.png)
.png)
.jpg)
.jpg)
លោក ស សុខា ព្រមានចាត់ការលើមន្ត្រីពុករលួយ ពាក់ព័ន្ធនឹងគម្រោងមូលនិធិឃុំ-សង្កាត់
- ថ្ងៃពុធ ទី១៧ ខែកក្កដា ឆ្នាំ២០២៤ ម៉ោង ១២:១៤ នាទី រសៀល
រដ្ឋមន្ត្រីក្រសួងមហាផ្ទៃ លោក ស សុខា បានព្រមានចាត់វិធានការចំពោះមន្ត្រីទាំងឡាយ និងអ្នកទទួលការណា ដែលបានបំពានក្រមសីលធម៌វិជ្ជាជីវៈ ឬមានការពាក់ព័ន្ធទៅនឹងភាពមិនប្រក្រតី ក្នុងការដេញថ្លៃគម្រោងមូលនិធិឃុំ-សង្កាត់។ ការព្រមានបែបនេះ របស់លោក ស សុខា គឺបន្ទាប់ពីក្រសួងមហាផ្ទៃ សង្កេតឃើញថា មានភាពមិនប្រក្រតីកំពុងកើតមានឡើង ពាក់ព័ន្ធនឹងការអនុវត្តគម្រោងមូលនិធិឃុំ សង្កាត់ មានដូចជា ការក្លែងបន្លំ ការបង្ខិតបង្ខំ អំពើពុករលួយ និងភាពរញ៉េរញ៉ៃ គ្មានសណ្តាប់ធ្នាប់នៅក្នុងកិច្ចប្រជុំបើកសំណើដេញថ្លៃគម្រោងជាដើម។
អំពើពុករលួយ ភាពរញ៉េរញ៉ៃ ឥតសណ្តាប់នៅក្នុងការអនុវត្ត និងដំណើរការដេញថ្លៃ និងការអនុវត្ត«គម្រោងមូលនិធិឃុំ-សង្កាត់» ដែលកំពុងកើតមាននៅតាមមូលដ្ឋាន ធ្វើឱ្យ លោក ស សុខា រដ្ឋមន្ត្រីក្រសួងមហាផ្ទៃ មិនសប្បាយចិត្តនោះឡើយ។
រដ្ឋមន្ត្រីក្រសួងមហាផ្ទៃ លោក ស សុខា បានព្រមានចាត់វិធានការចំពោះមន្ត្រីទាំងឡាយ និងអ្នកទទួលការណា ដែលបានបំពានក្រមសីលធម៌វិជ្ជាជីវៈ ឬមានការពាក់ព័ន្ធទៅនឹងភាពមិនប្រក្រតី ក្នុងការដេញថ្លៃគម្រោងមូលនិធិឃុំ-សង្កាត់។ ការព្រមាននេះធ្វើឡើងតាមរយៈ លិខិតចុះថ្ងៃទី១៦ ខែកក្កដា។
នៅក្នុងលិខិតនោះ លោក ស សុខា ព្រមានដូច្នេះ៖« ចាត់វិធានការឱ្យបានម៉ឺងម៉ាត់ ចំពោះមន្ត្រីរាជការ សមាជិកក្រុមប្រឹក្សា ស្មៀនឃុំ សង្កាត់ អ្នកទទួលការទាំងឡាយណា ដែលបានប្រព្រឹត្តកំហុសឆ្គង បំពានក្រមសីលធម៌វិជ្ជាជីវៈ ដោយមិនបានអនុវត្តតាមតួនាទី ភារកិច្ចរបស់ខ្លួន ឬ មានការពាក់ព័ន្ធទៅនឹងភាពមិនប្រក្រតី ការគប់គិត ការក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយ ផ្សេងៗក្នុងការដេញថ្លៃគម្រោងមូលនិធិឃុំ សង្កាត់»។
បើតាមលោក ស សុខា កន្លងមកក្រសួងមហាផ្ទៃ សង្កេតឃើញថាមានភាពមិនប្រក្រតីកំពុងកើតមានឡើងគួរឱ្យកត់សម្គាល់ ពាក់ព័ន្ធនឹងការអនុវត្តគម្រោងមូលនិធិឃុំ សង្កាត់ បណ្តាលមកពីការមិនយកចិត្តទុកដាក់ និងភាពទន់ខ្សោយនៃការគ្រប់គ្រង ចាត់ចែង ក្នុងកិច្ចដំណើរការអនុវត្តគម្រោង។
ក្រៅពីនេះ ក្រសួងមហាផ្ទៃ ជាញឹកញាប់ ក៏ទទួលបានបណ្តឹងជាលាយលក្ខណ៍អក្សរ តាមប្រព័ន្ធតេឡេក្រាម និងតាមទូរសព្ទ ពីអ្នកទទួលការមួយចំនួន ពាក់ព័ន្ធនឹងការអនុវត្តគម្រោងមូលនិធិឃុំ-សង្កាត់ របស់មន្ត្រីទីចាត់ការផែនការ និងវិនិយោគរាជធានី-ខេត្តមួយចំនួន។
បណ្តឹងលើភាពមិនប្រក្រតីទាំងនោះ រួមមាន ការរៀបចំបញ្ជីឈ្មោះអ្នកទទួលការប្រចាំឆ្នាំមិនមានតម្លាភាព, ការដេញថ្លៃមិនបានប្រកាសជាសាធារណៈ, ការចុះអនុវត្តគម្រោងមុនការដេញថ្លៃ, ការពន្យារការដេញថ្លៃដោយមិនបានកំណត់កាលបរិច្ឆេទច្បាស់លាស់នៃការដេញថ្លៃបន្ទាប់ និងការអនុវត្តគម្រោងរបស់អ្នកទទួលការមិនស្របតាមបទដ្ឋានបច្ចេកទេសជាដើម។ លើសពីនេះ សារព័ត៌មានមួយចំនួន ក៏បានផ្សាយជាហូរហែពីភាពមិនប្រក្រតី និងភាពរញ៉េរញ៉ៃ គ្មានសណ្តាប់ធ្នាប់ នៅក្នុងកិច្ចប្រជុំបើកសំណើដេញថ្លៃគម្រោងមូលនិធិឃុំ សង្កាត់នេះផងដែរ។
ក្រៅពីព្រមានចាត់ការមន្ត្រី និងអ្នកដែលពាក់ព័ន្ធនឹងភាពមិប្រក្រតី នៅក្នុងគម្រោងមូលនិធិឃុំ សង្កាត់ហើយនោះ លោក ស សុខា ក៏បានប្រាប់ឱ្យថ្នាក់ដឹកនាំរាជធានី-ខេត្ត ឱ្យពិនិត្យមើលការអនុវត្តការងាររបស់ ទីចាត់ការផែនការវិនិយោគនិងរដ្ឋបាលឃុំ សង្កាត់ ដើម្បីតម្លាភាព និងប្រសិទ្ធភាពនៃការអនុវត្តគម្រោងមូលនិធិ ឃុំ-សង្កាត់។
ឧបនាយករដ្ឋមន្ត្រី ស សុខា ប្រាប់ឱ្យអាជ្ញាធរ ប្រកាសដំណឹងដេញថ្លៃ គម្រោងមូលនិធិឃុំ សង្កាត់ ជាសាធារណៈ និងរៀបចំសំណើគម្រោង អនុវត្តនីតិវិធីលទ្ធកម្ម និងអនុវត្តកិច្ចសន្យាដោយយកចិត្តទុកដាក់។
លោក រដ្ឋមន្ត្រី ក៏បានប្រាប់ឱ្យអាជ្ញាធរឃុំ ពង្រឹងការរៀបចំទុកដាក់ រក្សាឱ្យគង់វង្ស ឯកសារសំណើគម្រោង និងឯកសារកិច្ចសន្យាគម្រោងនានា ព្រមទាំងត្រូវពិនិត្យបញ្ជាក់បច្ចេកទេសត្រឹមត្រូវ និងត្រូវផ្អែកតាមតម្លៃឯកតាដែលបានសរសេរ ក្នុងសំណើដេញថ្លៃដែលឈ្នះ នៅពេលមានការផ្លាស់ប្តូរទីតាំងគម្រោង ឬបង្កើនបន្ថែមលទ្ធផល គម្រោងដើម្បីធានាបានទាំងបរិមាណ និងគុណភាព។ «ត្រូវពង្រឹងការគ្រប់គ្រងវិន័យ សណ្តាប់ធ្នាប់ និងរបៀបរៀបរយនៃកិច្ចប្រជុំបើកសំណើដេញថ្លៃ»។ នេះជាការណែនាំរបស់លោក ស សុខា ដែលលោកបន្តបញ្ជាក់ឱ្យ ចាត់ការផែនការវិនិយោគនិងរដ្ឋបាលឃុំ សង្កាត់ ពង្រឹងការគ្រប់គ្រងការដាក់ប្រាក់កក់, ការដកប្រាក់កក់ធានាការដេញថ្លៃ និងការដាក់ប្រាក់កក់ និងការដកប្រាក់កក់ធានាការអនុវត្តកិច្ចសន្យា ឱ្យបានត្រឹមត្រូវតាម សៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ផងដែរ។
ករណី លើកឬពន្យារការដេញថ្លៃ ត្រូវតែបញ្ជាក់ពីកាលបរិច្ឆេទ និងពេលវេលាដេញថ្លៃបន្ទាប់ឱ្យបានច្បាស់។ ទន្ទឹមនឹងនេះ ក៏ត្រូវពង្រឹងការតាមដាន និងការត្រួតពិនិត្យគុណភាពគម្រោងមូលនិធិឃុំ សង្កាត់ ឱ្យជាប់លាប់ ដើម្បីធានាពីបទដ្ឋានបច្ចេកទេសនៃ ការអនុវត្តគម្រោង។
នៅក្នុងលិខិតដដែល រដ្ឋមន្ត្រីក្រសួងមហាផ្ទៃបញ្ជាក់ ករណីរកឃើញកំហុសឆ្គងនៅក្នុងការអនុវត្តការងារ មន្ត្រី និងអ្នកពាក់ព័ន្ធ នឹងត្រូវចាត់វិធានការ ស្របតាមមាត្រា៨៤នៃច្បាប់ស្តីពីការគ្រប់គ្រងរដ្ឋបាលឃុំ សង្កាត់ ចំពោះក្រុមប្រឹក្សាឃុំ សង្កាត់។ ចំពោះមន្ត្រី រាជការស៊ីវិល ត្រូវចាត់វិធានការស្របតាមមាត្រា៤០ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល។
ចំពោះអ្នកទទួលការ គឺត្រូវវិធានការស្របតាមចំណុច ៣.២.៧ និង ៣.១១ នៃសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ និងត្រូវ បញ្ចប់កិច្ចសន្យាចំពោះបុគ្គលិកជាប់កិច្ចសន្យា។
ចំពោះអ្នកទទួលការ គឺត្រូវវិធានការស្របតាមចំណុច ៣.២.៧ និង ៣.១១ នៃសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ និងត្រូវ បញ្ចប់កិច្ចសន្យាចំពោះបុគ្គលិកជាប់កិច្ចសន្យា។
វិន័យទាំងនេះមិនរាប់បញ្ចូលនូវទោសទណ្ឌផ្សេងៗឡើយ។ នេះបើតាមលោក ស សុខា៕
© រក្សាសិទ្ធិដោយ thmeythmey.com
