.png)
.png)
.jpg)
.jpg)
រដ្ឋ ទម្លាក់ថវិកា៦០លានដុល្លារ រៀបចំប្រព័ន្ធផ្គត់ផ្គង់ទឹកស្អាតនៅខេត្តចំនួន៥
- ថ្ងៃចន្ទ ទី១៧ ខែកុម្ភៈ ឆ្នាំ២០២៥ ម៉ោង ៧:៥៩ នាទី ល្ងាច
រោងចក្រប្រព្រឹត្តិកម្មទឹកស្អាតជ្រាវ នៅខេត្តសៀមរាប។ រូបពី ក្រសួងឧស្សាហកម្ម
ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្ត្រី សម្រេចទម្លាក់ថវិកា៦០លានដុល្លារ ដើម្បីពង្រីកហេដ្ឋារចនាសម្ព័ន្ធទឹកស្អាត ដល់ពលរដ្ឋនៅក្នុងខេត្តកំពត ស្វាយរៀង កំពង់ធំ មណ្ឌលគិរី និងខេត្តពោធិ៍សាត់។
តាមរយៈទំព័រហ្វេសប៊ុករបស់ខ្លួន ចេញផ្សាយនៅថ្ងៃទី១៧ ខែកុម្ភៈ សម្ដេច ហ៊ុន ម៉ាណែត បានគូសបញ្ជាក់ថា រាជរដ្ឋាភិបាល យកចិត្តទុកដាក់ខ្លាំងលើការការផ្គត់ផ្គង់ទឹកស្អាត ដល់ប្រជាពលរដ្ឋ។ ទោះជាយ៉ាងណាក៏ដោយ កំណើនប្រជាពលរដ្ឋ បានធ្វើឱ្យមានតម្រូវការផ្គត់ផ្គង់ទឹកស្អាតកាន់ច្រើន ជាពិសេសតំបន់ជនបទ និងតំបន់ដែលទើបកកើតថ្មីៗ នៃទីប្រជុំជនធំៗ។
រដ្ឋាភិបាល បានវិនិយោគជាបន្តបន្ទាប់ ដើម្បីបង្កើនសមត្ថភាពផលិតទឹកស្អាត ដើម្បីឆ្លើយតប នឹងតម្រូវការប្រើប្រាស់របស់ពលរដ្ឋ ដោយថ្មីៗនេះ រដ្ឋាភិបាល សម្រេចផ្ដល់ថវិកាចំនួន ៦០លានដុល្លារ ក្នុងរយៈពេល៣ឆ្នាំ តាមការស្នើសុំ របស់ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សម្រាប់វិនិយោគ លើបណ្ដាញទឹកស្អាត។
សម្ដេច ហ៊ុន ម៉ាណែត នាយករដ្ឋមន្ត្រី។ រូបពី STPM
នាយករដ្ឋមន្ត្រី បានថ្លែងក្នុងសន្និបាតបូកសរុបសកម្មភាព និងលទ្ធផលការងារចុះមូលដ្ឋានប្រចាំឆ្នាំ២០២៤ និងទិសដៅអនុវត្តបន្តឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋាន កាលពីថ្ងៃទី១៤ ខែកុម្ភៈ ជុំវិញការប្រើប្រាស់ថវិកានេះដូច្នេះ៖ «រឿងហ្នឹង(សំណើសុំថវិកាគម្រោងទឹកស្អាត) ខ្ញុំបានចារឯកភាពហើយ។ ប៉ុន្តែយើងដាក់ជា៣ឆ្នាំ។ អ៊ីចឹង! មួយឆ្នាំ យើងទម្លាក់ម្ដង២០លាន(ដុល្លារ) ឱ្យទៅធ្វើ ព្រោះទឹកស្អាតនេះ ពាក់ព័ន្ធនឹងសុខភាព។»។
ជាមួយគ្នាដែរ សម្ដេច ហ៊ុន ម៉ាណែត អះអាងថា នឹងអភិវឌ្ឍបណ្ដាញទឹកស្អាត ជាជំហានៗ រហូតដល់មានបណ្ដាញទឹកស្អាត គ្របដណ្តប់ទូទាំងប្រទេស នៅថ្ងៃអនាគត។
គិតត្រឹមឆ្នាំ ២០២៤ អត្រាគ្របដណ្តប់ទឹកស្អាតជាមូលដ្ឋាននៅទូទាំងប្រទេស មានប្រមាណ ៨៧ភាគរយ ខណៈអត្រានៃការគ្រប់គ្រងទឹកប្រកបដោយសុវត្ថិភាព (Safely Managed) សម្រេចបាន ២១ភាគរយ។ នេះបើតាមរបាយការណ៍ក្រសួងអភិវឌ្ឍន៍ជនបទ៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
.gif)