.png)
.png)
.jpg)
.jpg)
ឃើញសន្ទុះគាំទ្រគុនខ្មែរ ស៊ឹម ប៊ុនស្រន់ ស្នើឱ្យបញ្ចូលប្រកួតគុនចម្រុះ លើសង្វៀនគុនខ្មែរ
- ថ្ងៃពុធ ទី២៩ ខែមករា ឆ្នាំ២០២៥ ម៉ោង ៨:៥៩ នាទី ព្រឹក
ស៊ឹម ប៊ុនស្រន់ បញ្ចប់អាជីពជាកីឡាករគុនចម្រុះ ដោយចាប់របរបណ្តុះកូនឈើប្រណិត និងជាម្ចាស់កសិដ្ឋាន «កសិដ្ឋានអភិវឌ្ឍន៍កសិកម្ម» នៅខេត្តកំពង់ចាម។ ក្រោយព្យូរស្រោមដៃប៉ុន្មានឆ្នាំ ប៊ុនស្រន់ មើលឃើញសន្ទុះនៃការគាំទ្រវិស័យកីឡាប្រដាល់គុនខ្មែរផុសផុលខ្លាំង និង ស្នើឱ្យមានការរៀបចំប្រកួតគុនចម្រុះឱ្យបានមួយប្រកួតក្នុងមួយសប្តាហ៍លើសង្វៀនគុនខ្មែរ ដើម្បីបង្កើនធនធានវិស័យកីឡានេះនៅកម្ពុជា។
មូលហេតុដែល ប៊ុនស្រន់ សម្រេចបញ្ចប់អាជីព MMA ទៅចាប់អាជីពជាអ្នកកសិកម្មវិញ ដោយសារវិស័យកីឡាប្រដាល់គុនចម្រុះនៅកម្ពុជាមិនសូវមានទីផ្សារ និងត្រូវពឹងតែសង្វៀនក្រៅស្រុក។ ម្ចាស់កសិដ្ឋាន «កសិដ្ឋានអភិវឌ្ឍន៍កសិកម្ម» ដែលមានទីតាំងនៅស្រុកជើងព្រៃ ខេត្តកំពង់ចាម (ផ្លូវបំបែកស្គន់) បង្ហាញមុខលើសង្វៀនក្រៅប្រទេសបានតែម្តង ឬពីរដងប៉ុណ្ណោះក្នុងមួយឆ្នាំ អំឡុងខ្លួននៅប្រកបអាជីព។ បើទោះមានតម្លៃខ្លួនប្រមាណ ៤ពាន់ដុល្លារក្នុងការឡើងប្រកួតមួយលើក ប៉ុន្តែ ប៊ុនស្រន់ បញ្ជាក់ថាចំនួននេះ មិនអាចផ្គង់ផ្គង់ជីវភាពប្រចាំថ្ងៃរបស់ខ្លួនបានឡើយ។
យ៉ាងណាក៏ដោយ អតីតអ្នកប្រដាល់ វ័យ៣៣រូបនេះ អះអាងថា របរបណ្តុះកូនឈើលក់ ក៏ជាអាជីពដែលខ្លួនស្រឡាញ់ចេញពីបេះដូង និងថែមទាំងទទួលបានចំណូលច្រើនជាងការឡើងសង្វៀនប្រដាល់ផងដែរ។
«វ៉ៃមួយឡើក យើងទទួលបានប្រមាណ ៤ពាន់ដុល្លារដែរ តែ១ឆ្នាំវ៉ៃបានតែមួយដងទៅពីរដង យើងផ្គត់ផ្គង់មិនគ្រប់គ្រាន់ទេ។ អ៊ីចឹងយើងត្រូវធ្វើអ្វីដែលបានចំណូលច្រើនជាងនេះ ហើយខ្ញុំគិតថា វិស័យកសិកម្មជាការងារដែលយើងស្រលាញ់ផង ចូលចិត្តផង និងអាចរកចំណូលបានច្រើនជាងប្រដាល់ថែមទៀត»។ នេះជាការលើកឡើងរបស់ ប៊ុនស្រន់។
បើទោះលើកឡើងដូច្នេះក្តី ប៉ុន្តែប៊ុនស្រន់ មើលឃើញថាទីផ្សារប្រដាល់នាពេលបច្ចុប្បន្ន ជាពិសេសគុនខ្មែរ ទទួលបានការគាំទ្រច្រើន ស្របពេលកីឡាករ-ការិនី ក៏រកបានកម្រៃពីការឡើងសង្វៀនច្រើនគួរសម លើសជំនាន់ខ្លួននៅប្រកួត។ វិស័យគុនខ្មែរផុសផុលខ្លាំង អតីតកីឡាករជម្រើសជាតិយូដូរូបនេះ ក៏បានស្នើឱ្យអ្នកឩបត្ថម្ភ និងអ្នករៀបចំ បញ្ចូលកម្មវិធីប្រកួតកីឡាគុនចម្រុះ នៅលើសង្វៀនគុនខ្មែរ ឱ្យបានមួយសប្តាហ៍មួយប្រកួត ឬពីរប្រកួត ដើម្បីបង្កើនធនធាន និងការប្រកួតកីឡាកម្រិតអន្តរជាតិមួយនេះ កាន់តែរីចម្រើននៅកម្ពុជា។
អតីតកីឡាករ MMA ដែលធ្លាប់ហ្វឹកហាត់ទាំងគុនខ្មែរ យូដូ និងជឺជិតស៊ូ រៀបរាប់ថា៖«ធនធានកីឡាករ-ការិនីគុនចម្រុះកម្ពុជា រួមទាំងគ្រូបង្វឹកនៅខ្វះខាតច្រើន ប៉ុន្តែបើមានអ្នកឩបត្ថម្ភ ឱ្យមានការហ្វឹកហាត់ជាមួយគ្រូត្រឹមត្រូវ និងអ្នករៀបចំ បញ្ចូលឱ្យមានការប្រកួតលើសង្វៀនគុនខ្មែរប្រចាំសប្តាហ៍ នោះប្រភេទកីឡានេះ និងរីកចម្រើនទៅមុខ»។ ប៊ុនស្រន់ មានសុទិដ្ឋិនិយមថា ក្រុមហ៊ុនអ្នកឩបត្ថម្ភ នឹងអាចជួយជ្រោមជ្រែងកីឡាគុនចម្រុះមានទីផ្សារនៅកម្ពុជានាពេលអនាគត។
ស៊ឹម ប៊ុនស្រន់ បានចូលប្រឡូកក្នុងវិស័យកីឡាគុនចម្រុះនៅឆ្នាំ២០១៥។ អតីតកីឡាករ វ័យ៣៣ឆ្នាំរូបនេះធ្លាប់ឆ្លងកាត់ការប្រកួតគុនចម្រុះជាច្រើនលើកនៅក្រៅប្រទេស ជាពិសេលើសង្វៀន ONE Championship ដល់ទៅ ៨លើក ដោយក្នុងនោះឈ្នះ ៣លើក និងចាញ់ ៥លើក។ ទោះរបរបណ្តុះកូនឈើប្រណិត និងឈើហូបផ្លែកាក់កបក៏ដោយ ប៉ុន្តែប៊ុនស្រន់ មិន ចោលកីឡាគុនចម្រុះឡើយ។ មិនឡើងសង្វៀនប្រដាល់ដោយខ្លួនឯង ប៉ុន្តែកូនចៅអ្នកកំពង់ចាមរូបនេះនៅស្រឡាញ់ និងបន្តហ្វឹកហាត់ និងមានកូនសិស្សស្រី-ប្រុស បីបួននាក់ដែរ ស្របពេលរូបគេក៏មានគម្រោង បើកក្លិបប្រដាល់មួយនៅទីតាំងកសិដ្ឋានបណ្តុះកូនឈើប្រណិត ដើម្បីបណ្តុះបណ្តាលក្មេងៗជំនាន់ក្រោយ៕
© រក្សាសិទ្ធិដោយ thmeythmey.com
Tag:
.gif)