.jpg)
.jpg)
ជនជាតិចិន២នាក់ ត្រូវបានចាប់ខ្លួនពាក់ព័ន្ធនឹងការចាប់មនុស្សញាត់វ៉ាលិស ដើម្បីជំរិតទារប្រាក់
- ថ្ងៃព្រហស្បតិ៍ ទី៣០ ខែមករា ឆ្នាំ២០២៥ ម៉ោង ៣:២៨ នាទី រសៀល
ជនសង្ស័យដែលសមត្ថកិច្ចចាប់ខ្លួនបាន។ រូបពី នាយកដ្ឋាននគរបាលព្រហ្មទណ្ឌ
ភ្នំពេញ៖ អាជ្ញាធរកម្ពុជា បានចាប់ខ្លួនជនជាតិចិន២នាក់ ពាក់ព័ន្ធនឹងករណីចាប់នារីៗ ដែល ជាជនជាតិចិន និងវៀតណាម ញាត់ចូលវ៉ាលិស ដើម្បីជំរិតទារប្រាក់។ ជនសង្ស័យទាំង២នាក់ កាលពីថ្ងៃទី២៦ ខែមករា នៅបុរីពិភពថ្មីកួរស្រូវ៣ សង្កាត់រលួស ខណ្ឌដង្កោ រាជធានីភ្នំពេញ។
នាយកដ្ឋាននគរបាលព្រហ្មទណ្ឌ បានចុះផ្សាយចម្លើយសារភាពរបស់ជនសង្ស័យ ថាពួកគេមានគ្នីគ្នា៣នាក់ និងធ្លាប់ធ្វើសកម្មភាពចាប់ជំរិតបែបនេះ ៦លើកមកហើយ។ នាយកដ្ឋាននគរបាលព្រហ្មទណ្ឌ សរសេរនៅលើទំព័រហ្វេសប៊ុកដូច្នេះ«ជនសង្ស័យ បានសារភាពថាពួកខ្លួន ដែលចូលរួមធ្វើសកម្មភាពមានគ្នាចំនួន៣នាក់ ដោយបានធ្វើសកម្មភាពចាប់ស្រ្តីជនជាតិចិន និងវៀតណាម ដាក់ចូលទៅក្នុងវ៉ាលិស ដើម្បីជំរិតទារប្រាក់ចំនួន៦ករណី មកហើយ។»។
ក្រោយសួរចម្លើយរួច ជនសង្ស័យ ត្រូវបាននាយកដ្ឋាននគរបាលព្រហ្មទណ្ឌ បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីបន្តនីតិវិធី។
មុនឈានដល់ការចាប់ខ្លួនជនសង្ស័យជាជនជាតិចិនទាំង២នាក់នេះ លោក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានបញ្ជាឱ្យស្រាវជ្រាវរកក្រុមជនសង្ស័យ ដែលចាប់ជនរងគ្រោះ ជាស្ត្រីជនជាតិវៀតណាមម្នាក់ ដាក់ចូលក្នុងវ៉ាលិស ដើម្បីជំរិតទារប្រាក់។ ហេតុការណ៍ចាប់ជំរិតនេះ កើតឡើងកាលពីថ្ងៃទី១៣មករា នៅចំណុចសណ្ឋាគារ នួ ឌី ស៊ី ស្ថិត ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
លុះដល់ថ្ងៃទី២៦ ខែមករា ទើបសមត្ថកិច្ចជំនាញ កំណត់អត្តសញ្ញាណ និងទីតាំងលាក់ខ្លួនរបស់ជនសង្ស័យបាន ហើយចុះបង្ក្រាបតែម្តង។ ក្នុងប្រតិបត្តិនេះដែរ សមត្ថកិច្ចក៏បាន សង្គ្រោះស្ត្រីជនរងគ្រោះម្នាក់ទៀតដែរ ដែលជាជនជាតិចិន។
ពាក់ព័ន្ធនឹងករណីនេះ នាយកដ្ឋាននគរបាលព្រហ្មទណ្ឌ បានអំពាវនាវឱ្យបណ្ដាម្ចាស់ផ្ទះសំណាក់ ឬសណ្ឋាគារ ព្រមទាំងប្រជាពលរដ្ឋផង រាយការណ៍ជាបន្ទាន់ទៅកាន់សមត្ថកិច្ច
នៅពេលឃើញអូសវ៉ាលិសធំៗខុសប្រក្រតី ឬសង្ស័យថា ជាករណីចាប់មនុស្ស៕
© រក្សាសិទ្ធិដោយ thmeythmey.com
