.jpg)
.jpg)
ក្រសួងសេដ្ឋកិច្ច ពិនិត្យឡើងវិញនៃចំណាយសាធារណៈ មុនឈានដល់ការកាត់សន្សំ ឬបង្វែរចំណាយ
- ថ្ងៃពុធ ទី២៨ ខែសីហា ឆ្នាំ២០២៤ ម៉ោង ៨:៥៩ នាទី ព្រឹក
លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ
ដើម្បីធានាប្រសិទ្ធភាព ស័ក្តិសិទ្ធភាព តម្លាភាព គណនេយ្យភាពនៃការគ្រប់គ្រងហិរញ្ញវត្ថុសាធារណៈ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចេញប្រកាសស្តីពីការដាក់ឱ្យអនុវត្តការពិនិត្យឡើងវិញនៃចំណាយសាធារណៈ។ ប្រកាសនេះ មានវិសាលភាពអនុវត្តចំពោះក្រសួង ស្ថាប័ន អង្គភាពសាធារណៈប្រហាក់ប្រហែល មន្ទីរជំនាញរាជធានី ខេត្ត ក្រោមចំណុះក្រសួង ស្ថាប័ន និងគ្រឹះស្ថានសាធារណៈរដ្ឋបាល។
អត្ថបទទាក់ទង
ការពិនិត្យឡើងវិញនៃចំណាយសាធារណៈ សំដៅដល់ដំណើរការនៃការវាយតម្លៃលម្អិតលើចំណាយសាធារណៈដែលបាន និងកំពុងអនុវត្ត។ ការធ្វើបែបនេះ គឺ ដើម្បីឈានដល់ការកាត់បន្ថយ ឬបង្វែរចំណាយពីចំណាយដែលមានអាទិភាពទាប និងមិនមានប្រសិទ្ធភាព ទៅជាចំណាយដែលមានអាទិភាព ឬប្រសិទ្ធភាពខ្ពស់ជាង។
ប្រការ៤ នៃប្រកាសកាលពីថ្ងៃទី៣ ខែកក្កដា បង្ហាញថា ការពិនិត្យឡើងវិញនៃចំណាយសាធារណៈ គឺជាឧបករណ៍ដែលផ្តល់នូវភាពបត់បែនដើម្បីសម្រេចគោលបំណងមួយចំនួនទៀត ដូចជា ការបង្កើតលំហថវិកា ដើម្បីឆ្លើយតបទៅតម្រូវការចំណាយនៃអាទិភាពគោលនយោបាយថ្មី ។ ឬដើម្បីឆ្លើយតបទៅនឹងសម្ពាធថវិកាដែលកំពុងកើតមាន រួមទាំងការសម្រេចឱ្យបាននូវតម្លៃនៃលុយប្រសើរជាងមុន។
វិធីសាស្ត្រនៃការពិនិត្យឡើងវិញនៃចំណាយសាធារណៈ មានទាំងវិធីសាស្ត្របែបពេញលេញទៅលើចំណាយមួយផ្នែកធំរបស់រាជរដ្ឋាភិបាល និងបែបជ្រើសរើសដែលកំណត់ជាមុននូវប្រធានបទ កម្មវិធី ឬមុខសញ្ញា ចំណាយ ដើម្បីធ្វើការពិនិត្យឡើងវិញ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាអ្នកជ្រើសរើសប្រធានបទ និងគោលបំណងសម្រាប់ការពិនិត្យ ឡើងវិញនៃចំណាយសាធារណៈតាមការសម្រេចដោយផ្ទាល់ ឬតាមរយៈការស្នើសុំរបស់អគ្គនាយកដ្ឋានថវិកា។ ប្រធានបទដែលទទួលបានការសម្រេច ក្រុមការងារពិនិត្យឡើងវិញនៃចំណាយ សាធារណៈនឹងត្រូវបង្កើតឡើងតាមរយៈសេចក្តីសម្រេចអន្តរក្រសួង។ ក្រោយបានលទ្ធផលពីការសិក្សាវិភាគ ក្រុមការងារពិនិត្យឡើងវិញនៃចំណាយសាធារណៈ ត្រូវផ្តល់ជម្រើសអនុសាសន៍សម្រាប់ការសន្សំ ឬ បង្វែរចំណាយស្របតាមអាទិភាពចំពោះមុខ ដោយគិតពីបច្ច័យក្នុងរយៈពេលមធ្យម និងវែង។
តាមប្រការ១០ ការធ្វើសេចក្តីសម្រេចលើលទ្ធផលនៃការពិនិត្យឡើងវិញនៃចំណាយសាធារណៈ និងជម្រើស សម្រាប់កាត់សន្សំ ឬបង្វែរចំណាយ ត្រូវធ្វើឡើងដោយរដ្ឋមន្ត្រីក្រសួងសេដ្ឋកិច្ចដោយមានការឯកភាពពីក្រសួង ស្ថាប័ន សាមី វៀរលែងតែការឯកភាពនោះ មិនអាចសម្រេចបាននៅកម្រិតក្រសួង ស្ថាប័ន ទើបមាន ការស្នើសុំដំណោះស្រាយបន្តពីប្រមុខរាជរដ្ឋាភិបាលតាមការចាំបាច់៕
© រក្សាសិទ្ធិដោយ thmeythmey.com
