.png)
.png)
.jpg)
.jpg)
សម្តេច ហ៊ុន សែន ប្រាប់ទូតវៀតណាមថា ទោះចេញពីCLV-DTA កម្ពុជានៅតែបន្តពង្រឹងទំនាក់ទំនងត្រីភាគី
- ថ្ងៃព្រហស្បតិ៍ ទី១៣ ខែកុម្ភៈ ឆ្នាំ២០២៥ ម៉ោង ១១:៥៩ នាទី ព្រឹក
កម្ពុជា នៅតែខ្នះខ្នែងក្នុងការពង្រឹក និងពង្រីកកិច្ចសហប្រតិបត្តិការត្រីភាគី ទាំងក្នុងក្របខណ្ឌបក្ស រដ្ឋាភិបាល និងសភា ទោះបីជាកម្ពុជា បានដកខ្លួនពីក្របខ័ណ្ឌ CLV-DTAហើយក៏ដោយ។ នេះជាការបញ្ជាក់របស់ សម្តេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានបញ្ជាក់ប្រាប់ទូតវៀតណាមថ្មីប្រចាំកម្ពុជាថា ក្នុងជំនួបសម្តែងការគួរសមកាលពីថ្ងៃទី១២ ខែកុម្ភៈ។
ក្នុងជំនួបជាមួយ លោក NGUYEN Minh Vu ដែលទើបត្រូវបានតែងតាំងជាឯកអគ្គរដ្ឋទូតវៀតណាមប្រចាំកម្ពុជា សម្តេច ហ៊ុន សែន ដែលជាប្រធានគណបក្សប្រជាជនកម្ពុជាផង បញ្ជាក់ដូច្នេះ៖ «ទោះបីកម្ពុជា បានដកខ្លួនពីក្របខ័ណ្ឌ CLV-DTA ប៉ុន្តែកិច្ចសហប្រតិបត្តិការរវាងភាគីទាំងបី ត្រូវបានពង្រីកពីលក្ខណៈតំបន់ ទៅជាកម្រិតប្រទេស ហើយប្រទេសទាំងបី នឹងបន្តពង្រឹងយន្តការទំនាក់ទំនង និងកិច្ចសហប្រតិបត្តិការ ទាំងនៅក្នុងក្របខណ្ឌបក្ស រដ្ឋាភិបាល និងសភា។»។
នៅក្នុងជំនួបនោះដែរ សម្តេច ហ៊ុន សែន បញ្ជាក់ថា វត្តមានដ៏ឆាប់រហ័សរបស់ លោក NGUYEN Minh Vu ជាការបង្ហាញថា បក្ស និងរដ្ឋាភិបាលវៀតណាម យកចិត្តទុកដាក់ចំពោះទំនាក់ទំនងនៃប្រទេសទាំងពីរ។
សម្តេចហ៊ុន សែន សង្ឃឹមថា ក្នុងបេសកកម្មរបស់អ្នកការទូតវៀតណាមរូបនេះ នឹងរួមចំណែក ជំរុញបន្ថែមទៀត នូវទំនាក់ទំនងដ៏ស្អិតល្មួត ភូមិផងរបងតែមួយ និងដែលបានរួមសុខរួមទុក្ខជាមួយគ្នា តស៊ូដើម្បីឯករាជ្យ និងអធិបតេយ្យភាពពីបនប្រល័យពូជសាសន៍ប៉ុល ពត។ បើតាមសម្តេចប្រធានព្រឹទ្ធសភា វៀតណាម ក៏បានជួយកម្ពុជា ក្នុងការរំដោះ និងទប់ស្កាត់ការវិលត្រឡប់មកវិញរបបអាវខ្មៅ និងការកសាងអភវិឌ្ឍន៍ប្រទេសឡើងវិញ។
បើតាម សម្តេច ហ៊ុន សែន វៀតណាម គឺជាទីផ្សារកសិផលធំទី២របស់កម្ពុជា ដូចជាគ្រាប់ស្វាយចន្ទី និងស្រូវ ហើយកម្ពុជា ក៏មានតម្រូវការទំនិញនានាពីវៀតណាមដែរ។
ជាការឆ្លើយតប លោក NGUYEN Minh Vu បានបង្ហាញក្តីរីករាយដែលសម្តេច ហ៊ុន សែនបានផ្តល់តម្លៃដល់ទំនាក់ទំនងដ៏ល្អរវាងកម្ពុជា-វៀតណាម។ ជាមួយនឹងក្តីសង្ឃឹម ថាខ្លួន នឹងអាចបំពេញបេសកកម្មដោយជោគជ័យនៅកម្ពុជា លោក NGUYEN Minh Vu ក៏បានសរសើរការអភិវឌ្ឍដ៏ខ្លាំងក្លារបស់កម្ពុជាក្រោមការដឹកនាំរបស់សម្តេច ហ៊ុន សែន និងការបន្តដឹកនាំប្រទេសទៅរកការអភិវឌ្ឍបន្ថែមទៀត របស់អ្នកដឹកនាំបន្តវេន។
បើតាម លោក ឯកអគ្គរដ្ឋទូតវៀតណាម ទិសដៅការងារក្នុងបេសកកម្មការទូតរបស់ខ្លួននៅកម្ពុជា មានជាអាទិ៍ការបន្តលើកកម្ពស់កិច្ចសហប្រតិបតិ្តការនយោបាយ និងការទូត ក៏ដូចជាការបន្តលើកកម្ពស់កិច្ចសហប្រតិបត្តិការការពារជាតិ និងសន្តិសុខ ដើម្បីរក្សាសន្តិសុខ សណ្តាប់ធ្នាប់ និងការបង្រ្កាបបទល្មើសឆ្លងដែន។
អ្នកការទូតដដែល ក៏នឹងបន្តលើកកម្ពស់ទំនាក់ទំនងរវាងប្រជាជន និងប្រជាជន ក៏ដូចជាយុវជន និងកិច្ចសហប្រតិបត្តិការសេដ្ឋកិច្ច ដើម្បីជំរុញឱ្យសម្រេចបាននូវគោលដៅទំហំពាណិជ្ជកម្ម ២០ពាន់លានដុល្លាអាមេរិក ដែលថ្នាក់ដឹកនាំនៃប្រទេសទាំងពីរបានដាក់ចេញផងដែរ។
សូមរំឭកថា កាលពីយប់ថ្ងៃទី២០ ខែកញ្ញា ឆ្នាំ២០២៤ សម្តេច ហ៊ុន សែន បានប្រកាសថា កម្ពុជាសម្រេចចិត្តបញ្ចប់ ការចូលរួមតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ចាប់ពីថ្ងៃទី២០ ខែកញ្ញា ឆ្នាំ២០២៤តទៅ។ ការប្រកាសដើរចេញពីកិច្ចព្រមព្រៀងនេះ របស់កម្ពុជា ត្រូវបានប្រមុខបក្សប្រជាជនកម្ពុជា ពន្យល់ថា កុំឱ្យក្រុមប្រឆាំងបន្ត យកលេស CLV-DTA មកធ្វើមធ្យោបាយវាយប្រហារលើរដ្ឋាភិបាល ឬបង្កចលនាជ្រុលនិយម ដែលធ្វើឲ្យពលរដ្ឋមានការភ័ន្តច្រលំលើរដ្ឋាភិបាល៕
អត្ថបទទាក់ទង
© រក្សាសិទ្ធិដោយ thmeythmey.com
