.png)
.jpg)
.jpg)
លោក បៃឌិន សម្រេចផ្ដល់ជំនួយយោធា៥៧៦លានដុល្លារទៀតឱ្យតៃវ៉ាន់
- ថ្ងៃសៅរ៍ ទី២១ ខែធ្នូ ឆ្នាំ២០២៤ ម៉ោង ៣:១៩ នាទី រសៀល
ប្រធានាធិបតីអាម៉េរិក ចូ បៃឌិន បានអនុម័តកញ្ចប់ថវិកាចំនួន៥៧១,៣ លានដុល្លារជាជំនួយការពារជាតិសម្រាប់កោះតៃវ៉ាន់ មួយខែមុនលោកចាកចេញពីតំណែង។ ចិនទំនងជាមិនសប្បាយទៀតហើយចំពោះចំណាត់ការនេះ។
ទោះមិនទទួលស្គាល់តៃវ៉ាន់ជាផ្លូវការតាមការទូត អាម៉េរិកជាសម្ព័ន្ធមិត្តយុទ្ធសាស្ត្ររបស់កោះដែលគ្រប់គ្រងដោយខ្លួនឯងមួយនេះ និងជាអ្នកផ្គត់ផ្គង់អាវុធធំជាងគេផង។ អាម៉េរិក ក៏តែងផ្ដល់ជំនួយយោធាឥតស្រាកដែរ។
ចុងក្រោយនេះ ប្រធានាធិបតីចប់អាណត្តិ ចូ បៃឌិន បានអនុម័តថវិកា៥៧១,៣លានដុល្លារជាជំនួយការពារជាតិសម្រាប់កោះតៃវ៉ាន់ ស្របពេលដែលលោកកំពុងខិតជិតដល់ការចាកចេញពីសេតវិមាន។
នៅក្នុងសេចក្តីថ្លែងការណ៍ខ្លីមួយនៅថ្ងៃទី២០ ខែធ្នូ សេតវិមានបាននិយាយថា លោក បៃឌិន បានអនុញ្ញាតឱ្យរដ្ឋមន្រ្តីការពារជាតិដកលុយនេះពីកញ្ចប់ថវិការបស់ក្រសួងការពារជាតិដើម្បីផ្តល់ជំនួយដល់តៃវ៉ាន់។ សេចក្តីថ្លែងការណ៍នេះ មិនបានផ្តល់ព័ត៌មានលម្អិតនៃកញ្ចប់ជំនួយយោធា។ មិនដល់បីខែមុន អាម៉េរិក ក៏ទើបផ្ដល់កញ្ចប់៥៦៧លានលានដុល្លារឱ្យកោះនេះដែរ។
សូមបញ្ជាក់ថា ទំនាក់ទំនងរវាងអាម៉េរិក និងតៃវ៉ាន់ ធ្វើឱ្យទីក្រុងប៉េកាំងខឹងសម្បារខ្លាំង ហើយបានចោទក្រុងវ៉ាស៊ីនតោនថាបានជ្រៀតជ្រែកក្នុងកិច្ចការរបស់ខ្លួន។
ជាការដាក់សម្ពាធ ចិន បញ្ជូនយន្តហោះ ឬនាវាចម្បាំងរបស់ខ្លួនទៅកៀកតៃវ៉ាន់ស្ទើរតែរាល់ថ្ងៃ។ ម្ដងជាពីរដង ទីក្រុងប៉េកាំងបាននិយាយថា ខ្លួននឹងមិនបោះបង់ការប្រើប្រាស់កម្លាំងដើម្បីយកតៃវ៉ាន់ដាក់ក្រោមការគ្រប់គ្រងរបស់ខ្លួនឡើយ ហើយថា ការបង្រួបបង្រួមជាជៀសមិនរួចថែមទៀត។
បើតាមរបាយការណ៍របស់មន្ទីរបញ្ចកោណដែលចេញផ្សាយនៅសប្តាហ៍នេះ ចិនបានបង្កើនសម្ពាធការទូត នយោបាយ និងយោធារបស់ខ្លួនប្រឆាំងនឹងកោះតៃវ៉ាន់ក្នុងឆ្នាំ២០២៣៕
© រក្សាសិទ្ធិដោយ thmeythmey.com
Tag:
