.jpg)
.jpg)
សមត្ថកិច្ច ចាប់បានគ្រឿងញៀនជាង៤២តោន និងសារធាតុគីមីផ្សំជិត ៦០០តោន ពីឆ្នាំ២០១៧-២០២៤
- ថ្ងៃពុធ ទី១២ ខែកុម្ភៈ ឆ្នាំ២០២៥ ម៉ោង ៣:៤៧ នាទី រសៀល
សកម្មភាពអាជ្ញាធររៀបចំដុតបំផ្លាញគ្រឿងញៀននៅឆ្នាំ២០២៤។ រូបភាព៖ មឿន ម៉ាក់ថុង
ភ្នំពេញ៖ ចាប់ពីឆ្នាំ២០១៧-២០២៤ សមត្ថកិច្ចជំនាញ ចាប់បានគ្រឿងញៀនគ្រប់ប្រភេទប្រមាណ ៤២ ៨៤៨ គីឡូក្រាម និងសារធាតុគីមីផ្សំប្រមាណ ៥៩៦ ៣៩៩ គីឡូក្រាម រួមទាំងរឹបអូសមធ្យោបាយ សម្ភារ និងវត្ថុតាង ទ្រព្យសម្បត្តិ និងបង្កកអចលនទ្រព្យជាច្រើនកន្លែង។ នេះបើរបាយការណ៍នៅក្នុងផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ ឆ្នាំ២០២៥។
ប្រតិបត្តិការបង្រ្កាបគ្រឿងញៀនធ្វើឡើងជាបន្តបន្ទាប់ ដើម្បីឆ្លើយតបនឹងផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលបានដាក់ចេញចាប់តាំងពីឆ្នាំ២០១៧មក។
ទោះបីជាប្រតិបត្តិការប្រយុទ្ធប្រឆាំងបទល្មើសគ្រឿងញៀនខុសច្បាប់ទទួលបានលទ្ធផលជាវិជ្ជមានក្តី តែរាជរដ្ឋាភិបាល ពិនិត្យឃើញបញ្ហាប្រឈមថ្មីមួយចំនួនដែលបានកើតឡើង។
ប្រមុខរដ្ឋាភិបាល សង្កេតឃើញ ការប្រើប្រាស់ល្បិចកលនាំចូលនូវសារធាតុគីមីបម្រើឱ្យវិស័យកសិកម្ម ឧស្សាហកម្ម បន្លំយកមកកែច្នៃផលិតជាសារធាតុញៀន សំយោគ ការផ្លាស់ប្តូរច្រក និងផ្លូវចរាចរ រួមទាំងរូបភាពនៃការនាំចូលឆ្លងកាត់ ការកែច្នៃផលិតជាដើម។ បើតាមទិន្នន័យក្នុងផែនការខាងលើ អាជ្ញាធរជាតិប្រយុទ្ធប្រឆាំងគ្រឿងញៀន បានជំរុញការអនុវត្តវិធានការរដ្ឋបាល និងវិធានការច្បាប់ ដោយបានបិទទីតាំងអាជីវកម្មសរុបចំនួន ៤៨ កន្លែង។
ចាប់ពីឆ្នាំ២០១៧-២០២៤ សមត្ថកិច្ច បានបើកប្រតិបត្តិការបង្ក្រាបបទល្មើស គ្រឿងញៀនដោយឃាត់ខ្លួនជនសង្ស័យជាច្រើនម៉ឺននាក់ និងចាប់យកគ្រឿងញៀនគ្រប់ប្រភេទមានទម្ងន់ ប្រមាណ ៤២ ៨៤៨ គីឡូក្រាម និងសារធាតុគីមីផ្សំប្រមាណ ៥៩៦ ៣៩៩ គីឡូក្រាម។ ក្រៅពីនោះ ក៏បានរឹបអូសមធ្យោបាយ សម្ភារ និងវត្ថុតាង ទ្រព្យសម្បត្តិ និងបង្កកអចលនទ្រព្យជាច្រើនកន្លែងផងដែរ។
អត្ថបទទាក់ទង
ទន្ទឹមនឹងនេះ សមត្ថកិច្ចបានស្រាវជ្រាវរកឃើញ និងបង្ក្រាបបទល្មើសគ្រឿងញៀនដែលមានអង្គការចាត់តាំងចំនួន ៦២៧ ករណី ឃាត់ខ្លួនឧក្រិដ្ឋជនមេខ្លោង ១៩៥ នាក់ និងបណ្តាញខ្សែរយៈ ១ ៤៥៣ នាក់ កសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់។ របាយការណ៍ បញ្ជាក់ថា សមត្ថកិច្ច ក៏ បានបញ្ជូនអ្នកញៀនគ្រឿងញៀនទៅទទួលការព្យាបាល និងស្តារនីតិសម្បទាចំនួន ១៤៥ ៧៩០នាក់ បានធ្វើសមាហរណកម្មចូលក្នុងគ្រួសារ និងសហគមន៍វិញសរុបចំនួន ៨១ ៦៧៥ នាក់៕
© រក្សាសិទ្ធិដោយ thmeythmey.com
Tag:
