.png)
.png)
.jpg)
.jpg)
អ្នកតាមដានសង្គម សាទរការរុះស្លាកគ្រឿងស្រវឹងតាមផ្លូវ និងស្នើឱ្យមានច្បាប់គ្រប់គ្រង
- ថ្ងៃសុក្រ ទី១៩ ខែកក្កដា ឆ្នាំ២០២៤ ម៉ោង ៧:៥៩ នាទី ព្រឹក
បទបញ្ជាឱ្យរុះរើស្លាកផ្សព្វផ្សាយពាណិជ្ជកម្មគ្រឿងស្រវឹងតាមដងផ្លូវ បានទទួលការសាទរពី អ្នកតាមដានបញ្ហាសង្គម និងពីសាធារណជន។ ទន្ទឹមនឹងការសាទរ អ្នកតាមដានបញ្ហាសង្គម ចង់ឱ្យកម្ពុជា មានច្បាប់គ្រប់គ្រងគ្រឿងស្រវឹងនេះក្នុងពេលឆាប់ៗ ដើម្បីកាត់បន្ថយគ្រោះថ្នាក់ចរាចរណ៍ ហិង្សាក្នុងគ្រួសារ និងធ្វើឱ្យសុជីវធម៌ និងសីលធម៌ក្នុងសង្គមប្រសើរ។
ក្នុងសប្ដាហ៍នេះ សកម្មភាពរុះរើផ្ទាំងប៉ាណូផ្សព្វផ្សាយពាណិជ្ជកម្មស្រាបៀរតាមផ្លូវ នៅតាមបណ្ដាខេត្តមួយចំនួនបានចាប់ផ្ដើមជាបន្តបន្ទាប់។ ផ្ដើមពីខេត្តកំពង់ស្ពឺ បន្តមកតាកែវ ក្រចេះ ស្ទឹងត្រែង កណ្ដាល រហូតដល់ខេត្តបាត់ដំបង បានចាប់ផ្ដើមរុះរើផ្ទាំងប៉ាណូផ្សព្វផ្សាយពាណិជ្ជកម្មស្រាបៀរនៅតាមផ្លូវ។ សកម្មភាពរុះរើជាបន្តបន្ទាប់បែបនេះ ធ្វើឡើងក្រោយពីរដ្ឋមន្ត្រីក្រសួងមហាផ្ទៃ ចេញគោលការណ៍ឱ្យគ្រប់រដ្ឋបាលខេត្តពិនិត្យឡើងវិញ ឯកសារទទួលផ្សព្វផ្សាយគ្រឿងស្រវឹង។
អ្នកតាមដានបញ្ហាសង្គម បានសាទរចំពោះបទបញ្ជាឱ្យរុះរើស្លាកស្រាបៀរ និងគ្រឿងស្រវឹងនេះ ទន្ទឹមនឹងការទទូចចង់ឱ្យកម្ពុជាមានច្បាប់គ្រប់គ្រងផលិតផលគ្រឿងស្រវឹងឆាប់ៗ។
លោកបណ្ឌិត ឈត ប៊ុនថង អ្នកជំនាញទស្សនវិជ្ជា បានសាទរយ៉ាងពេញទំហឹង។ បើតាមលោកបណ្ឌិត ឈត ប៊ុនថង ការណ៍ដែលខេត្តជាច្រើនចាប់ផ្ដើមរុះរើផ្ទាំងប៉ាណូនេះ បានបង្ហាញឱ្យឃើញពីការចូលរួមចំណែករបស់គណៈអភិបាលខេត្ត ក្នុងការកាត់បន្ថយនូវការជំរុញ និងលើកកម្ពស់ការសេពគ្រឿងស្រវឹង។
លោកបណ្ឌិត ឈត ប៊ុនថង អ្នកជំនាញទស្សនវិជ្ជា។ រូបភាពពីហ្វេសប៊ុកលោកបណ្ឌិត ឈត ប៊ុនថង។
«ជាការពិត ថ្វីដ្បិតតែរូបភាពនៃការផ្សព្វផ្សាយគ្រឿងស្រវឹងមានច្រើន ប៉ុន្តែការផ្សព្វផ្សាយគ្រឿងស្រវឹងតាមផ្ទាំងប៉ាណូនេះ វាមានលក្ខណៈអចិន្រ្តៃយ៍ និងនៅជាប់ជារៀងរហូត។ ជាពិសេសពេលដែលកុមារ និងយុវជនធ្វើដំណើរទៅសាលារៀន បានឃើញផ្ទាំងទាំងអស់នេះ។ ម៉្យាងទៀត ពេលបរទេសគេមកឃើញ ហាក់បង្ហាញឱ្យឃើញថាយើង [កម្ពុជា]ឱ្យតម្លៃលើការសេពគ្រឿងស្រវឹង។»។ អ្នកជំនាញទស្សនវិជ្ជា លើកឡើងដូច្នេះ។
លោក ឈត ប៊ុនថង បន្តថា ការរុះរើ និងទម្លាក់ផ្ទាំងប៉ាណូស្រាបៀរចេញពីតាមផ្លូវជាផ្នែកមួយកាត់បន្ថយបញ្ហាគ្រោះថ្នាក់ចរាចរណ៍ អំពើហិង្សាក្នុងគ្រួសារ ការប៉ះពាល់សុខភាពចំពោះអ្នកសេពគ្រឿងស្រវឹង និងការចំណាយមិនចាំបាច់ផ្សេងៗ។ បើទោះបីការរុះរើជាចំណែកកាត់បន្ថយនូវបញ្ហាផ្សេងៗ ប៉ុន្តែលោកបណ្ឌិត ឈត ប៊ុនថង ទាមទារឱ្យរដ្ឋាភិបាលពិចារណាលើការតាក់តែងច្បាប់ស្ដីពីការគ្រប់គ្រងគ្រឿងស្រវឹង រួមទាំងការផ្សព្វផ្សាយគ្រឿងស្រវឹងលើប្រព័ន្ធផ្សព្វផ្សាយ។
សកម្មភាពរុះរើផ្ទាំងផ្សព្វផ្សាយពាណិជ្ជកម្មស្រាបៀរនៅស្រុកបាណន់ខេត្តបាត់ដំបង។
មិនខុសពីលោកបណ្ឌិត ឈត ប៊ុនថង ឡើយ អ្នកជំនាញទស្សនវិជ្ជា និងជាអ្នកតាមដានសង្គម លោកបណ្ឌិត ប៉ា ច័ន្ទរឿន ក៏ស្នើឱ្យរដ្ឋាភិបាលបង្កើតច្បាប់ស្ដីពីការគ្រប់គ្រងគ្រឿងស្រវឹងផងដែរ។ លោកបណ្ឌិត ប៉ា ច័ន្ទរឿន បញ្ជាក់ដូច្នេះ៖«ដើម្បីឱ្យយន្តការ និងកិច្ចការងារគ្រប់គ្រងគ្រឿងស្រវឹង ការទប់ស្កាត់ផលវិបាកដែលកើតឡើងនៅក្នុងសង្គមមានប្រសិទ្ធភាពខ្ពស់ ទាល់តែមានច្បាប់គ្រប់គ្រងគ្រឿងស្រវឹង»។
សម្រាប់អ្នកតាមដានសង្គមរូបនេះ កម្ពុជាមិនទាន់មានច្បាប់ស្ដីពីការគ្រប់គ្រងគ្រឿងស្រវឹងនៅឡើយទេ ខណៈប្រទេសថៃ និងវៀតណាម បានអនុម័តច្បាប់នេះរួចហើយ។ បើតាមលោក ប៉ា ច័ន្ទរឿន ការអនុម័តច្បាប់ស្ដីពីការគ្រប់គ្រងគ្រឿងស្រវឹងបានកាន់តែឆាប់ នឹងកាន់តែល្អ ដែលជាយន្តការមួយក្នុងការទប់ស្កាត់បញ្ហាបង្កដោយគ្រឿងស្រវឹង រួមទាំងការកំណត់អាយុសម្រាប់អ្នកទទួលទានផងដែរ។
លោកបណ្ឌិត ប៉ា ច័ន្ទរឿន អ្នកជំនាញទស្សនវិជ្ជា និងជាអ្នកតាមដានសង្គម។ រូបភាពពីហ្វេសប៊ុកលោកបណ្ឌិត ប៉ា ច័ន្ទរឿន។
ដោយឡែក ពាក់ព័ន្ធនឹងចំណាត់ការរុះរើផ្ទាំងប៉ាណូ លោក ប៉ា ច័ន្ទរឿន មើលឃើញថាជារឿងល្អ ដែលជាការចាប់ផ្ដើមពិនិត្យឡើងវិញពីការផ្សព្វផ្សាយគ្រឿងស្រវឹងនៅក្នុងសង្គមកម្ពុជា។ «ខ្ញុំមើលឃើញថា វាជាសញ្ញាល្អ ដែលអាជ្ញាធរយកចិត្តទុកដាក់ និងគិតគូរពីផលជះអវិជ្ជមាននៃការផ្សព្វផ្សាយគ្រឿងស្រវឹងតាមទីសាធារណៈ និងផលវិបាកទៅលើសង្គមទាំងក្នុងរយៈពេលខ្លី និងវែង។»។
ក្រៅពីនេះ លោក ប៉ា ច័ន្ទរឿន ក៏បានលើកពីរបាយការណ៍នៃការសេពគ្រឿងស្រវឹងហួសប្រមាណរបស់ប្រជាជនខ្មែរ ជាពិសេសការផ្សព្វផ្សាយពាណិជ្ជកម្មយ៉ាងទូលំទូលាយ។ អ្នកជំនាញទស្សនវិជ្ជារូបនេះ សង្ឃឹមថាគ្រប់២៥រាជធានី-ខេត្ត នឹងអនុវត្តវិធានការនេះ ដើម្បីឈានដល់ការកាត់បន្ថយគ្រោះថ្នាក់ចរាចរណ៍ រួមទាំងបញ្ហាផ្សេងៗដែលបង្កដោយការសេពគ្រឿងស្រវឹង។
ចំណែកផ្ទាំងប៉ាណូស្រាបៀរដែលរុះរើ និងទម្លាក់ចេញ តើគួរជំនួសដោយផ្ទាំងអ្វី? ទាំងលោក ឈត ប៊ុនថង និងលោក ប៉ា ច័ន្ទរឿន សុទ្ធតែយល់ថាខេត្តនីមួយៗ គួរតែដាក់សារអប់រំទាំងពុទ្ធចក្រ និងអាណាចក្រ ឬគោលនយោបាយអភិវឌ្ឍន៍ជាតិជាដើម។ ការណ៍នេះ នឹងជួយពង្រឹង និងពង្រីកចំណេះដឹងរបស់ប្រជាពលរដ្ឋបន្ថែមទៀត។
សកម្មភាពរុះរើផ្ទាំងផ្សព្វផ្សាយពាណិជ្ជកម្មស្រាបៀរនៅស្រុកបាណន់ខេត្តបាត់ដំបង។
ដើម្បីរៀបចំសណ្តាប់ធ្នាប់ នៃការផ្សព្វផ្សាយពាណិជ្ជកម្មផលិតផលគ្រឿងស្រវឹង តាមគ្រប់មធ្យោបាយប្រព័ន្ធផ្សព្វផ្សាយ និងការដាក់តាំងបង្ហាញជាសាធារណៈគ្រប់កន្លែង ប្រមុខរដ្ឋាភិបាលកម្ពុជា ក៏បានបង្កើតក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង កាលពីចុងខែមេសា ឆ្នាំ២០២៤ផងដែរ។ ក្រុមការងារនេះ មានលោក នេត្រ ភក្ត្រា រដ្ឋមន្ត្រីក្រសួងព័ត៌មានជាប្រធាន និងរដ្ឋមន្ត្រីសុខាភិបាល, រដ្ឋមន្ត្រីពាណិជ្ជកម្ម រដ្ឋមន្ត្រីឧស្សាហកម្ម ជាអនុប្រធាន។
អត្ថបទទាក់ទង
សូមបញ្ជាក់ថា ក្នុងពិធីប្រកាសចូលកាន់តំណែងរបស់អភិបាលខេត្តកំពង់ធំ កាលពីថ្ងៃទី៨ កក្កដា លោក ស សុខា បានណែនាំអភិបាលរាជធានី-ខេត្តទាំងអស់ ឱ្យសើរើឡើងវិញ ឯកសារព្រមព្រៀងជាមួយក្រុមហ៊ុនផលិតគ្រឿងស្រវឹង ពាក់ព័ន្ធនឹងការផ្សាយស្លាកពាណិជ្ជកម្ម។ បើតាមឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ការឈានទៅបញ្ចប់ការផ្សព្វផ្សាយគ្រឿងស្រវឹងតាមទីសាធារណៈ ដើម្បីកាត់បន្ថយទំនោរទទួលទានគ្រឿងស្រវឹង និងគ្រោះថ្នាក់ចរាចណ៍ដែលបង្កដោយគ្រឿងស្រវឹង៕
© រក្សាសិទ្ធិដោយ thmeythmey.com
Tag:
