.jpg)
.jpg)
ទេសចរជាង ៦០០០នាក់ ចូលទស្សនាសួនរុក្ខជាតិអង្គរ ក្នុងពិធីបុណ្យអុំទូក
- ថ្ងៃសៅរ៍ ទី១៦ ខែវិច្ឆិកា ឆ្នាំ២០២៤ ម៉ោង ៩:៣០ នាទី យប់
ភ្ញៀវទេសចរចូលទស្សនាសួនរុក្ខជាតិអង្គរនាពិធីបុណ្យអុំទូក ឆ្នាំ២០២៤។ រូបភាព៖ សួនរុក្ខជាតិអង្គរ
សៀមរាប៖ រយៈពេល៣ថ្ងៃ នៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នេះ មានភ្ញៀវទេសចរជាតិ-អន្តរជាតិសរុបប្រមាណ ៦ ០០០នាក់ ចូលទស្សនាសួនរុក្ខជាតិអង្គរ។
ស្ថិតនៅកណ្ដាលក្រុងសៀមរាប និងនៅតាមដងផ្លូវទៅប្រាសាទអង្គរវត្ត សួនរុក្ខជាតិអង្គរ គឺជាគោលដៅដ៏ទាក់ទាញសម្រាប់ភ្ញៀវទេសចរ អំឡុងពេលចុងសប្ដាហ៍ ពិសេសពិធីបុណ្យទានសំខាន់ៗ។ សួននេះមានដើមរុក្ខជាតិចម្រុះបែប រាប់ទាំងគ្រឿងទេស ផ្កា រុក្ខជាតិឱសថ រុក្ខជាតិលម្អ សត្វព្រៃ ពិសេសដើមឈើតូចធំ ដែលជាម្លប់ដ៏ត្រជាក់។
នៅថ្ងៃទី១៤ ខែវិច្ឆិកា ដែលជាថ្ងៃទីមួយនៃពិធីបុណ្យអុំទូក ភ្ញៀវទេសចរសរុប ជិត១០០០នាក់ ចូលទស្សនាក្នុងសួនរុក្ខជាតិអង្គរ។ ក្នុងនោះ មានទេសចរអន្តរជាតិជាង១០០នាក់។ ថ្ងៃទី១៥ ខែវិច្ឆិកា មានទេសចរសរុប ២ ៧៤៦នាក់ ក្នុងនោះទេសចរអន្តរជាតិ ៨៦នាក់។ នេះបើយោងតាមរបាយការណ៍របស់សួនរុក្ខជាតិអង្គរ ដែលសារព័ត៌មានឌីជីថលថ្មីៗ (ThmeyThmey) ទទួលបានពី លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា។
ទេសចរចូលទស្សនាសួនរុក្ខជាតិអង្គរ នាពិធីបុណ្យអុំទូក ឆ្នាំ២០២៤។ រូបភាព៖ សួនរុក្ខជាតិអង្គរ
លោក ចាន់ដារដ្ឋ បន្តរៀបរាប់ថា សម្រាប់ថ្ងៃទី១៦ ខែវិច្ឆិកា ដែលជាថ្ងៃចុងក្រោយនៃព្រះរាជពិធីបុណ្យអុំទូក មានទេសចរប្រមាណ ៣ ១០០នាក់ បានចូលទស្សនាសួនរុក្ខជាតិអង្គរនេះ។ ដូច្នេះ សរុបទាំង៣ថ្ងៃនៃពិធីបុណ្យអុំទូក គឺមានទេសចរជាង៦០០០នាក់ ដែលបានចូលទស្សនាសួនរុក្ខជាតិអង្គរ។
គួររំឭកថា សួនរុក្ខជាតិអង្គរ ជារមណីយដ្ឋានកែច្នៃមួយ ក្នុងក្រុងសៀមរាប ដែលមានរុក្ខជាតិជាង៥០០ប្រភេទ និងសត្វជាច្រើនប្រភេទ។ ផ្កា ស្មៅ ឈើហូបផ្លែ និងបន្លែចម្រុះពូជជាច្រើន ត្រូវបានដាំជា៥ផ្នែកផ្សេងគ្នា សម្រាប់ទទួលទេសចរ។ សួននេះគ្របដណ្ដប់លើផ្ទៃដីប្រមាណ ១៥០ហិកតា៕
© រក្សាសិទ្ធិដោយ thmeythmey.com
Tag:
