជរា ជនពិការ កម្មករ កម្មការិនី សិស្ស និស្សិត និងកុមារ ដែលមានកម្ពស់ក្រោម១ម៉ែត្រ មិនតម្រូវឱ្យបង់លុយឡើយ។
ក្រៅពីរាជធានីភ្នំពេញ នៅបណ្តាខេត្តមួយចំនួន ដូចជា ប៉ៃលិន ព្រះសីហនុ ក៏មានសេវារថយន្តក្រុងសាធារណៈនេះដែរ។ ប្រជាពលរដ្ឋ និងសិស្សានុសិស្ស បានស្នើរដ្ឋាភិបាលឱ្យពង្រីកសេវាឡានក្រុងសាធារណៈ ឱ្យបានគ្រប់ខេត្ត-ក្រុង ដើម្បីកាត់បន្ថយការចំណាយរបស់ពលរដ្ឋ ការកកស្ទះ និងគ្រោះថ្នាក់ចរាចរណ៍នានា៕
លោក ហោ ដួង អ្នកបើកឡានក្រុងសាធារណៈ
© រក្សាសិទ្ធិដោយ thmeythmey.com
Tag:
