.png)
.jpg)
.jpg)
ហ្វីលីពីន ពង្រឹងកម្លាំងការពារប្រធានាធិបតី ក្រោយអនុប្រធានាធិបតីគំរាមធ្វើឃាត
- ថ្ងៃអាទិត្យ ទី២៤ ខែវិច្ឆិកា ឆ្នាំ២០២៤ ម៉ោង ៤:៣៩ នាទី រសៀល
ទីភ្នាក់ងារសន្តិសុខហ្វីលីពីន បានរឹតបន្តឹងកម្លាំងការពារប្រធានាធិបតី Ferdinand Marcos Jr បន្ទាប់ពីអនុប្រធានាធិបតី Sara Duterte ចេញសារគំរាមចំៗនឹងធ្វើឃាតលោកប្រធានាធិបតី ប្រសិនបើលោកស្រីខ្លួនឯងត្រូវបានគេសម្លាប់ដែរនោះ។
នៅក្នុងសញ្ញាប្រេះឆាដ៏ខ្លាំងក្នុងក្បាលម៉ាស៊ីនដឹកនាំប្រទេស លោកស្រីអនុប្រធានាធិបតី Sara Duterte បានប្រាប់សន្និសីទកាសែតនៅថ្ងៃទី២៣ ខែវិច្ឆិកាថា លោកស្រីបាននិយាយទៅកាន់ឃាតករម្នាក់ និងបានណែនាំឱ្យសម្លាប់លោកប្រធានាធិបតី Ferdinand Marcos Jr ភរិយារបស់លោក និងប្រធានសភាតំណាងរាស្រ្តដែលជាសាច់ញាតិរបស់ប្រធានាធិបតី។ លោកស្រីបន្តថា វាកើតឡើងក្នុងករណីលោកស្រីត្រូវគេឃាត។
យ៉ាងណាមិញ លោកស្រី Sara Duterte មិនបានបញ្ជាក់ពីការប៉ុនប៉ងធ្វើឃាតលោកស្រីឡើយ។
ក្រោយការចេញសារគំរាមត្រង់ៗបែបនេះ ក្រុមសន្តិសុខប្រធានាធិបតីបាននិយាយថា ខ្លួនបានបង្កើន និងពង្រឹងកិច្ចការសន្តិសុខ ហើយកំពុងសម្របសម្រួលយ៉ាងជិតស្និទ្ធជាមួយភ្នាក់ងារអនុវត្តច្បាប់នានា ដើម្បីស្វែងរក រារាំង និងការពារប្រឆាំងការគំរាមកំហែងណាមួយចំពោះប្រធានាធិបតី និងគ្រួសាររបស់លោក។
ចំណែកស្នងការប៉ូលិសជាតិ Rommel Francisco Marbil បានបញ្ជាឱ្យមានការស៊ើបអង្កេតជាបន្ទាន់លើករណីនេះ ដោយចាត់ទុកការគំរាមកំហែងដោយផ្ទាល់ឬដោយប្រយោលចំពោះជីវិតរបស់លោក Marcos Jr ត្រូវតែត្រូវបានដោះស្រាយជាមួយនឹងកម្រិតខ្ពស់បំផុត។
លោកស្រី Sara កូនស្រីអតីតប្រធានាធិបតី រ៉ូឌ្រីហ្គោ ឌូទើតេ បានលាលែងពីគណៈរដ្ឋមន្ត្រីក្នុងខែមិថុនា ដែលជាសញ្ញានៃការដួលរលំនៃសម្ព័ន្ធភាពនយោបាយក្នុងប្រទេសដែលជួយឱ្យលោកស្រី និងលោក Marcos Jr មេដឹកនាំផ្តាច់ការហ្វីលីពីន ទទួលបានជ័យជម្នះការបោះឆ្នោតឆ្នាំ២០២២។
គ្រួសារទាំងពីរ មានជម្លោះលើគោលនយោបាយការបរទេស និងសង្រ្គាមប្រឆាំងគ្រឿងញៀន។
នៅហ្វីលីពីន អនុប្រធានាធិបតី ត្រូវបានជ្រើសរើសក្នុងការបោះឆ្នោតដាច់ដោយឡែកពីប្រធានាធិបតី ហើយមិនមានភារកិច្ចផ្លូវការទេ។ ក្នុងករណីខ្លះ អនុប្រធានាធិបតី ត្រូវបានតែងតាំងឱ្យកាន់តំណែងក្នុងគណៈរដ្ឋមន្ត្រី។ លោកស្រី Sara ជាអតីតរដ្ឋមន្រ្តីអប់រំផង៕
© រក្សាសិទ្ធិដោយ thmeythmey.com
Tag:
