.png)
ព្រឹទ្ធសភា កំណត់តួនាទី ភារកិច្ច និងសមត្ថកិច្ចរបស់គណៈកម្មការទាំង១០ រួមទាំងក្រុមសមាជិកា
- ថ្ងៃពុធ ទី១៧ ខែកក្កដា ឆ្នាំ២០២៤ ម៉ោង ៥:២៩ នាទី ល្ងាច
សម្ដេច ហ៊ុន សែន ប្រធានព្រឹទ្ធសភា ដឹកនាំកិច្ចប្រជុំកាលពីថ្ងៃទី១៧កក្កដា ឆ្នាំ២០២៤។ រូបពី ព្រឹទ្ធសភា
ភ្នំពេញ៖ គណៈកម្មាធិការអចិន្ត្រៃយ៍ព្រឹទ្ធសភាបានពិនិត្យ និងសម្រេចពីតួនាទី ភារកិច្ច និងសមត្ថកិច្ចរបស់គណៈកម្មការទាំង១០និងក្រុមសមាជិកាព្រឹទ្ធសភាផងដែរ។ នេះបើតាមសេចក្ដីប្រកាសព័ត៌មានស្ដីពីលទ្ធផលប្រជុំរបស់គណៈកម្មាធិការអចិន្ត្រៃយ៍ព្រឹទ្ធសភា។
គណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ បានបើកកិច្ចប្រជុំនាព្រឹកថ្ងៃទី១៧កក្កដា ក្រោមការដឹកនាំរបស់ សម្តេច ហ៊ុន សែន ប្រធានព្រឹទ្ធសភាដើម្បីពិនិត្យពីភារកិច្ចរបស់គណៈកម្មការនីមួយៗក្នុងព្រឹទ្ធសភា។
ក្រោយពីពិនិត្យ និងពិភាក្សារួចមកគណៈកម្មាធិការអចិន្ត្រៃយ៍ព្រឹទ្ធសភា ដែលមានសម្ដេច ដឹកនាំ បានសម្រេចនិងអនុម័តលើ តួនាទី ភារកិច្ច និងសមត្ថកិច្ចរបស់គណៈកម្មការក្នុងព្រឹទ្ធសភាទាំង១០។ ក្រៅពីនេះ ក៏បាន ពិនិត្យនិងសម្រេចពីតួនាទីភារកិច្ច និងសមត្ថកិច្ចរបស់ក្រុមសមាជិកាព្រឹទ្ធសភាផងដែរ។
គណៈកម្មការទី១ ទទួលបន្ទុកសិទ្ធិមនុស្សទទួលពាក្យបណ្តឹង និងអង្កេត មានលោក ងី ច័ន្ទ្រផល ជាប្រធាន។ ទី២ គឺគណៈកម្មការសេដ្ឋកិច្ចហិរញ្ញវត្ថុ ធនាគារនិងសវនកម្ម ដែលដឹកនាំដោយលោក ធន់ វឌ្ឍនា ជាប្រធាន។ គណៈកម្មការផែនការវិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន ដែលជាគណៈកម្មការទី៣ដឹកនាំដោយលោក ម៉ុង ឫទ្ធី។
លោក នាង ផាត ជាប្រធានគណៈកម្មការទី៤ ដែលទទួលបន្ទុកមហាផ្ទៃ ការពារជាតិ, ទី៥ គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន ដឹកនាំដោយលោក លោក ចែម វីឌ្យ៉ា។ គណៈកម្មការទី៥ ផ្នែកនីតិកម្ម និងយុត្តិធម៌ មានលោកស្រី ចាន់ សុទ្ធាវី ជាប្រធាន។
ទី៧ គឺគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ ស្ថិតក្រោមការដឹកនាំរបស់លោក ឈិត សុខុន រីឯគណៈកម្មការទី៨ ផ្នែកសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និង កិច្ចការនារី មានលោកស្រី មាន សំអាន ជាប្រធាន។
ទី៩ គណៈកម្មការសាធារណការ ដឹកជញ្ជូន អាកាសចរស៊ីវិល ប្រៃសណីយ៍ ទូរគមនាគមន៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ ដឹកនាំដោយលោក អ៊ុំ សារឹទ្ធ ចំណែកលោក ម៉ម ប៊ុននាង ជាប្រធានគណៈកម្មការទី១០ ដែលទទួលបន្ទុកលើការងារអង្កេត បោសសំអាត និងប្រឆាំងអំពើពុករលួយ។
សភាជាន់ខ្ពស់របស់កម្ពុជា ដឹកនាំដោយសម្តេច ហ៊ុន សែន អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា ដោយមានលោក ប្រាក់ សុខុន ជាអនុប្រធានទី១ និងលោក អ៊ុច បូររិទ្ធ ជាអនុប្រធានទី២។
តាមរយៈការបោះឆ្នោតអសកល គណបក្សប្រជាជនកម្ពុជាមាន៥៥អាសនៈ គណបក្សឆន្ទៈខ្មែរ មាន៣អាសនៈ។ លោក សុខ ឥសាន និងលោក ហេង ហាលីម ជាសមាជិក ដែលត្រូវបានជ្រើសតាំងដោយរដ្ឋសភា រីឯសម្តេចរាជបុត្រីព្រះអនុជ នរោត្តម អរុណរស្មី និងព្រះអង្គម្ចាស់ ស៊ីសុវត្ថិ ធម្មិកោ ជាសមាជិកដែលត្រូវបានព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ចាត់តាំង តាមព្រះរាជក្រឹត្យចុះថ្ងៃទី៦ ខែមីនា៕
© រក្សាសិទ្ធិដោយ thmeythmey.com
Tag:
.gif)
