.png)
.png)
.jpg)
.jpg)
ហេតុអ្វីសិស្សមិនចូលបណ្ណាល័យ? រដ្ឋមន្រ្តីថា មកពីគ្មានសៀវភៅសិស្សត្រូវអាន និងបណ្ណាល័យសុទ្ធតែដី
- ថ្ងៃអង្គារ ទី២៥ ខែកុម្ភៈ ឆ្នាំ២០២៥ ម៉ោង ៦:២៩ នាទី ល្ងាច
លោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។
ភ្នំពេញ៖ ក្នុងសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ លោក ហង់ជួន ណារ៉ុន រដ្ឋមន្រ្តីក្រសួងអប់រំ បានលើកយកបញ្ហាដែលនាយកសាលាតែងពោល គឺបញ្ហាសិស្សមិនចូលបណ្ណាល័យ។ ជុំវិញបញ្ហានេះ រដ្ឋមន្រ្តីចោទសួរថា ហេតុអ្វីសិស្សមិនចូលបណ្ណាល័យ? លោក ហង់ជួន ណារ៉ុន ថាមកពីគ្មានសៀវភៅដែលសិស្សត្រូវអាន និងបណ្ណាល័យសុទ្ធតែដី។
នៅតាមសាលារៀននានា មានបន្ទប់បណ្ណាល័យសម្រាប់សិស្សានុសិស្សចូលអាន និងស្រាវជ្រាវ។ ប៉ុន្តែបញ្ហាគ្មានសិស្ស ឬចំនួនសិស្សចូលអានសៀវភៅក្នុងបណ្ណាល័យមានចំនួនតិច កំពុងកើតមាននៅសាលារៀនមួយចំនួន។
បន្ទាប់ពីបញ្ចប់វេទិកាពិភាក្សាទី២ ស្តីពី ការកែទម្រង់សាលារៀន នាសន្និបាតអប់រំឆ្នាំ២០២៥ លោក ហង់ជួន ណារ៉ុន បានបង្ហាញការយល់ឃើញ និងចូលរួមជាមតិយោបល់ ក្នុងការកែទម្រង់សាលារៀន ដែលក្រសួងអប់រំ កំពុងអនុវត្ត។ ក្រៅពីលើកឡើងពីលទ្ធផលវិជ្ជមានតាមរយៈការកែទម្រង់សាលារៀននេះ លោករដ្ឋមន្រ្តីអប់រំ បានសង្កេតឃើញពីបញ្ហាការរៀបចំបណ្ណាល័យសម្រាប់សិស្សអាន និងស្រាវជ្រាវ។
«ពេលខ្លះសិស្សអត់ចូលបណ្ណាល័យ យើងសួរថាថីបានជាសិស្សអត់ចូលបណ្ណាល័យ? ខ្ញុំតែងតែទៅសាលា នាយកថា សិស្សអត់សូវចូលទេ។ ដល់តែទៅមើលបណ្ណាល័យអត់មានសៀវភៅសិស្សត្រូវអាន និងបណ្ណាល័យខ្លះសុទ្ធតែដី»។ លោករដ្ឋមន្រ្តី ហង់ជួន ណារ៉ុន ថ្លែងបែបនេះ។
ដើម្បីពង្រឹងមូលដ្ឋានគ្រឹះឱ្យបានរឹងមាំ លោក ហង់ជួន ណារ៉ុន លើកទឹកចិត្តឱ្យរៀបចំជាឧត្តមានុវត្តន៍ ងាយស្រួលក្នុងការយល់ដឹង និងអនុវត្តអំពីវិធីសាស្ត្របង្រៀន និងអន្តរាគមន៍ ដូចជាការរៀបចំបណ្ណាល័យសិក្សាឱ្យមានស្តង់ដា ការប្រើប្រាស់សៀវភៅគោលសិក្សា និងសៀវភៅជំនួយ ដើម្បីបង្កើនគុណភាពសិក្សាបន្ថែម៕
សូមអញ្ជើញទស្សនាការលើកឡើងរបស់លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ដូចតទៅ៖
© រក្សាសិទ្ធិដោយ thmeythmey.com
Tag:
.gif)