.jpg)
.jpg)
កម្ពុជា បានចំណូលជិត ២ ០០០លានដុល្លារ ពីការនាំចេញស្រូវ-អង្ករ ក្នុងឆ្នាំ២០២៤
- ថ្ងៃចន្ទ ទី១៣ ខែមករា ឆ្នាំ២០២៥ ម៉ោង ២:៣៣ នាទី រសៀល
កម្ពុជា ទទួលបានចំណូល ១ ៩៨៧,១៩លានដុល្លារ ពីការនាំចេញស្រូវជាង៥លានតោន និងអង្ករជាង៦៥ម៉ឺនតោន ទៅកាន់ទីផ្សារអន្តរជាតិ រយៈពេលពេញមួយឆ្នាំ២០២៤។
បើតាមទិន្ន័យរបស់សហព័ន្ធស្រូវអង្ករកម្ពុជា (ស.អ.ក.) ចាប់ពីខែមករា ដល់ធ្នូ ឆ្នាំ២០២៤ កម្ពុជា បាននាំចេញអង្ករចំនួន ៦៥១ ៥២២តោន ទៅទីផ្សារអន្តរជាតិ ដែលគិតជាប្រាក់មានចំនួន ៤៩១,១៩លានដុល្លារ។
ប្រភេទអង្ករ ដែលកម្ពុជានាំចេញទៅទីផ្សារពិភពលោក ភាគច្រើនជាអង្ករក្រអូបគ្រប់ប្រភេទ ដែលមានចំណែកដល់ទៅ ៧៦ភាគរយនៃអង្ករនាំចេញសរុប។ នេះបើតាមសហព័ន្ធស្រូវអង្ករកម្ពុជា ដែលបញ្ជាក់ទៀតថា ការនាំចេញអង្ករទាំងនោះ ធ្វើឡើងតាមរយៈក្រុមហ៊ុនឯកជនចំនួន ៥៧ និងត្រូវបានចែកចាយទៅកាន់ ៨៦គោលដៅ នៅលើពិភពលោក។
សហគមន៍អឺរ៉ុប ឈរលើគេ ដែលបានបញ្ជាទិញអង្ករពីកម្ពុជាច្រើនបំផុត ក្នុងទំហំ ៣២៧ ១៥៦តោន គិតជាប្រាក់ស្មើនឹង ២៥៣,១៨ លានដុល្លារ។ ប្រទេសក្នុងតំបន់អាស៊ាន ស្ថិតនៅលេខ២ បានទិញអង្ករចំនួន ៣២៧ ១៥៦ តោន ឬស្មើ ២៥៣,១៨ លានដុល្លារ។ ប្រទេសចិន និងតំបន់ស្វយ័តហុងកុង និងម៉ាកាវ ឈរនៅលេខ៣ ដែលមានទំហំពាណិជ្ជកម្មអង្ករចំនួន ១១៧ ៩២៥ តោន ឬស្មើ ៧៥,៦៦ លានដុល្លារ។ ក្រៅពីនេះ គឺបណ្ដាប្រទេសផ្សេងទៀតនៅតំបន់អាហ្វ្រិក និងមជ្ឈឹមបូព៌ា បានបញ្ជាទិញអង្ករ ក្នុងចំនួន ៧៩ ៣៦៥ តោន ឬស្មើ ៦៩,៥៤ លានដុល្លារ។
នៅក្នុងឆ្នាំ២០២៤ដដែល កម្ពុជា ក៏បាននាំចេញស្រូវសើមចំនួន ៥ ១៨០ ១៥៥ តោន ទៅកាន់ប្រទេសជិតខាងផងដែរ ដែលគិតជាប្រាក់ស្មើនឹង ១ ៤៩៦លានដុល្លារ៕
© រក្សាសិទ្ធិដោយ thmeythmey.com
Tag:
.gif)