.png)
.png)
.jpg)
.jpg)
ASEAN U19៖ ជាការជួបគ្នាលើកទី៥ កម្ពុជា រំពឹងបាន៣ពិន្ទុ ពីទីម័រខាងកើត នៅជំនួបបើកឆាក
- ថ្ងៃពុធ ទី១៧ ខែកក្កដា ឆ្នាំ២០២៤ ម៉ោង ៩:០៩ នាទី ព្រឹក
លោក ភា សុភ័ក្ដ្រា គ្រូបង្វឹក U-19 កម្ពុជា និយាយក្នុងសន្និសីទសារព័ត៌មុនប្រកួត រូបពី FFC
ក្នុងពូល A ក្រុម U-19 កម្ពុជា ត្រូវប្រកួតជាមួយទីម័រខាងកើត ក្នុងព្រឹត្តិការណ៍ ASEAN U19 Boys’ Championship 2024 នាថ្ងៃទី១៧ ខែកក្កដា ឆ្នាំ២០២៤ នៅកីឡដ្ឋាន Gelora Bung Tomo ប្រទេសឥណ្ឌូណេស៊ី វេលាម៉ោង ៣រសៀល។ ក្នុងសន្និសីទមុនប្រកួត លោក ភា សុភ័ក្ដ្រា គ្រូបង្វឹកកម្ពុជា បានប្ដេជ្ញានឹងប្រឹងអស់ពីសមត្ថភាព ដើម្បីនាំយកលទ្ធផលល្អពីការប្រកួតនេះ។
ជាការជួបគ្នាលើកទី៥រវាងក្រុមទាំង២ ក្នុងព្រឹត្តិការណ៍ ASEAN U19។ ដោយឡែកជំនួប៤លើកកន្លងមក ក្នុងឆ្នាំ២០២២ កម្ពុជា ចាញ់លទ្ធផល៤-១, ឆ្នាំ២០១៨ ទីម័រខាងកើត ឈ្នះ ២-១, ឆ្នាំ២០១៧ ក្រុមទាំង២ស្មើ ក្នុងលទ្ធផល១-១ និងក្នុងឆ្នាំ២០១៣ កម្ពុជា ចាញ់លទ្ធផល ៣-១។
ទោះជាលទ្ធផលមិនសូវល្អក៏ដោយ លោក ភា សុភ័ក្ដ្រា ប្ដេជ្ញានឹងជំរុញឲ្យកីឡាករកម្ពុជាប្រឹងអស់ពីសមត្ថភាពដើម្បីនាំយកលទ្ធផលល្អពីព្រឹត្តិការណ៍នេះ។ យោងលើផេកសហព័ន្ធបាល់ទាត់កម្ពុជា គ្រូបង្វឹកកម្ពុជារូបនេះ បាននិយាយដូច្នេះថា៖«ការប្រកួតនេះសំខាន់សម្រាប់ប្រជាជនយើង ខ្ញុំនឹងធ្វើឲ្យអស់ពីសមត្ថភាព ដើម្បីបងប្អូនទាំងអស់គ្នាពេញចិត្ត និងសប្បាយចិត្ត ដើម្បីរួមចំណែកអភិវឌ្ឍបាល់ទាត់ដ៏ស្រស់ស្អាតរបស់យើងបន្ដទៀត មិនថាលីគ ក្លិប និងជម្រើសជាតិ។»។
ក្នុងថ្ងៃជាមួយគ្នានេះ ម្ចាស់ផ្ទះ ឥណ្ឌូណេស៊ី ដែលនៅក្នុងពូល A ត្រូវប្រកួតជាមួយ ហ្វីលីពីន នៅកីឡដ្ឋានដដែរនេះ វេលាម៉ោង ៧:៣០យប់។
គួរបញ្ជាក់ផងដែរថា ការប្រកួតព្រឹត្តិការណ៍ពានរង្វាន់បាល់ទាត់យុវជនអាយុក្រោម១៩ឆ្នាំអាស៊ាន មាន១២ប្រទេសចូលរួម ដូចជា៖អូស្ដ្រាលី, ព្រុយណេ, កម្ពុជា, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី, ថៃ, ទីម័រខាងកើត, វៀតណាម និងម្ចាស់ផ្ទះ ឥណ្ឌូណេស៊ី។ ការប្រកួតត្រូវចែកចេញជា ៣ពូល ក្នុង១ពូលមាន៤ប្រទេស។ ពូល A មាន៖ ឥណ្ឌូណេស៊ី កម្ពុជា ហ្វីលីពីន និងទីម័រ។ ចំណែក ពូល B មាន៖ឡាវ វៀតណាម មីយ៉ាន់ម៉ា និងអូស្ដ្រាលី ខណៈ ពូល C មាន៖ ម៉ាឡេស៊ី ថៃ សិង្ហបុរី និងព្រុយណេ៕
© រក្សាសិទ្ធិដោយ thmeythmey.com
Tag:
