.png)
.png)
.jpg)
.jpg)
សម្តេច ហ៊ុន ម៉ាណែត៖ អង្គរសង្ក្រាន្តឆ្នាំនេះ នឹងរៀបចំកាន់តែធំ
- ថ្ងៃអង្គារ ទី២៥ ខែកុម្ភៈ ឆ្នាំ២០២៥ ម៉ោង ១០:៣៥ នាទី ព្រឹក
ភ្នំពេញ៖ «ខែ៤(មេសា) ឆ្នាំនេះ គឺយើងធ្វើអង្គរសង្ក្រាន្តធំ នៅខេត្តសៀមរាបនេះម្តងទៀត។»។ នេះជា ការបញ្ជាក់របស់ សម្តេច ហ៊ុន ម៉ាណែត នាយករដ្ឋមន្ត្រី នៅក្នុងពិធីប្រគល់សញ្ញាបត្រ ជូន ដល់និស្សិតសាកលវិទ្យាល័យ សៅស៍អ៊ីសថ៍អេយសៀ ខេត្តសៀមរាប ថ្ងៃទី២៥ ខែកុម្ភៈនេះ។
ពីវេទិកាដដែលនេះ ប្រមុខរាជរដ្ឋាភិបាល ប្រាប់រំឭកឱ្យយុវជន សហភាពសហព័ន្ធយុវជនកម្ពុជា(ស.ស.យ.ក.) ខេត្តសៀមរាប ត្រៀមខ្លួនក្នុងការចូលរួម និងផ្សព្វផ្សាយសក្តានុពលទេសចរណ៍កម្ពុជា ទៅកាន់ពិភពលោក។
ជុំវិញការរៀបចំព្រឹត្តិការណ៍អង្គរសង្ក្រាន្តនេះដែរ សហភាពសហព័ន្ធយុវជនកម្ពុជា នឹងរៀបចំពិធីសាសនា ដែលរួមមានពិធីបួងសួងសុំសេចក្តីសុខនៅតាមទីសក្ការនានា និងពិធីប្រុងពាលីបើកការដ្ឋាន ព្រឹត្តិការណ៍អង្គរសង្រាន្ត នៅស្ពានហាលខាងលិចប្រាសាទអង្គរវត្ត នៅថ្ងៃទី៩ ខែមីនា ខាងមុខនេះ។
សូមរំឭកថា រាជរដ្ឋាភិបាលកម្ពុជា កំពុងរៀបចំឯកសារ«មហាសង្ក្រាន្ត» ដើម្បីយកទៅចុះបញ្ជីបេតិកភណ្ឌវប្បធម៌អរូបី របស់អង្គការយូណេស្កូ។
សង្ក្រាន្ត ចេញពីភាសាសំស្ក្រឹត «សង្ក្រាន្តិ»។ បើតាមការពន្យល់ក្នុងវចនានុក្រម សម្តេចព្រះសង្ឃរាជ ជួន ណាត សង្ក្រាន្ត មានន័យថា ជាដំណើរឃ្លាតចាកទី; ការឈានចូលដល់; ដំណើរដែលព្រះអាទិត្យចរចូលដល់ទីចួបមួយជុំរាសិចក្រ គឺដំណើរដែលដើមនិងចុងនៃរាសិចក្រចួបគ្នា ពេញគ្រប់ជាមួយឆ្នាំ (ដំណើរដាច់ឆ្នាំចាស់ផ្លាស់ឆ្នាំថ្មី)។ នុងពិធីចូលឆ្នាំថ្មី សង្ក្រាន្តមានបីថ្ងៃគឺថ្ងៃទី ១ ជាថ្ងៃចូលឆ្នាំ, ថ្ងៃទី២ ជា ពារកណ្ដាល ឬហៅថា វ័នបត (ថ្ងៃខ្វាក់), ថ្ងៃទី ៣ ជា ពារឡើងស័ក គឺផ្លាស់ស័កថ្មីនៅថ្ងៃនេះឯង : ថ្ងៃសង្ក្រាន្ត, ពិធីសង្ក្រាន្ត។ ត្រស្តិសង្ក្រាន្ត ពិធីត្រស្តិនិងសង្ក្រាន្តដែលក្សត្រិយ៍ពីបុរាណរួមគ្នាក្នុងកាលតែមួយ។
នៅឡាវ និងថៃ ពាក្យ «សង្ក្រាន្ត» ត្រូវបានប្រើជំនួសថា ជាពិធីចូលឆ្នាំថ្មី។ ក្រៅពីភាសាកំណើតថា Pii Mai ជនជាតិឡាវហៅការប្រារព្ធឆ្នាំថ្មីរបស់ខ្លួនថា Songkran។ រីឯក្នុងភាសាថៃវិញ គេនិយមហៅ «សុងក្រាន» (សង្ក្រាន្ត) តែម្តង៕
© រក្សាសិទ្ធិដោយ thmeythmey.com
