.jpg)
.jpg)
ក្រសួងការពារជាតិ ឱ្យគ្រប់កងឯកភាព បង្កើនការប្រយ័ត្នអគ្គិភ័យ ពិសេសឃ្លាំងសព្វាវុធ និងសម្ភារទ័ព
- ថ្ងៃព្រហស្បតិ៍ ទី១៣ ខែកុម្ភៈ ឆ្នាំ២០២៥ ម៉ោង ៣:០៤ នាទី រសៀល
អគ្គិភ័យឆេះឃ្លាំង ក្នុងករណីផ្ទុះឃ្លាំងគ្រាប់ នៅបញ្ជាការដ្ឋានយោធភូមិភាគ៣ ក្នុងក្រុងច្បារមន ខេត្តកំពង់ស្ពឺ កាលពីខែមេសា ឆ្នាំ២០២៤។
ភ្នំពេញ៖ ក្នុងរយៈពេលចុងក្រោយនេះ គ្រោះអគ្គិភ័យ បានកើតឡើងជាញឹកញាប់ មិនថាទីក្រុង និងជនបទ រួមទាំងបញ្ហាឆេះព្រៃជាដើម។ អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ បានណែនាំឱ្យកងឯកភាពទាំងអស់ ជាពិសេសឃ្លាំងសព្វាវុធកា-៨៦, កា-៥, កា-៨៨, ឃ្លាំងសម្ភារកា-៤, រោងជាងជួសជុលចម្រុះ, យានដ្ឋានជួសជុលរថយន្ត និងវរសេនាធំដឹកជញ្ជូនការពារ ត្រូវមានម្ចាស់ការ និងប្រុងប្រយ័ត្នខ្ពស់ចំពោះដើមចមដែលអាចបង្កើតឱ្យមានគ្រោះអគ្គិភ័យ។
រដូវប្រាំងឆ្នាំនេះ មានអាកាសធាតុក្តៅហួតហែងខ្លាំង ដែលងាយនឹងកើតមានគ្រោះអគ្គិភ័យ។ អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ កត់សម្គាល់ថា ក្នុងរដូវនេះ ពលរដ្ឋចាប់ផ្តើមកាប់ឆ្ការដីព្រៃធ្វើកសិកម្ម ដុតព្រៃធ្វើជី ដេញសត្វ និងមានដីទំនេរជាច្រើនដែលមានស្មៅ និងព្រៃមិនមានការការពារ ធ្វើឱ្យមានការព្រួយបារម្ភយ៉ាងខ្លាំង ចំពោះគ្រោះមហន្តរាយដោយអគ្គិភ័យ។
ជុំវិញបញ្ហានេះ អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ បានណែនាំដល់កងឯកភាពចំណុះទាំងអស់ ជាពិសេសឃ្លាំងសព្វាវុធកា-៨៦, កា-៥, កា-៨៨, ឃ្លាំងសម្ភារកា-៤, រោងជាងជួសជុលចម្រុះ, យានដ្ឋានជួសជុលរថយន្ត និងវរសេនាធំដឹកជញ្ជូនការពារ ត្រូវមានម្ចាស់ការ និងប្រុងប្រយ័ត្នខ្ពស់ចំពោះដើមចមដែលអាចបង្កើតឱ្យមានគ្រោះអគ្គិភ័យ។
អគ្គនាយកដ្ឋានសម្ភារៈបច្ចេកទេស ឱ្យប្រយ័ត្នភ្លើងចង្ក្រាន ភ្លើងចង្កៀង ភ្លើងធូបទៀន ការដុតសំរាម ដុតព្រៃ-ចម្ការ-វាលស្រែ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុ គ្រាប់ រំសេវ អាវុធងាយឆេះ ឬងាយផ្ទុះជាដើម។
ក្នុងសេចក្ដីជូនដំណឹងខាងលើ អគ្គនាយកដ្ឋានសម្ភារៈបច្ចេកទេស សង្កត់ធ្ងន់ដូច្នេះ៖«ត្រូវពិនិត្យឱ្យបានហ្មត់ចត់ បង្ការកុំឱ្យមានការ ឆេះរាលដាលបង្កើតជាគ្រោះអគ្គិភ័យ ដែលធ្វើឱ្យបាត់បង់ទាំងទ្រព្យសម្បត្តិ និងអាចដល់អាយុជីវិត»។ ជាមួយគ្នានេះ ត្រូវត្រៀមរៀបចំរិះរកមធ្យោបាយរក្សាសុវត្ថិភាពឱ្យបានគ្រប់គ្រាន់ ក្នុងការបង្ការ ទប់ស្កាត់ ការកើតមាន អគ្គិភ័យក្នុងអង្គភាពរបស់ខ្លួនជាយថាហេតុ ៕
© រក្សាសិទ្ធិដោយ thmeythmey.com
Tag:
