.png)
ក្រុមអ្នកជំនាញ ជួសជុលចម្លាក់តោដែលបាក់បែក នៅប្រាសាទបាខែងឡើងវិញ
- ថ្ងៃអង្គារ ទី១៦ ខែកក្កដា ឆ្នាំ២០២៤ ម៉ោង ៩:៥៩ នាទី យប់
ក្រុមការងារ នៃអាជ្ញាធរជាតិអប្សរាកំពុងជួសជុលចម្លាក់តោជណ្ដើរខាងត្បូង នៃប្រាសាទបាខែង។ រូបភាពអាជ្ញាធរជាតិអប្សរា៕
ដោយ៖ អោត រត់
សៀមរាប៖ ចម្លាក់តោចំនួន១២ នៃជណ្ដើរទិសខាងត្បូងប្រាសាទបាខែង កំពុងទទួលការជួសជុលឡើងវិញ ពីក្រុងអ្នកជំនាញខ្មែរ និងអាម៉េរិក។ បើតាមការចេញផ្សាយរបស់អាជ្ញាធរជាតិអប្សរា ការជួសជុលនេះ ធ្វើឡើងនៅផ្នែកមួយចំនួនដូចជាផ្នែកជើងទម្រជើងចម្លាក់ដែលបាក់បែក, ដងខ្លួន និងក្បាលនៃចម្លាក់ជាដើម។
លោក វ៉ាន វ៉ា ប្រធានការដ្ឋានជួសជុលនៅប្រាសាទភ្នំបាខែង ត្រូវបានអាជ្ញាធរជាតិអប្សរា ស្រង់សម្ដីមកចុះផ្សាយថា ចម្លាក់តោទាំងនោះ ក៏ធ្លាប់ត្រូវបានជួសជុលម្តងមកហើយ កាលពីសម័យអាណាព្យាបាលបារាំង។
សព្វថ្ងៃ ក្នុងចំណោមចម្លាក់តោទាំង១២នេះ មាន៧ហើយដែលត្រូវបានជួសជុលរួចរាល់ ពោលបច្ចុប្បន្នគឺអ្នកជំនាញបន្តជួសជុលចម្លាក់ចំនួន ៥បន្តទៀត។ លោក វ៉ាន វ៉ា ឱ្យដឹងទៀតថា ក្នុងអំឡុងពេលជួសជុលនេះ អ្នកជំនាញក៏ឃើញមានបំណែកតោមួយចំនួនដែលរងការខូចខាតធ្ងន់ធ្ងរ មិនអាចកំណត់អត្តសញ្ញាណ ដើម្បីផ្គុំឡើងវិញបានដែរ។
ការជួសជុលជណ្ដើរផ្នែកខាងត្បូង នៃប្រាសាទបាខែង។ រូបភាពអាជ្ញាធរជាតិអប្សរា៕
ក្រៅពីជួសជុលចម្លាក់តោ ក្រុមការងារជួសជុល ក៏កំពុងជួសជុលរចនាសម្ពន្ធជណ្ដើរ១ថ្នាក់ នៅទិសខាងត្បូង នៃប្រាសាទផងដែរ បន្ទាប់បីបញ្ចប់៤ថ្នាក់រួចមក។ ការងារនេះសម្រេចបានប្រមាណ ៨០ភាគរយ និងត្រូវការពេលប្រមាណ៥ខែទៀត ដើម្បីបង្ហើយការងារដែលសេសសល់។ នេះបើតាមលោក វ៉ាន វ៉ា។
សូមជម្រាបថា ការជួសជុលរចនាសម្ពន្ធរបស់ប្រាសាទភ្នំបាខែងនេះ អនុវត្តន៍ក្រោមកិច្ចសហប្រតិបត្តិការរវាងអាជ្ញាធរជាតិអប្សរា និងអង្គការមូលនិធិប្រាសាទពិភពលោក (World Monument Fund) សហរដ្ឋអាម៉េរិក។ អស់ពេល៣៥ឆ្នាំមកហើយ ដែលអង្គការមួយនេះ បានចូលរួមជួសជុល និងអភិរក្ស ក្នុងរមណីយដ្ឋានអង្គរ។ តាំងពីឆ្នាំ១៩៨៩មមក WMF បានសម្រេចការជួសជុល និងអភិរក្សប្រាសាទតាសោម ប្រាសាទព្រះខ័ន ចម្លាក់កូរសមុទ្រទឹកដោះ នៃប្រាសាទអង្គរវត្ត និងបច្ចុប្បន្នប្រាសាទភ្នបាខែង៕
© រក្សាសិទ្ធិដោយ thmeythmey.com
Tag:
.gif)
