.png)
.png)
.jpg)
.jpg)
៥ឆ្នាំ ក្រសួងអប់រំ បានផ្ដល់អាហារតាមសាលារៀនដល់សិស្សប្រមាណ ៣០ម៉ឺននាក់ ក្នុងខេត្តចំនួន ១០
- ថ្ងៃអង្គារ ទី២៥ ខែកុម្ភៈ ឆ្នាំ២០២៥ ម៉ោង ៧:៥៩ នាទី ព្រឹក
ភ្នំពេញ៖ ចាប់ពីឆ្នាំ ២០១៩ មកដល់ឆ្នាំ២០២៤ កម្មវិធីផ្ដល់អាហារតាមសាលារៀននៅកម្ពុជា បានផ្ដល់អាហារដល់សិស្សប្រមាណ ៣០ម៉ឺននាក់ ក្នុងសាលារៀនគោលដៅចំនួន ១១១៤សាលា នៅខេត្តចំនួន ១០។ នេះបើតាមការលើកឡើងរបស់លោក ហង់ជួន ណារ៉ុន ក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥។
ក្នុងរយៈពេលចុងក្រោយ រាជរដ្ឋាភិបាលកម្ពុជា ពិសេសក្រសួងអប់រំ យុវជន និងកីឡា បានប្រឹងប្រែង និងយកចិត្តទុកដាក់ក្នុងការបណ្តុះមូលធនមនុស្ស ជំរុញកំណើនសេដ្ឋកិច្ច និងការធានាសុខុមាលភាពនៃកុមារ តាមរយៈការអនុវត្តកម្មវិធីផ្តល់អាហារនៅសាលារៀន។ កម្មវិធីផ្តល់អាហារនៅតាមសាលារៀន ត្រូវបានបង្កើតឡើងក្នុងទិសដៅកាត់បន្ថយភាពក្រីក្រ ជំរុញការអភិវឌ្ឍសេដ្ឋកិច្ចក្នុងមូលដ្ឋាន លើកកម្ពស់សុខភាពសិស្ស និងសុខុមាលភាពកុមារ ជាពិសេសសាលារៀនគោលដៅដែលស្ថិតនៅតំបន់ក្រីក្រ។
មកដល់ពេលបច្ចុប្បន្ននេះ កម្មវិធីផ្ដល់អាហារតាមសាលារៀន កំពុងអនុវត្តនៅតាមសាលាបឋមសិក្សាប្រមាណ២ភាគ៣ នៅក្នុងបណ្ដាខេត្តចំនួន ១០ ដោយក្នុងនោះ សាលាមួយចំនួនប្រើប្រាស់ថវិកាជាតិ និងសាលាមួយចំនួនទៀត ទទួលបានការគាំទ្រពីដៃគូអភិវឌ្ឍន៍នានា។
លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានឱ្យថា ពីឆ្នាំ ២០១៩ មកដល់ឆ្នាំ២០២៤ កម្មវិធីផ្ដល់អាហារតាមសាលារៀននៅកម្ពុជា បានផ្ដល់អាហារដល់សិស្សប្រមាណ ៣០ម៉ឺននាក់ ក្នុងសាលារៀនគោលដៅចំនួន ១១១៤សាលា នៅខេត្តចំនួន ១០។ ដោយឡែក ក្នុងឆ្នាំ២០២៤ ក្រសួងអប់រំ បានអនុវត្តកម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ នៅតាមសាលារៀនគោលដៅចំនួន ៥៥៣ ក្នុងខេត្តចំនួន ១០ ដែលមានសិស្សទទួលផល ១៥៣ ៥៨៦នាក់ផងដែរ។
សូមបញ្ជាក់ថា ក្នុងឆ្នាំ២០២៤ រាជរដ្ឋាភិបាលកម្ពុជា បានដាក់ចេញនូវគោលនយោបាយស្ដីពី «ការផ្តល់អាហារតាមសាលារៀន ឆ្នាំ២០២៤-២០៣៥» ដែលមានគោលបំណងផ្តល់ឱ្យសិស្សានុសិស្សនូវអាហារដែលមានសុវត្ថិភាព និងអាហារូបត្ថម្ភ ដើម្បីលើកកម្ពស់ការលូតលាស់រាងកាយ និងការអភិវឌ្ឍន៍ការយល់ដឹង សំដៅលើកកម្ពស់ផលិតភាពនាពេលអនាគត សមភាពយេនឌ័រ និងបរិយាបន្ន។ គោលនយោបាយនេះ មានវិសាលភាពអនុវត្តនៅគ្រឹះស្ថានអប់រំសាធារណៈ ចាប់ពីថ្នាក់មត្តេយ្យសិក្សាដល់ថ្នាក់មធ្យមសិក្សា៕
© រក្សាសិទ្ធិដោយ thmeythmey.com
Tag:
.gif)