.jpg)
.jpg)
ក្រសួងការពារជាតិ ប្រកាសរើសពលទាហានជើងគោក និងជើងទឹក ២ពាន់នាក់
- ថ្ងៃសុក្រ ទី១៤ ខែកុម្ភៈ ឆ្នាំ២០២៥ ម៉ោង ៧:៥៩ នាទី ព្រឹក
រូបភាពពីក្រសួងការពារជាតិ។
ភ្នំពេញ៖ ក្រសួងការពារជាតិ បានចេញប្រកាសស្ដីពីការជ្រើសរើស ពលទាហានបំពេញក្របខណ្ឌឱ្យបញ្ជាការដ្ឋានកងទ័ពជើងគោក និងបញ្ជាការដ្ឋានកងទ័ពជើងទឹក ចំនួន ២ពាន់នាក់។ បើតាមក្រសួងការពារជាតិ ការជ្រើសរើសនេះ សម្រាប់ចូលបម្រើនៅយោធភូមិភាគទី១, ទី២, ទី៣, ទី៤, ទី៥, យោធភូមិភាគពិសេស និងកងឯកភាពឈរជើងតាមបណ្ដាកោះ ចំណុះកងទ័ពជើងទឹក។
ក្រោយរដ្ឋាភិបាលចេញសេចក្ដីសម្រេចស្ដីពីការជ្រើសរើសពលទាហាន កាលពីខែមករា ឆ្នាំ២០២៥ ក្រសួងការពារជាតិ បានចេញប្រកាសស្ដីពីការជ្រើសរើស ពលទាហានបំពេញក្របខណ្ឌឱ្យបញ្ជាការដ្ឋានកងទ័ពជើងគោក និងបញ្ជាការដ្ឋានកងទ័ពជើងទឹក ចំនួន ២ពាន់នាក់។ ការជ្រើសរើសពលទាហានទាំងនេះ នឹងជ្រើសរើសសម្រាប់ យោធភូមិភាគទី១ ចំនួន ១១៨នាក់, យោធភូមិភាគទី២ ចំនួន ៥៣នាក់ និងយោធភូមិភាគទី៣ ចំនួន ៨១នាក់។
ដោយឡែក យោធភូមិភាគទី៤ ជ្រើសរើសចំនួន ១០៩នាក់ និងយោធភូមិភាគទី៥ រហូតដល់ ១ ១៧៤នាក់។ ក្រៅនេះ ក៏ជ្រើសរើសសម្រាប់យោធភូមិភាគពិសេស ចំនួន ១៦៩នាក់ និងកងឯកភាពឈរជើងតាមបណ្ដាកោះ ចំណុះកងទ័ពជើងទឹក ចំនួន ៣០០នាក់។
លក្ខខណ្ឌនេះ ការជ្រើសរើសពលទាហាននេះ ក្រសួងការពារជាតិ តម្រូវឱ្យបេក្ខជនត្រូវមានអាយុចាប់ពី១៨-២៥ឆ្នាំ និងត្រូវមានកាយសម្បទាគ្រប់គ្រាន់ រួមទាំងមានសុខភាពល្អ។ លើសពីនេះ បេក្ខជនត្រូវមានកម្រិតវប្បធម៌ ចាប់ពីមធ្យមសិក្សាឡើងទៅ និងត្រូវមានកម្ពស់ចាប់ពី ១,៦០ម៉ែត្រ។
ទន្ទឹមនឹងនេះ បេក្ខជនត្រូវពិនិត្យសុខភាព រកមេរោគថ្លើម អេដស៍ និងសារធាតុញៀន ដោយបេក្ខជនត្រូវឆ្លងកាត់ការត្រួតពិនិត្យលក្ខណៈសម្បត្តិរបស់គណកម្មការជ្រើសរើសពលទាហាន។ មួយវិញទៀត បេក្ខជនដែលស្ម័គ្រចិត្តចូលបម្រើក្នុងក្របខណ្ឌកងយោធពលខេមរភូមិន្ទ ត្រូវនៅបម្រើការងារក្នុងអង្គភាពយ៉ាងតិច៥ឆ្នាំ។ នេះបើតាមប្រកាសដែលចុះហត្ថលេខាដោយលោក ទៀ សីហា រដ្ឋមន្រ្តីក្រសួងការពារជាតិ៕
© រក្សាសិទ្ធិដោយ thmeythmey.com
Tag:
