.jpg)
.jpg)
ទេសចរជិត៣៥ម៉ឺននាក់ មកកម្សាន្តខេត្តសៀមរាបនាពិធីបុណ្យអុំទូក
- ថ្ងៃអាទិត្យ ទី១៧ ខែវិច្ឆិកា ឆ្នាំ២០២៤ ម៉ោង ២:០០ នាទី រសៀល
ភ្ញៀវទេសចរដើរកម្សាន្តប្រាសាទអង្គរវត្តនាថ្ងៃទី២ នៃពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៤។ រូបភាព៖ ថោង ប្រណី
សៀមរាប៖ ទេសចរសរុបជិត៣៥ម៉ឺននាក់ បានមកកម្សាន្តនៅខេត្តសៀមរាបរយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤នេះ។
យោងតាមរបាយការណ៍ពីមន្ទីរទេសចរណ៍ខេត្តសៀមរាប នៅថ្ងៃទី១៤ និង១៥ ខែវិច្ឆិកា ដែលត្រូវនឹងថ្ងៃទី១ និងទី២ នៃពិធីបុណ្យអុំទូក ភ្ញៀវទេសចរចូលមកកម្សាន្តខេត្តសៀមរាបមានចំនួនសរុប ២៧៨,៩៨២នាក់ ក្នុងនោះទេសចរបរទេសមានចំនួនជិត៩ពាន់នាក់ ចំណែកទេសចរជាតិមានចំនួន ២៧ម៉ឺននាក់ កើនឡើងជាង ១២ភាគរយ បើធៀបនឹងឆ្នាំ២០២៣។
ចំណែកថ្ងៃចុងក្រោយ គឺថ្ងៃទី១៦ ខែវិច្ឆិកា មានទេសចរសរុប ៦៩ ២៤៧នាក់ ក្នុងនោះទេសចរបរទេស មានចំនួន ៤ ២៤៧នាក់។ សរុបរយៈពេល៣ថ្ងៃក្នុងពិធីបុណ្យអុំទូក ខេត្តសៀមរាបទទួលបានទេសចរសរុប ៣៤៨ ២២៩នាក់ កើនឡើងជិត១៦ភាគរយ ធៀបនឹងរយៈពេលដូចគ្នាកាលពីឆ្នាំ២០២៣ ដែលាមានចំនួន ៣០០ ៣៨០នាក់។ នេះបើយោងតាមរបាយការណ៍របស់មន្ទីរទេសចរណ៍ខេត្តសៀមរាប៕
© រក្សាសិទ្ធិដោយ thmeythmey.com
Tag:
