.png)
.png)
.jpg)
.jpg)
«សំណេរអង្គរ»ចុះឈ្មោះប្រកួតមានចំនួន ៣៥០នាក់ហើយ
- ថ្ងៃចន្ទ ទី២១ ខែតុលា ឆ្នាំ២០២៤ ម៉ោង ២:២៩ នាទី រសៀល
គិតត្រឹមថ្ងៃអាទិត្យ ទី២០ ខែតុលា មានបេក្ខជនចុះឈ្មោះចូលរួមប្រកួតកម្មវិធីសរសេរតាមអានជាសាធារណៈ «សំណេរអង្គរ» ចំនួន៣៥០នាក់។ បើតាម គណៈកម្មការរៀបចំព្រឹត្តិការណ៍ «សំណេរអង្គរ»បេក្ខជនដែលបានចុះឈ្មោះចូលរួមអាយុតិចជាងគេ គឺមានអាយុ៦ឆ្នាំ ជាអ្នករាជធានីភ្នំពេញ និងអ្នកមានអាយុច្រើនជាងគេ គឺវ័យ៧២ឆ្នាំ ជាអ្នកខេត្តសៀមរាប។
ព្រឹត្តិការណ៍សរសេរតាមអានជាសាធារណៈ «សំណេរអង្គរ» រដូវកាលទី២ នឹងរៀបចំឡើងនៅថ្ងៃទី១៩ ខែមករា ឆ្នាំ២០២៥ នៅទីតាំងដដែល គឺស្ពានហាលខាងលិចនៃប្រាសាទអង្គរវត្ត ក្នុងខេត្តសៀមរាប។ ព្រឹត្តិការណ៍នេះ នឹងទទួលបេក្ខជនចុះឈ្មោះយ៉ាងច្រើនបំផុតត្រឹម ១ ៥០០នាក់ប៉ុណ្ណោះ ដោយបេក្ខជននឹងត្រូវបែងចែកជា២ក្រុម គឺបេក្ខជនអាយុក្រោម១៨ឆ្នាំ និងបេក្ខជនអាយុចាប់ពី១៩ឆ្នាំឡើងទៅ។
សូមជម្រាបថា ការប្រកួតសរសេរតាមអានជាសាធារណៈ «សំណេរអង្គរ»លើកទី២នេះ លោក ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្រ្តីក្រសួងអប់រំ យុវជន និងកីឡា នឹងធ្វើជាអ្នកអានអត្ថបទ សម្រាប់បេក្ខជន។
គណៈកម្មការរៀបចំកម្មវិធីសំណេរអង្គរឆ្នាំទី២ បានប្រកាស ទទួលចុះឈ្មោះបេក្ខជនប្រកួតចាប់ពីថ្ងៃទី១៥ ខែតុលា រហូតដល់ខែធ្នូ ឆ្នាំ២០២៤។ សម្រាប់ការចុះឈ្មោះអាចទំនាក់ទំនងតាមលេខទូរសព្ទ ០៩២ ៣៣ ៧៦ ២៦។
ព្រឹត្តិការណ៍«សំណេរអង្គរ»លើកទី១ ត្រូវបានធ្វើឡើងកាលពីថ្ងៃទី២១ ខែមករា ឆ្នាំ២០២៤ និងមានបេក្ខជនជាង ៨០០នាក់ចូលរួម ហើយគ្រានោះ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ គឺជាអ្នកអានអត្ថបទក្នុងកម្មវិធីសំណេរសម្រាប់បេក្ខជន។
គាំទ្រដោយក្រសួងពាក់ព័ន្ធនានា ព្រឹត្តិការណ៍«សំណេរអង្គរ» ផ្តួចផ្តើមរៀបចំឡើងដោយក្រុមអ្នកស្រឡាញ់អក្សរសាស្រ្តខ្មែរ ដើម្បីលើកស្ទួយភាសាខ្មែរ តាមរយៈការសរសេរតាមអាន បង្កើនចំណេះដឹង និងបង្ហាញពលរដ្ឋពីសារ:សំខាន់នៃភាសាខ្មែរ ក៏ដូចជាជួយជំរុញសក្ដានុពលទេសចរណ៍ក្នុងស្រុកផងដែរ៕
© រក្សាសិទ្ធិដោយ thmeythmey.com
Tag:
