.png)
.png)
.jpg)
.jpg)
តារារ៉េបបារាំង Kacimi រត់២៤ម៉ោងលើម៉ាស៊ីនហាត់ប្រាណ ដើម្បីផ្សព្វផ្សាយបទចម្រៀងថ្មី
- ថ្ងៃសៅរ៍ ទី១៥ ខែកុម្ភៈ ឆ្នាំ២០២៥ ម៉ោង ៨:៣៩ នាទី ព្រឹក
តារាចម្រៀងរ៉េបបារាំង Riles Kacimi ជ្រើសយកវិធីសាស្ត្ររត់លើម៉ាស៊ីនហាត់ប្រាណរយៈពេល ២៤ម៉ោងដោយមិនឈប់សម្រាក ដើម្បីផ្សព្វផ្សាយអាល់ប៊ុមចម្រៀងថ្មីរបស់ខ្លួន។ រយៈពេល១ថ្ងៃពេញ Kacimi រត់បានជាង ២០០ គីឡូម៉ែត្រ។
នៅលើម៉ាស៊ីរត់ហាត់ប្រាណដ៏ទំនើបមួយ តារារ៉េបវ័យ២៩ឆ្នាំ ចាប់ផ្តើមរត់ពីថ្ងៃត្រង់ថ្ងៃទី៨ ខែកុម្ភៈ រហូតដល់ថ្ងៃត្រង់ថ្ងៃបន្ទាប់។ Kacimi។ ក្នុងវីដេអូដែលបង្ហាញពីការរត់របស់ខ្លួន ក្នុងចម្ងាយ ២០៥,២១ គីឡូម៉ែត្រ រយៈពេល ២៤ម៉ោង នៅលើម៉ាស៊ីនហាត់ប្រាណ មានអ្នកចូលមើលជាង ១ម៉ឺននាក់លើអ៊ីនធឺណិត។ Kacimi មានអ្នកចុចតាមដានលើបណ្តាញសង្គមយូធូប (YouTube) របស់ខ្លួន ជិតពីរលាននាក់។
តារារ៉េបសញ្ជាតិបារាំងរូបនេះ រត់មួយថ្ងៃពេញដោយគ្មានតន្ត្រី ឬការកម្សាន្តណាមួយឡើយ ដោយពឹងផ្អែកតែលើចង្វាក់នៃជើងរបស់ខ្លួន និងសំឡេងម៉ាស៊ីនពីក្រោយខ្នងខ្លួនប៉ុណ្ណោះ។ វិធីសាស្ត្រក្នុងការរត់ដើម្បីផ្សព្វផ្សាយអាល់ប៊ុបចម្រៀងថ្មីរបស់ Kacimi បានទាក់ទាញអ្នកទស្សនាផ្ទាល់និងតាមបណ្តាញសង្គមយ៉ាងច្រើន។
អ្នកទស្សនា ចង់ដឹងថាតើ Kacimi គ្រប់គ្រងការរត់របស់ខ្លួនលើម៉ាស៊ីនហាត់ប្រាណ ដោយមិនសម្រាកចូលបន្ទប់ទឹកដោយរបៀបណា។ ប៉ុន្តែទីបំផុត អាថ៌កំបាំង ត្រូវបានបង្ហញទៅកាន់ក្រុមអ្នកគាំទ្រខ្លួន ស្របពេល Kacimi អាចរក្សាជាតិទឹក និងដោះស្រាយតម្រូវការផ្ទាល់ខ្លួនប្រកបដោយប្រសិទ្ធភាពដោយយកកំណាត់ខ្មៅបិទបាំង ពេលខ្លួនបត់ជើងនៅម៉ាស៊ីនរត់តែម្តង។
បន្ថែមពីលើអាជីពតន្ត្រីរបស់ខ្លួន Kacimi ក៏ជាអ្នករត់ប្រណាំងម្នាក់ដែរ។ តារារ៉េបបារាំងរូបនេះ ធ្លាប់សម្រេចលទ្ធផលល្អបំផុតលើការរត់ម៉ារ៉ាតុន ដោយប្រើពេល ២ ម៉ោង និង ៥៥នាទី ដែលរៀបចំនៅទីក្រុង Florence ប្រទេសអ៊ីតាលី ឆ្នាំ ២០២៣។
តាមពិតទៅ Kacimi បានដាក់គោលដៅតាមកំណត់ត្រារបស់អ្នករត់ប្រណាំងជនជាតិន័រវេស Jonas Buud ដែលធ្វើបានចម្ងាយ ២៦៤,៥២ ក្នុងរយៈពេល២៤ម៉ោង ប៉ុន្តែមិនអាចសម្រេចបាន។ បរាជ័យលើការរត់មែន ប៉ុន្តែ Kacimi បានបង្ហាញសមត្ថភាពដ៏គួរឱ្យភ្ញាក់ផ្អើល និងទទួលជោគជ័យក្នុងការទាក់ទាញចំណាប់អារម្មណ៍សម្រាប់ការផ្សព្វផ្សាយអាល់ប៊ុមថ្មីរបស់ខ្លួនឈ្មោះ «Survival Mode» ដែលបានចេញផ្សាយកាលពីខែមករា ឆ្នាំ ២០២៥។
ទស្សនាវដ្ដី Canadian Running Magazine បានស្រង់សម្តីរបស់ Kacimi ដូច្នេះថា៖«និយាយតាមត្រង់ទៅ ពួកយើងចង់ឃើញសិល្បករកាន់តែច្រើនបង្ហាញសមត្ថភាពក្នុងការរត់ ដើម្បីផ្សព្វផ្សាយអាល់ប៊ុមរបស់ពួកគេ»៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
