.png)
.png)
.jpg)
.jpg)
នាយករដ្ឋមន្ត្រី ឱ្យពន្លឿនការទូទាត់ប្រាក់ទៅពេទ្យជាដៃគូ ប.ស.ស. ចៀសវាសបន្ទោសគ្នា និងធានាប្រសិទ្ធភាព
- ថ្ងៃព្រហស្បតិ៍ ទី២០ ខែកុម្ភៈ ឆ្នាំ២០២៥ ម៉ោង ១០:១៦ នាទី ព្រឹក
សម្តេច ហ៊ុន ម៉ាណែត បានជំរុញឱ្យ ក្រសួងសេដ្ឋកិច្ច ពន្លឿនការទូទាត់ថវិកា ទៅកាន់គ្លីនិក និងមន្ទីរពេទ្យ ដែលជាដៃគូ របស់ ប.ស.ស. ដើម្បីធានាប្រសិទ្ធភាព និងបរិយាបន្ន នៃការផ្តល់សេវាសុខាភិបាល ដល់ពលរដ្ឋ ដែលមានបណ្ណ ប.ស.ស.។ ប្រមុខរាជរដ្ឋាភិបាល លើកឡើងដូច្នេះ ក្នុងពិធី«បើកសប្តាហ៍គាំពារសង្គមកម្ពុជា ឆ្នាំ២០២៥ និងប្រកាសដាក់ឱ្យអនុវត្តជាផ្លូវការ ក្របខណ្ឌគោលនយោបាយជាតិ គាំពារសង្គម ឆ្នាំ២០២៤-២០៣៥» នៅថ្ងៃទី២០ ខែកុម្ភៈ។
បើតាម សម្តេចនាយករដ្ឋមន្ត្រី ការទូទាត់បានលឿន និងមានភាពត្រឹមត្រូវ ក៏នឹងចៀសវាងបាននូវការរុញបញ្ហាដាក់គ្នា ក្នុងករណីការសេវាសុខាភិបាល ដល់ពលរដ្ឋកាន់បណ្ណប.ស.ស. នេះកើតមានបញ្ហាដែរ។ សម្រាប់សម្តេច នាយកប្រមុខរាជរដ្ឋាភិបាល ការធានាបាននូវប្រសិទ្ធភាពនៃការផ្តល់សេវាសុខាភិបាល ដល់ពលរដ្ឋដែលមានបណ្ណប.ស.ស. គឺជាការទទួលខុសត្រូវ របស់គ្រប់ភាគីពាក់ព័ន្ធ ទាំងរដ្ឋាភិបាល និងមន្ទីរពេទ្យ និងគ្លីនិកឯកជនដែលជាដៃគូ ប.ស.ស.។
សម្តេច ហ៊ុន ម៉ាណែត បញ្ជាក់ដូច្នេះ៖ «ទន្ទឹមនឹងការទាមទារឱ្យស្ថាប័នដៃគូទទួលខុសត្រូវ ប.ស.ស. ក៏ត្រូវទទួលខុសត្រូវដែរ ពិសេសគឺការទូទាត់ថវិកាទាន់ពេលវេលា ដល់ដៃគូបានលឿន និងត្រឹមត្រូវ។ បានន័យថា មន្ទីរ ឬគ្លីនិក ដែលគាត់ចូលរួមជាមួយយើង មិនអាច ៣ឆ្នាំ ឬ២ឆ្នាំ ឬ១ឆ្នាំ ប៉ុន្តែត្រូវធ្វើម៉េច ពន្លឿននៅក្នុងការទូទាត់ឱ្យបានលឿន ព្រោះគាត់ (ពេទ្យឯកជន) យក (ប្រាក់)ទៅបង្វិល ដើម្បីបំពេញសេចក្តីត្រូវការ។ អ៊ីចឹងការងារនេះ គឺត្រូវជាប្រព័ន្ធជវភាព និងនៅជាមួយគ្នាតែម្តង ហើយគឺត្រូវធ្វើយ៉ាងណា ដើម្បីឱ្យមានប្រសិទ្ធភាព និងទាន់ពេលវេលា។»។
ទន្ទឹមនឹងជំរុញឱ្យ ក្រសួងសេដ្ឋកិច្ច ពន្យឿនការទូទាត់ថវិកា ទៅឱ្យមន្ទីរឯកជនដៃគូ ប្រមុខរាជរដ្ឋាភិបាល ក៏បានរំឭកឱ្យក្រសួងមហាផ្ទៃ និងក្រសួងផែនការ តាមរយៈរដ្ឋបាលរាជធានីខេត្ត និងអាជ្ញាធរពាក់ព័ន្ធ ត្រូវពន្លឿនការធ្វើបច្ចុប្បន្នភាព និងកំណត់អត្តសញ្ញាណពលរដ្ឋ ដែលត្រូវទទួលបានបណ្ណសមធម៌សង្គម ឬបណ្ណងាយរងហានិភ័យ ប្រកបដោយតម្លាភាព ដើម្បីគឺជាពលរដ្ឋដែលជួបការលំបាកពិតប្រាកដ និងចៀសវាការរិះគន់ ក៏ដូចជាធានាអត្ថប្រយោជន៍របស់ពលរដ្ឋក្រីក្រ និងក្រុមងាយរងគ្រោះ៕
អត្ថបទទាក់ទង
© រក្សាសិទ្ធិដោយ thmeythmey.com
